മുല്ലപ്പെരിയാറില്‍ ജലനിരപ്പ് ഉയര്‍ന്ന് സ്ഥിതിഗതികള്‍ ആശങ്കാജനകമായി. ഈ സാഹചര്യത്തില്‍ എത്രയും വേഗം മോല്‍നോട്ട സമിതിയുടെ യോഗം വിളിച്ചു ചേര്‍ക്കാന്‍ ആവശ്യമുയര്‍ന്നു. അണക്കെട്ടിലെ ജലനിരപ്പ് 130 അടി എത്തുമ്പോഴാണ് മേല്‍നോട്ടസമിതി യോഗം ചേരുന്നത്. ജലനിരപ്പ് ഉയര്‍ന്നതിനാല്‍ യോഗം ചേരണമെന്ന് സമിതി അംഗമായ ജലവിഭവ വകുപ്പ് അഡിഷണല്‍ സെക്രട്ടറി വി.ജെ.കുര്യനോട് മുല്ലപ്പെരിയാര്‍ സെല്‍ ആവശ്യപ്പെട്ടിട്ടുണ്ട്.

ജലനിരപ്പ് ഉയര്‍ന്നില്ലെങ്കില്‍ ഈ മാസം 26ന് യോഗം ചേരാനാണ് മുന്‍ ധാരണ ഉണ്ടായിരുന്നത്. അണക്കെട്ടിന്റെ വൃഷ്ടി പ്രദേശങ്ങളില്‍ മഴ കനത്തതുകൊണ്ടുണ്ടായ നീരൊഴുക്കാണ് ജലനിരപ്പുയരാന്‍ കാരണമായത്. കൂടാതെ തമിഴിനാട് കൊണ്ടുപോകുന്ന വെള്ളത്തിന്റെ അളവു പകുതിയായി കുറഞ്ഞു.
പ്രതിദിനം 30 കോടി ഘന അടിയോളം വെള്ളമാണ് അണക്കെട്ടിലേക്ക് ഒഴുകിയെത്തുന്നത്. 14.8കോടി ഘന അടി വെള്ളം കൊണ്ടുപോകാമായിട്ടും തമിഴ്‌നാട് ഇപ്പോള്‍ അതു ചെയ്യുന്നില്ല. അണക്കെട്ടിന്റെ സുരക്ഷ സംബന്ധിച്ച ആശങ്കകള്‍ ഉയരുമ്പോഴാണ് തമിഴ്‌നാടിന്റെ പ്രകോപനം. ഇന്നലെ രാവിലെ അംക്കെട്ടിലെ വെള്ളം 130.3 അടിയായി ഉയര്‍ന്നിട്ടുണ്ട്. ഓണത്തിനു മുമ്പ് യോഗം ചേരണമെന്നാണ് മുല്ലപ്പെരിയാര്‍ സെല്‍ ആവശ്യപ്പെട്ടിരിക്കുന്നത്.