കൊരങ്ങിണി ദുരന്തത്തെ തുടര്‍ന്ന് മാര്‍ച്ച് 12 നാണ് കേരളത്തിലെ വന മേഖലകളിലും പുല്‍മേടുകളിലും ട്രക്കിങ് നിയന്ത്രിച്ച് സര്‍ക്കാര്‍ ഉത്തരവിറക്കിയത്. എന്നാല്‍ ടൂറിസം സീസണ്‍ ആരംഭിച്ചതോടെ വിലക്ക് മറികടന്ന് ട്രക്കിങ് പാക്കേജുകള്‍ നടത്തുകയാണ് മൂന്നാറില്‍ പ്രവര്‍ത്തിക്കുന്ന ചില ട്രാവല്‍ ഏജന്‍സികള്‍. ദിവസങ്ങള്‍ വനത്തിലൂടെ നീളുന്ന യാത്രയാണ് ഏജന്‍സികള്‍ നടത്തുന്നത്. കേരളതമിഴ്‌നാട് അതിര്‍ത്തി പ്രദേശങ്ങളായ എല്ലപ്പെട്ടി, ടോപ്പ് സ്‌റ്റേഷന്‍ തുടങ്ങിയ സ്ഥലങ്ങളില്‍ നിന്നാണ് ട്രക്കിങ് ആരംഭിക്കുന്നത്. വനത്തിലൂടെ കിലോമീറ്ററുകള്‍ സഞ്ചരിച്ച് തമിഴ്‌നാടിന്റെ വനമേഖലയില്‍ എത്തും. ഇവിടെയാണ് താമസ സൗകര്യം. ഏത് നിമിഷവും കാട്ടു തീ ഭീഷണി നേരിടുന്ന വനമേഖലകളിലൂടെയാണ് ഇവരുടെ സഞ്ചാരവും താമസവും.

സുരക്ഷാ മുന്‍ കരുതലുകള്‍ യാതൊന്നും കൂടാതെയാണ് ഇത്തരം ഏജന്‍സികള്‍ സഞ്ചാരികളെ കാട് കയറ്റുന്നത്. കാട്ടു തീക്ക് പുറമെ വന്യ ജീവി ആക്രമണ സാധ്യതയുള്ള സ്ഥലങ്ങളിലൂടെയാണ് ഇവരുടെ യാത്ര. ഇത്തരത്തില്‍ മുന്‍കരുതലുകള്‍ അവഗണിച്ചതാണ് കൊരങ്ങിണി ദുരന്തത്തില്‍ 23 പേരുടെ മരണത്തിന് ഇടയാക്കിയത്. പത്തും ഇരുപതും ആളുകളടങ്ങുന്ന സംഘം വനമേഖലയിലൂടെ യാത്ര ചെയ്യുന്നുണ്ടെങ്കിലും ഇതൊന്നും അറിഞ്ഞില്ലെന്ന മട്ടിലാണ് വനം വകുപ്പ് ഉദ്യോഗസ്ഥര്‍.