സ്കൂൾ വിദ്യാർത്ഥിനിയെ ശ​ല്യം ചെ​യ്ത​ത് ചോ​ദ്യം ചെ​യ്ത ക​ണ്ട​ക്ട​റെ ഫ്രീക്കൻ പൂവാലമാർ പഞ്ഞിക്കിട്ട ശേഷം ഓ​ടു​ന്ന ബ​സിൽ നി​ന്ന് തള്ളിയിടാൻ ശ്രമിച്ചു. വെ​ഞ്ഞാ​റ​മൂ​ട് ഡി​പ്പോ​യി​ലെ കണ്ടക്ട​റായ എം. മനോ​ജി​ന് (30) നേരെയാ​ണ് ആക്രമണമുണ്ടായത്. പ​രി​ക്കേറ്റ​ മനോജ് കല്ലറ ആശുപത്രിയിൽ ചികിത്സയിലാണ്. ഒരുകൂട്ടം പ്ളസ് വൺ വിദ്യാർത്ഥികളാണ് അക്രമത്തിന് പിന്നിലെന്ന് പൊലീസ് പറഞ്ഞു. വെ​ഞ്ഞാ​റ​മൂ​ട് വ​ഴി മു​തു​വി​ള​യി​ലേക്ക് പോവു​ക​യാ​യി​രു​ന്ന വെഞ്ഞാ​റ​മൂ​ട് ഡി​പ്പോ​യി​ലെ കെ.​എ​സ്.​ആർ.​ടി.​സി ബ​സ് രാവി​ലെ എട്ടരയോടെ മിതൃമ്മല മീതുരിലെത്തിയപ്പോഴാണ് സംഭവം.

സ്കൂ​ളിൽ പ​ഠി​ക്കുന്ന വി​ദ്യാർ​ത്ഥി​കളായിരുന്നു അധികവും. ഒ​രു വി​ദ്യാർ​ത്ഥിനിയെ പൂവാല സംഘം ശല്യം ചെയ്തു. ഇത് ചോദ്യം ചെയ്ത കണ്ടക്ടർക്ക് നേരെ സംഘം തിരിഞ്ഞു. തുടർന്ന് കണ്ടക്ടറെ ക്രൂരമായി മർദ്ദിച്ച സംഘം ബസിൽ നിന്ന് തള്ളിയിടാനും ശ്രമിച്ചു. ഫുട് ബോർഡിലേക്ക് തെറിച്ചുവീണ കണ്ടക്ടറെ മറ്റു യാത്രക്കാർ രക്ഷപ്പെടുത്തിയതിനാൽ അപകടം ഒഴിവായി. യാത്രക്കാരുടെ വിളികേട്ട് ​ ഡ്രൈ​വർ ബസ് നിറു​ത്തിയപ്പോൾ ഓ​ടി ര​ക്ഷ​പ്പെ​ടാൻ ശ്രമി​ച്ച വിദ്യാർത്ഥികളെ യാത്രക്കാരും നാ​ട്ടു​കാ​രും പി​ടി​കൂ​ടി പൊലീ​സിൽ ഏല്പിക്കുകയായിരുന്നു.

സംഭവം നടക്കുന്നതിന് മുൻപ് കല്ലറ സ്റ്റാൻഡിൽ വച്ച് ബസിന്റെ പിൻസീറ്റിൽ വിദ്യാർത്ഥിനികളുടെ ഇടയിൽ സംശയാസ്പദമായ നിലയിൽ കണ്ട വിദ്യാർത്ഥികളെ കണ്ടക്ടർ താക്കീത് നൽകി പുറത്തിറക്കിയിരുന്നു. ഇവരാണ് ബസിനുള്ളിൽ വീണ്ടും കടന്നുകയറി പ്രശ്നമുണ്ടാക്കിയതെന്ന് മനോജ് പറഞ്ഞു. ഡി​പ്പോ അധികൃതരുടെ പരാതിയിൽ പാ​ങ്ങോ​ട് പൊലീ​സ് കേസെടുത്തു.