പരീക്ഷ എഴുതാനാകുമോ എന്ന ആശങ്കയിലാണ് രണ്ട് പേരും, പെണ്കുട്ടിക്ക് മറ്റ് സ്കൂളുകളില് പ്രവേശനം നിഷേധിച്ചു, കോടതിയെ സമീപിക്കുമെന്ന് വിദ്യാര്ത്ഥിയുടെ മാതാപിതാക്കള്
കലാമല്സരങ്ങള്ക്കിടെ വിജയിച്ച വിദ്യാര്ത്ഥിനിയെ സുഹൃത്ത് ആലിംഗനം ചെയ്തതിന് ഇരുവരെയും സ്കൂളില് നിന്ന് പുറത്താക്കിയ സംഭവം ബി.ബി.സിയില് വലിയ വാര്ത്തയായി. തിരുവനന്തപുരം മുക്കോല സെന്റ്തോമസ് സ്കൂളില് നടന്ന സംഭവം സാംസ്കാരി കേരളത്തിന് വലിയ നാണക്കേടായി. പ്ലസ് വണ് വിദ്യാര്ത്ഥി സ്കൂളില് പാട്ട് പാടിയത് അഭിനന്ദിക്കാനാണ് സുഹൃത്തും സഹപാഠിയുമായ വിദ്യാര്ത്ഥി ആലിംഗനം ചെയ്തത്. ഒന്നോ രണ്ടോ മിനിറ്റ് നീണ്ട് നിന്ന ഈ സ്നേഹപ്രകടനം അധ്യാപകരെ ചൊടിപ്പിച്ചു. സ്കൂള്മാനേജ്മെന്റ് സദാചാരത്തിന്റെ വാളോങ്ങി. വിദ്യാര്ത്ഥികളുടെയും അധ്യാപകരുടെയും മുന്നില് വെച്ച് നടത്തിയ ആലിംഗനത്തിനെതിരെ ഒരു അധ്യാപികയാണ് പ്രിന്സിപ്പലിനെ സമീപിച്ചത്. ഇതോടെയാണ് പ്രശ്നം വഷളായതെന്ന് പെണ്കുട്ടി ബി.ബി.സിയോട് വ്യക്തമാക്കി.
സംഭവം നടന്നതിന്റെ അടുത്ത ദിവസം ജൂലൈ 22ന് രണ്ട് പേരെയും സ്കൂളില് നിന്ന് സസ്പെന്റ് ചെയ്തു. നാല് മാസങ്ങള്ക്ക് ശേഷം നവംബര് 22ന് ആണ്കുട്ടിയെ പുറത്താക്കി. മാപ്പ് പറയാന് വിദ്യാര്ത്ഥിക്ക് അവസരം നല്കിയെന്നും എന്നാല് അയാളോ മാതാപിതാക്കളോ ഖേദം പ്രകടിപ്പിച്ചില്ലെന്നും പ്രിന്സിപ്പല് ടി. ജോസഫ് ബി.ബി.സിയോട് പ്രതിരിച്ചിട്ടുണ്ട്. സംഭവം നടന്ന ശേഷം താന് മാപ്പ് പറഞ്ഞെന്ന് വിദ്യാര്ത്ഥി പറയുന്നു.
ഇതിന് ശേഷം പെണ്കുട്ടി സ്കൂളില് എത്തിയിട്ടില്ല. ടി.സി വാങ്ങിപ്പോയെന്നാണ് സ്കൂള് അധികൃതര് പറയുന്നത്. ദുബയില് പഠിക്കുകയായിരുന്ന പെണ്കുട്ടി ജൂണിലാണ് സെന്റ്തോമസ് സ്കൂളില് ചേര്ന്നത്.
മറ്റ് സ്കൂളില് ചേരാന് തക്കവിധമുള്ള രേഖകള് സെന്റ്തോമസ് സ്കൂള് അധികൃതര് നല്കിയിട്ടില്ലെന്ന് പെണ്കുട്ടി പറഞ്ഞു. വിദ്യാര്ത്ഥികളുടെയും അധ്യാപകരുടെയും മുന്നില് വെച്ച് മാന്യതയും ധാര്മികതയും അച്ചടക്കവും ഇല്ലാത്ത പെരുമാറ്റമാണ് രണ്ട് വിദ്യാര്ത്ഥികളുടെയും ഭാഗത്ത് നിന്നുണ്ടായതെന്ന് സംഭവത്തെ കുറിച്ച് അന്വേഷിച്ച, സ്കൂള് അച്ചടക്ക സമതിയുടെ റിപ്പോര്ട്ടില് പറയുന്നു. രണ്ട് പേരുടെയും ബ്ളോഗിലും ഇന്സ്റ്റഗ്രാമിലും ആലിംഗനം ചെയ്ത ഫോട്ടോകള് പോസ്റ്റ് ചെയ്തെന്നും അതില് ഇരുവരും തമ്മില് അടുത്തിടപഴകുന്നത് വ്യക്തമാണെന്നും അശ്ലീല ഫോട്ടോയാണെന്നും റിപ്പോര്ട്ടില് പറയുന്നു.
