കേരളത്തിന്റെ മലയോര മേഖലയെ സാരമായി ബാധിച്ചുകൊണ്ട് ദേശീയ ഹരിത ട്രൈബ്യൂണലിന്റെ ഉത്തരവ്. പശ്ചിമഘട്ട സംരക്ഷണവുമായി ബന്ധപ്പെട്ട കേസില്‍ 2013 നവംബര്‍ 13ലെ ഉത്തരവ് അതേപടി നിലനിര്‍ത്താനാണ് ദേശീയ ഹരിത ട്രൈബ്യൂണല്‍ കേന്ദ്ര വനംപരിസ്ഥിതി മന്ത്രാലയത്തോട് നിര്‍ദ്ദേശിച്ചത്. ഇതോടെ കേരളത്തിലെ 123 വില്ലേജുകള്‍ പരിസ്ഥിതി ലോലമായി പ്രഖ്യാപിച്ചത് തുടരും. അന്തിമവിജ്ഞാപനം വരുന്നത് വരെ ഇന്നത്തെ ഉത്തരവിന് സാധുതയുണ്ടാവുമെന്നും ജസ്റ്റീസ് സ്വതന്ത്രര്‍ കുമാര്‍ അദ്ധ്യക്ഷനായ ബെഞ്ച് പറഞ്ഞു. ഏഴു സംസ്ഥാനങ്ങളിലായി 4156 വില്ലേജുകളാണ് പരിസ്ഥിതി ലോല പ്രദേശമായി നവംബര്‍ 13ലെ വിജ്ഞാപനത്തില്‍ ഉള്‍പ്പെടുത്തിയിരുന്നത്.

പശ്ചിമഘട്ട സംരക്ഷണത്തിന് മാധവ് ഗാഡ്ഗില്‍ റിപ്പോര്‍ട്ട് നടപ്പാക്കണമെന്ന് ആവശ്യപ്പെട്ട് ഗോവ ഫൗണ്ടേഷന്‍ നല്‍കിയ ഹര്‍ജിയിലാണ് ഏറെ രാഷ്ട്രീയ പ്രത്യാഘാതങ്ങള്‍ക്ക് ഇടയാക്കിയേക്കാവുന്ന വിധി ട്രൈബ്യൂണല്‍ പുറപ്പെടുവിച്ചത്. നവംബര്‍ 13ലെ കരടില്‍ ഏതെങ്കിലും തരത്തിലുള്ള മാറ്റങ്ങളോ തിരുത്തലുകളോ വരുത്തി പുതിയ നിര്‍മാണ പ്രവര്‍ത്തനങ്ങള്‍ക്ക് അനുമതി നല്‍കരുത്. ഇപ്പോള്‍ നിര്‍മാണ പ്രവര്‍ത്തനങ്ങള്‍ നടക്കുകയാണെങ്കില്‍ അത് നിര്‍ത്തിവയ്ക്കണം. പശ്ചിമഘട്ട മേഖലയില്‍ ഖനികള്‍, ക്വാറികള്‍, മണല്‍വാരല്‍, താപനിലയങ്ങള്‍, ടൗണ്‍ഷിപ്പുകള്‍, വന്‍കിട സ്ഥാപനങ്ങള്‍ എന്നിവ പാടില്ല. കേരളത്തില്‍ 123 പരിസ്ഥിതി ദുര്‍ബല വില്ലേജുകളിലാണ് ഖനനം, പാറഖനനം, മണല്‍ഖനനം താപോര്‍ജനിലയങ്ങള്‍ 20000 ചതുരശ്രമീറ്ററും അതിലേറെയും വിസ്താരമുളള കെട്ടിടങ്ങളോ നിര്‍മാണ പ്രവര്‍ത്തനങ്ങളോ 50 ഹെക്ടറും അതിലേറെയും 15000 ചതുരശ്രമീറ്ററും അതിലേറെയും നിര്‍മാണ വിസ്താരമുള്ള ടൗണ്‍ഷിപ്പുകളും വികസന പദ്ധതികളും റെഡ് കാറ്റഗറി വ്യവസായങ്ങള്‍ എന്നിവ നവംബര്‍ 13ലെ വിജ്ഞാപന പ്രകാരം നിരോധിച്ചത്. 
ഇടുക്കിയില്‍ 47 വില്ലേജുകള്‍ പരിസ്ഥിതി ലോലമായി. ഉടുമ്പഞ്ചോല,ദേവികുളം താലൂക്കിലെ മുഴുവന്‍ വിലേജുകളും പരിസ്ഥിതിലോലമായി പ്രഖ്യാപിക്കപ്പെട്ടു. ആകാശവീക്ഷണത്തിലൂടെ (റിമോട്ട് സെന്‍സറിംഗ്)ആയിരുന്നു പരിസ്ഥിതി ദുര്‍ബല പ്രദേശങ്ങള്‍ കണ്ടെത്തിയത്. റബര്‍ തോട്ടങ്ങളും മറ്റും കാടായി വ്യാഖ്യാനിക്കപ്പെട്ടു. വാഗമണ്‍ അടക്കം അതീവ പരിസ്ഥിതി ദുര്‍ബല പ്രദേശമായ പ്രദേശങ്ങള്‍ ഒഴിവാക്കപ്പെട്ടതും പാറമടകള്‍ക്ക് പരിരക്ഷ ലഭിച്ചത് ഏറെ വിവാദമായിരുന്നു. 
ട്രൈബ്യൂണലിന്റെ ഉത്തരവോടെ പഴയ സ്ഥിതിയിലേക്കാണ് കാര്യങ്ങള്‍ പോകുന്നു. നവംബര്‍ 13ലെ ഉത്തരവിനെതിരെ കേരളത്തില്‍ ഹൈറേഞ്ച് സംരക്ഷണ സമിതിയുടെ നേതൃത്വത്തില്‍ കടുത്ത പ്രതിഷേധം ഉയര്‍ന്നിരുന്നതാണ്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha