മുതിര്‍ന്ന കോണ്‍ഗ്രസ് നേതാവും രാജ്യസഭാ ഉപാധ്യക്ഷനുമായ പി.ജെ കുര്യനെതിരെ യൂത്ത് കോണ്‍ഗ്രസ് നേതാക്കളുടെ പടയൊരുക്കം. ജൂണില്‍ ഒഴിവ് വരുന്ന രാജ്യസഭാ സീറ്റിലേക്ക് പി.ജെ കുര്യനെ പരിഗണിക്കരുതെന്ന് ഇവര്‍ പാര്‍ട്ടി അധ്യക്ഷന്‍ രാഹുല്‍ഗാന്ധിയോട് ആവശ്യപ്പെട്ടതായാണ് റിപ്പോര്‍ട്ട്. സംസ്ഥാന നേതാക്കളെയും ഇക്കാര്യം അറിയിച്ചിട്ടുണ്ട്. പി.ജെ. കുര്യനും കെ.വി തോമസും അടക്കമുള്ള നേതാക്കളെ രാഹുല്‍ ഗാന്ധിക്കും താല്‍പര്യമില്ല. 13 വര്‍ഷമായി പി.ജെ കുര്യന്‍ രാജ്യസഭാ ഉപാധ്യക്ഷനായി തുടരുകയാണ്. കോണ്‍ഗ്രസ് അധ്യക്ഷയായിരുന്ന സോണിയാ ഗാന്ധിയുടെ വിശ്വസ്ഥരിലെ പ്രമുഖനാണ് പി.ജെ.

പി.ജെ കുര്യന്‍ ലോക്‌സഭയിലും രാജ്യസഭയിലുമായി 32 വര്‍ഷം എം.പിയായി. 1980 മുതല്‍ 1992 വരെ ലോക്‌സഭാംഗവും അതിന് ശേഷം രാജ്യസഭാംഗവുമായി. അതിനാല്‍ യുവരക്തത്തിന് അര്‍ഹമായ പരിഗണന നല്‍കണമെന്നാണ് ആവശ്യം. കാല്‍നൂറ്റാണ്ടായി പി.ജെ കുര്യന്‍, വയലാര്‍ രവി, എ.കെ ആന്റണി തുടങ്ങിയ ചില നേതാക്കളില്‍ മാത്രം ഒതുങ്ങുകയാണ് കോണ്‍ഗ്രസിലെ രാജ്യസഭാ സീറ്റ്. 1985ല്‍ രാജ്യസഭാംഗമായ എ.കെ ആന്റണി പത്ത് വര്‍ഷം ആ പദവിയില്‍ തുടര്‍ന്നു. അവിടെ നിന്ന് നേരെ കേരളത്തില്‍ മുഖ്യമന്ത്രിയായി എത്തി. മുഖ്യമന്ത്രിയും പ്രതിപക്ഷനേതാവുമായി 2005 വരെ വിരാചിച്ചു. 2005ല്‍ വീണ്ടും രാജ്യസഭയിലേക്ക് പറന്നു. ഇപ്പോഴും അത് തുടരുന്നു. 1996ല്‍ മുഖ്യമന്ത്രിയാകുന്നതിന് മുമ്പ് 10 കൊല്ലവും 2005 മുതല്‍ 2018 വരെ 13 കൊല്ലവും ആന്റണി രാജ്യസഭാ അംഗമായി.

ലോക്‌സഭയിലും നിയമസഭയിലും വിജയിച്ചിരുന്ന വയലാര്‍ രവി ഒരു തവണ പരാജയപ്പെട്ടതോടെയാണ് രാജ്യസഭയിലേക്ക് ചുവട് മാറിയത്. 21 വര്‍ഷമായി രാജ്യസഭാംഗമാണ്. കെ.പി.സി.സി പ്രസിഡന്റായിരുന്ന തെന്നല ബാലകൃഷ്ണപിള്ള 12 കൊല്ലവും മുതിര്‍ന്ന നേതാവായിരുന്ന കെ.കരുണാകരന്‍ പത്ത് വര്‍ഷവും രാജ്യസഭയില്‍ പ്രവര്‍ത്തിച്ചു. ഇക്കാലയളവില്‍ യുവാക്കള്‍ക്ക് അവസരം ലഭിച്ചിരുന്നില്ല. തലേക്കുന്നില്‍ ബഷീറും സി.ഹരിദാസും യുവാക്കളായിരുന്ന കാലത്ത് രാജ്യസഭയിലേക്ക് തെരഞ്ഞെടുക്കപ്പെട്ടിട്ടുണ്ട്. പുതിയ ഒഴിവിലേക്ക് യൂത്ത്‌കോണ്‍ഗ്രസ് നേതാക്കളെയോ, വനിതകളെയോ പരിഗണിക്കണമെന്നാണ് ആവശ്യം. ബിന്ദു കൃഷ്ണ അടക്കമുള്ളവരുടെ പേരുകള്‍ ചര്‍ച്ചയിലുണ്ട്. കേരളത്തിലെ മുതിര്‍ന്ന നേതാക്കള്‍ ഇതിന് സമ്മതിക്കുമോ എന്ന് ഉറപ്പില്ല.

അനുഭവപരിചയവും മികവുമാണ് രാജ്യസഭയിലേക്ക് തെരഞ്ഞെടുക്കപ്പെടുന്നതിന് പാര്‍ട്ടി പ്രഥമ പരിഗണന നല്‍കുന്നതെന്ന് മുതിര്‍ന്ന നേതാക്കള്‍ പറയുന്നു. പി.ജെ കുര്യനും എ.കെ ആന്റണിയും രാജ്യസഭയില്‍ പാര്‍ട്ടിയുടെ കരുത്താണ്. പ്രധാനപ്പെട്ട സംഭവങ്ങളും മറ്റും ഉണ്ടാകുമ്പോള്‍ ചര്‍ച്ചനടത്താനും പാര്‍ട്ടിനിലപാടുകള്‍ക്ക് അനുസരിച്ച് പ്രവര്‍ത്തിക്കാനും മുതിര്‍ന്ന നേതാക്കള്‍ക്കേ കഴിയു എന്നും ഇവര്‍ ചൂണ്ടിക്കാട്ടുന്നു.