തന്റെ ഇന്സ്റ്റഗ്രാം അക്കൗണ്ട് വളരെ സ്വകാര്യതയുള്ളതാണെന്നും അത് സുഹൃത്തുക്കള്ക്ക് മാത്രമേ കാണാനാകൂ എന്നും പുറത്താക്കിയ വിദ്യാര്ത്ഥി വ്യക്തമാക്കി. സ്കൂള് അച്ചടക്ക സമിതി പറയുന്നത് പോലെ ഫോട്ടോകളില് യാതൊരു അശ്ലീലവും ഇല്ലെന്നും വിദ്യാര്ത്ഥി വ്യക്തമാക്കി. ഇസ്റ്റഗ്രാമിലെ ഫോട്ടോകളുടെ കോപ്പികളുമായി എത്തിയ അച്ചടക്ക സമിതി അംഗങ്ങള് തന്നെയും മാതാപിതാക്കളെയും അധിക്ഷേപിച്ച് സംസാരിച്ചെന്ന് പെണ്കുട്ടി പറഞ്ഞു. അധികൃതരില് ഒരാള് തന്നെ അഭിസാരികയെന്ന് വിളിച്ചെന്നും പെണ്കുട്ടി പറഞ്ഞു. അധികൃതരുടെ നിലപാട് കാരണം രണ്ട് പേര്ക്കും നാല് മാസത്തെ പഠനമാണ് നഷ്ടമായത്.
കോടതിയില് നിന്ന് നീതികിട്ടുമെന്നാണ് പ്രതീക്ഷിക്കുന്നതെന്ന് പുറത്താക്കിയ വിദ്യാര്ത്ഥിയുടെ പിതാവ് പറഞ്ഞു. മകനെ പുറത്താക്കിയ ശേഷം താന് ജോലിക്ക് പോയിട്ടില്ലെന്നും അവന് പിന്തുണയുമായി വീട്ടില് കഴിയുകയാണെന്നും പറഞ്ഞു. സ്കൂള് അധികൃതരാരും തന്റെ മകന്റെയോ, പെണ്കുട്ടിയുടെയോ ഇന്സ്റ്റഗ്രാം ഫോളോ ചെയ്യുന്നവരല്ല. പക്ഷെ, അവര് എങ്ങനെയോ ഫോട്ടോസ് എടുത്ത് കോടതിയില് ഹാജരാക്കി. അവര് എന്തിനാണ് കുട്ടികളുടെ സ്വകാര്യതയില് ഇടപെടുന്നതെന്ന് മനസിലാകുന്നില്ലെന്നും പിതാവ് പറഞ്ഞു.
ആണ്കുട്ടിക്ക് മറ്റൊരു സ്കൂളിലേക്ക് ട്രാന്സ്ഫര് നല്കിയെന്നും ഇക്കാര്യത്തില് സി.ബി.എസ്.സി ബോര്ഡാണ് തീരുമാനം എടുക്കേണ്ടതെന്നും സ്കൂള് അധികൃതര് പറഞ്ഞു. ജനുവരി മൂന്നിന് സ്കൂളില് ഹാജരാകാന് കുട്ടിക്ക് കത്തയച്ചിട്ടുണ്ടെന്നും പ്രശ്നം പരിഹരിക്കാനാകുമെന്നും അവര് വ്യക്തമാക്കി. പെണ്കുട്ടിയുടെ കാര്യത്തില് ഇതുവരെ തീരുമാനം ആയിട്ടില്ല. കോടതിയില് പോകന്നത് സംബന്ധിച്ച് മാതാപാതാക്കള് തീരുമാനം എടുത്തിട്ടില്ല. സെന്റ്തോമസ് സ്കൂളില് ഇനി പഠനം തുടരില്ലെന്ന് പെണ്കുട്ടി വ്യക്തമാക്കി. വാര്ഷിക പരീക്ഷ എഴുതാന് അധികൃതര് സമ്മതിക്കുമെന്നാണ് പ്രതീക്ഷിക്കുന്നത്. ഒരു വര്ഷം പാഴാക്കാന് ആഗ്രഹിക്കുന്നില്ലെന്നും പെണ്കുട്ടി പറഞ്ഞു. നല്ല അന്തരീക്ഷമുള്ള, മാന്യമായി പെരുമാറുന്ന അധ്യാപകരുള്ള സ്കൂളില് പഠിക്കാനാണ് ആഗ്രഹമെന്നും മറ്റൊരു സ്കൂളില് പ്രവേശനത്തിന് ശ്രമിച്ചെങ്കിലും ഈ പ്രശ്നം കാരണം അവര് തടഞ്ഞെന്നും പഠിക്കാനുള്ള അവകാശവും സ്വകാര്യതയും സെന്റ് തോമസ് സ്കൂള് അധികൃതര് ഇല്ലാതാക്കുകയാണെന്നും പെണ്കുട്ടി പറഞ്ഞു.
https://www.facebook.com/Malayalivartha
