കണ്ണൂരിലെ മലയോരഗ്രാമമായ പെരിങ്ങോം അരവഞ്ചാലിനടുത്ത ഗ്രാമത്തിലെ പറമ്പുകളില്‍ മുഴുവനും ആഴത്തിലുള്ള കുഴികളാണ്. രാത്രികാലങ്ങളിലാണ് പലരും കുഴികുത്തുന്നത്. ഇവരാരും ഗ്രാമവാസികളല്ലതാനും. പിന്നെയെന്തിനാണ് ഇവരീ കുഴികുത്തുന്നത്. ഗ്രാമത്തിലെവിടെയോ നിധിയുണ്ടെന്ന് ആരോ സമൂഹമാധ്യമങ്ങളിലൂടെ വ്യാജപ്രചരണം നടത്തി. ഇതോടെ നാട്ടുകാര്‍ക്ക് കെടക്കപ്പൊറുതിയില്ലാതായി. പെരിന്തട്ട വില്ലേജ് ഓഫിസറും പെരിങ്ങോം എസ്‌ഐയും ഇവിടം സന്ദര്‍ശിച്ച് നിധിയില്ലെന്ന് വ്യക്തമാക്കിയിട്ടും നിധിവേട്ടക്കാരുടെ കുഴികുത്തലിന് കുറവില്ല.

നിധി തേടിയെത്തുന്നവരുടെ ആക്രമണത്തെ ഭയന്ന്, രാത്രി കാലങ്ങളില്‍ ശബ്ദം കേട്ടാല്‍ പോലും നാട്ടുകാര്‍ വീടിന് പുറത്തിറങ്ങില്ല ഇപ്പോള്‍. കണ്ണങ്കൈ കോളനി റോഡിനോട് ചേര്‍ന്ന റബര്‍ തോട്ടത്തില്‍ നിധി ശേഖരമുണ്ടെന്നാണ് ഫെയിസ്ബുക്കിലടക്കം വാര്‍ത്ത വന്നത്. ഇതോടെ രാത്രിയുടെ മറവില്‍ അപരിചിതല്‍ എത്താന്‍ തുടങ്ങി. നാട്ടുകാരുടെ ഉറക്കവും പോയി. തോട്ടത്തിനടുത്ത് നാലഞ്ച് വീട്ടുകാര്‍ താമസിക്കുന്നുണ്ട്. അവര്‍ പെരിങ്ങോംവയക്കര പഞ്ചായത്തലും പൊലീസിലും പരാതി നല്‍കിയിട്ടുണ്ട്. പക്ഷെ, വലിയ പ്രയോജനമുണ്ടായില്ല. രാത്രികാലങ്ങളില്‍ കുഴിയെടുക്കുന്ന ശബ്ദം കേള്‍ക്കാറുണ്ടെങ്കിലും വീട്ടുകാരാരും പുറത്തിറങ്ങാറില്ല.

വ്യാജ പ്രചരണം നടത്തിയവരെ പൊക്കാന്‍ സൈബര്‍ സെല്‍ അന്വേഷണം നടത്തുന്നുണ്ട്. ഫേസ്ബുക്കിലൂടെ സ്ഥലത്തെ ചിലരുടെ പേരിലായിരുന്നു പ്രചരണം. അന്വേഷണത്തില്‍ ഇതെല്ലാം വ്യാജ അക്കൗണ്ടുകളാണെന്ന് കണ്ടെത്തി. പഴയ നിര്‍മാണ ശൈലിയിലുള്ള പാറക്കുഴിയും ചെത്തിയൊരുക്കിയ കല്ലുകളും പ്രദേശത്ത് ധാരാളമുണ്ട്. മാന്‍ഹോള്‍ പോലുള്ള പാറയ്ക്കുള്ളില്‍ ഗുഹയുണ്ടെന്നും വിശ്വസിക്കുന്നു. പെരിന്തട്ട,പെരിങ്ങോം വില്ലേജുകളില്‍ പലയിടത്തും മുനിയറകളുടെയും നന്നങ്ങാടികളുടെയും ശേഷിപ്പുകള്‍ ഇപ്പോഴുമുണ്ട്.

ഒരേക്കറോളമുള്ള തോട്ടത്തില്‍ വലിയ ചെത്തുകല്ലുകള്‍ ഉപയോഗിച്ച് മാര്‍ക്ക് ചെയ്ത ഭാഗമുണ്ട്. അത് നിധി ശേഖരമുള്ള പ്രദേശം അടയാളപ്പെടുത്തിയതാണെന്ന് പണ്ട് മുതലേ പലരും പറയുന്നുണ്ട്. ഏകദേശം ഒന്നര മീറ്ററോളം വിസ്തൃതിയുള്ള സ്ഥലത്ത് കല്ലുകൊണ്ടാണ് അടയാളപ്പെടുത്തിയിരിക്കുന്നത്. അവിടമാണ് അപരിചിതരായ ആളുകളെത്തി കുഴി കുഴിക്കുന്നത്. പത്തുവര്‍ഷം മുന്‍പും പലരും കുഴിയെടുത്ത് കല്ലുകള്‍ നീങ്ങിയിട്ടുണ്ട്.