കണ്ണൂരിലെ ആര്‍എസ്എസ് നേതാവ് മനോജിന്റെ കൊലപാതകം ക്രൈംബ്രാഞ്ച് പ്രത്യേക സംഘം അന്വേഷിക്കുമെന്ന് ആഭ്യന്തരമന്ത്രി രമേശ് ചെന്നിത്തല. ക്രൈംബ്രാഞ്ച് എഡിജിപി എസ്.അനന്തകൃഷ്ണനാണ് അന്വേഷണ ചുമതല. അന്വേഷണത്തിന്റെ ഭാഗമായി എഡിജിപി ഇന്ന് കണ്ണൂരിലെത്തും. കണ്ണൂരില്‍ സമാധാന അന്തരീക്ഷം നിലനിര്‍ത്താന്‍ സര്‍വകക്ഷിയോഗം വിളിക്കാന്‍ ജില്ലാ കലക്റ്ററെ ചുമതലപ്പെടുത്തിയെന്നും ചെന്നിത്തല. അക്രമത്തിന്റെ ഗൗരവ സ്വഭാവം കണക്കിലെടുത്താണ് അന്വേഷണം ക്രൈംബ്രാഞ്ചിനെ ഏല്‍പ്പിച്ചത്. കൊലപാതകവുമായി ബന്ധപ്പെട്ട് തലശേരി ലോക്കല്‍ പോലീസ് എട്ടുപേര്‍ക്കെതിരെ കേസെടുത്തു. പ്രതികള്‍ സിപിഎം പ്രവര്‍ത്തകരാണെന്നാണ് എഫ്‌ഐആര്‍ പരാമര്‍ശം.
കണ്ണൂരിനെ പഴയതുപോലെ രാഷ്ട്രീയ കുതിരക്കളമാക്കാന്‍ അനുവദിക്കില്ല. നിഷ്പക്ഷവും സത്യസന്ധവുമായ അന്വേഷണം ഉറപ്പാക്കും. അത്യന്തം ഗൗരവകരമായാണ് സര്‍ക്കാര്‍ ഈ സംഭവത്തെക്കാണുന്നത്. ഈ കൊലപാതകത്തിന്റെ പേരില്‍ മനപൂര്‍വം ക്രമസമാധാനം ഇല്ലാതാക്കാന്‍ ആരെയും അനുവദിക്കില്ല. ജനങ്ങളുടെ ജീവനും സ്വത്തിനും സംരക്ഷണം നല്‍കാന്‍ നടപടി സ്വീകരിക്കും. കുറ്റക്കാരായ പ്രതികളെ എത്രയും വേഗം നിയമത്തിനു മുന്നില്‍ കൊണ്ടുവരുമെന്നും ആഭ്യന്തരമന്ത്രി.
കൊലപാതകത്തിനു പിന്നാലെ ജയരാജന്റെ മകന്‍ ഫേയ്‌സ്ബുക്ക് പോസ്റ്റ് ഇട്ടതും പിന്നീട് പിന്‍വലിച്ചതും ഗൗരവകരമായി കാണുന്നു. ഇക്കാര്യത്തിലും അന്വേഷണം നടത്തും. കണ്ണൂരില്‍ സമാധാനം ഉറപ്പാക്കുന്നതിന് ആവശ്യമായ പോലീസ് സേനയെ വിന്യസിച്ചിട്ടുണ്ട്. എല്ലാ രാഷ്ട്രീയ പാര്‍ട്ടികളും നേതാക്കളും സര്‍ക്കാരിന്റെ സമാധാനശ്രമങ്ങളുമായി സഹകരിക്കണം. ഹര്‍ത്താലില്‍ വലിയ തോതിലുള്ള അക്രമസംഭവങ്ങള്‍ ഉണ്ടാകാതിരിക്കാന്‍ പോലീസ് സാന്നിധ്യം എല്ലായിടങ്ങളിലും ഉറപ്പു വരുത്തിയിരുന്നു. കൊലപാതകത്തിന്റെ പശ്ചാത്തലത്തില്‍ പോലീസ് മേധാവി, ഇന്റലിജന്റസ് എഡിജിപി എന്നിവര്‍ യോഗം ചേര്‍ന്ന് സ്ഥിതിഗതികള്‍ വിലയിരുത്തി.

ഇന്റലിജന്റസ് ആവശ്യപ്പെടുന്നവര്‍ക്ക് പോലീസ് സംരക്ഷണം നല്‍കാറുണ്ട്. തലശേരിയില്‍ കൊാല്ലപ്പെട്ട ആള്‍ക്ക് പോലീസ് സംരക്ഷണം വേണമെന്ന റിപ്പോര്‍ട്ട് ലഭിച്ചിട്ടില്ല. കൊല്ലപ്പെട്ടയാള്‍ പി.ജയരാജന്‍ വധശ്രമ കേസിലെ അഞ്ചാം പ്രതിയാണ്. തലശേരിയിലെ കതിരൂരില്‍ തിങ്കളാഴാചയാണ് ആര്‍എസ്എസ് നേതാവ് മനോജ് വെട്ടേറ്റു മരിച്ചത്.സംഭവത്തില്‍ കേന്ദ്ര ആഭ്യന്ദരമന്ത്രി രാജാനാഥ്‌സിംഗ് മുഖ്യമന്ത്രിയെ നേരിട്ട് വിളിച്ച് സംഭവത്തിന്റെ വിശദാംശങ്ങള്‍ ചോദിച്ചറിഞ്ഞുവെന്നും ഇതില്‍ അസ്വാഭാവികത ഇല്ലെന്നും ചെന്നിത്തല പറഞ്ഞു.