ചെങ്ങന്നൂര്‍ ഉപതെരഞ്ഞടുപ്പിന് ദിവസങ്ങള്‍ മാത്രം ശേഷിക്കെ സി പി എമ്മിനെ പ്രതിരോധത്തിലാക്കി വീണ്ടും സി പി ഐ. സമുദായ സംഘടനകളെയെല്ലാം സി പി എമ്മിന് എതിരാക്കി മാറ്റുന്നതിനാണ് സി പി ഐ ശ്രമിക്കുന്നത്. ചെങ്ങന്നൂരില്‍ മൃഗീയ ഭൂരിപക്ഷമുള്ള എന്‍ എസ് എസ് , എസ് എന്‍ ഡി പി, െ്രെകസ്തവ മാനേജ്‌മെന്റ് തുടങ്ങിയ സമുദായ സംഘടനകളെ പിണക്കുന്ന തരത്തിലാണ് സി പി ഐ മുന്നോട്ട് നീങ്ങുന്നത്.

2005 ല്‍ യുഡിഎഫ് സര്‍ക്കാര്‍ എയ്ഡഡ് വിദ്യാലയങ്ങള്‍ക്ക് പതിച്ചു നല്‍കിയ പട്ടയഭൂമി മുന്‍കാല പ്രാബല്യത്തോടെ പിന്‍വലിക്കാനുള്ള റവന്യു വകുപ്പ് തീരുമാനം സി പി എമ്മും സമുദായ സംഘടനകളുമായുള്ള മികച്ച ബന്ധം ഇല്ലാതാക്കി.

2005 ല്‍ ഉമ്മന്‍ ചാണ്ടി സര്‍ക്കാരാണ് എന്‍ എസ് എസ്, എസ് എന്‍ ഡി പി, െ്രെകസ്തവ മാനേജ്‌മെന്റുകള്‍, ഇസ്ലാം മാനേജ്‌മെന്റ് തുടങ്ങിയവര്‍ക്ക് വിദ്യാഭ്യാസ സ്ഥാപനങ്ങള്‍ നടത്താന്‍ സര്‍ക്കാര്‍ ഭൂമി പതിച്ചു നല്‍കിയത്. അതേ ഉത്തരവാണ് 2011 മുതലുള്ള മുന്‍കാല പ്രാബല്യത്തോടെ റദ്ദാക്കി കൊണ്ട് റവന്യം വകുപ്പ് ഉത്തരവിറക്കിയത്.

ഭൂരഹിതര്‍ക്ക് വീടു നല്‍കുന്നതിനു വേണ്ടി മാത്രം ഭൂമി പതിച്ചു നല്‍കിയാല്‍ മതിയെന്ന് ഉമ്മന്‍ ചാണ്ടി സര്‍ക്കാര്‍ 2011ല്‍ തീരുമാനിച്ചിരുന്നു. 2011 ജൂലൈ 27നാണ് ഇത്തരമൊരു ഉത്തരവ് ഉമ്മന്‍ ചാണ്ടി സര്‍ക്കാര്‍ ഇറക്കിയത്. മറ്റാവശ്യങ്ങള്‍ക്ക് പാട്ടത്തിന് മാത്രമേ ഭൂമി നല്‍കാവൂ എന്നാണ് നിയമത്തില്‍ പറയുന്നത്. 2011 ലെ ഉത്തരവ് പാസാക്കിയപ്പോള്‍ തന്നെ 2005 ലെ ഉത്തരവ് അസാധുവായി കഴിഞ്ഞെന്നാണ് ഇപ്പോള്‍ റവന്യു വകുപ്പ് അഡീഷണല്‍ ചീഫ് സെക്രട്ടറിയുടെ ഉത്തരവില്‍ പറയുന്നത്.

പുതിയ ഉത്തരവിന്റെ ഫലം അനുഭവിക്കുന്നത് കേരളത്തിലെ സമുദായ സ്ഥാപനങ്ങളാണ്. ,സമുദായ സംഘടനകളുടെ എതിര്‍പ്പ് സി പി എം നേത്യത്വം നല്‍കുന്ന സര്‍ക്കാരിന് ഭാരമായി തീരുമെന്ന കാര്യത്തില്‍ സംശയമില്ല. എന്നാല്‍ ബുദ്ധിപൂര്‍വമായാണ് സി പി ഐ ഇക്കാര്യത്തില്‍ നിലപാട് സ്വീകരിച്ചത്. ഉമ്മന്‍ ചാണ്ടിയുടെ ഉത്തരവാണ് മന്ത്രി ചന്ദ്രശേഖരന്‍ കരുവാക്കിയത്. ഏതായാലും ഇത്തരമൊരു ഉത്തരവ് ഇങ്ങനെ വ്യാഖ്യാനിക്കുമ്പോള്‍ അതിന് മുഖ്യമന്ത്രിയുടെ അനുമതി ലഭിച്ചിരിക്കാന്‍ ഒരു സാധ്യതയില്ല.

ചെങ്ങന്നൂര്‍ ഉപതെരഞ്ഞടുപ്പ് നടക്കാന്‍ ദിവസങ്ങള്‍ മാത്രം ബാക്കിനില്‍ക്കെ സമുദായ സംഘടനകളെ പിണക്കാന്‍ ഇത്തരമൊരു തീരുമാനം സര്‍ക്കാര്‍ എന്തിന് എടുത്തു എന്ന രാഷ്ട്രീയ ചോദ്യമാണ് കേരളം ചോദിക്കുന്നത്. തീര്‍ച്ചയായും ഇത്തരമൊരു ചോദ്യം വിരല്‍ ചൂണ്ടുന്നത് സി പി ഐയിലേക്കാണ്. സി പി എമ്മിനെ വെട്ടിലാക്കാന്‍ കിട്ടുന്ന ഒരവസരവും സി പി ഐ പാഴാക്കില്ല.