ഒരു കുടുംബത്തില്‍ പതിനൊന്നുപേരെ തൂങ്ങിമരിച്ച നിലയില്‍ കണ്ടെത്തി. ദില്ലിയിലെ ബുറാരിയിലാണ് നാടിനെ നടുക്കിയ സംഭവമുണ്ടായിരിക്കുന്നത്. അതിരാവിലെയാണ് അയല്‍വാസികള്‍ പോലീസിനെ വിവരമറിയിക്കുകയായിരുന്നു. ബുറാരിയിലെ വീട്ടില്‍ 11 മൃതദേഹങ്ങളാണ് തൂങ്ങിക്കിടക്കുന്നത്. ഏഴ് സ്ത്രീകളുടെയും നാല് പുരുഷന്‍മാരുടെയുമാണ മൃതദേഹങ്ങള്‍. ഇവരുടെ കണ്ണും വായയും തുണികൊണ്ട് വരിഞ്ഞുകെട്ടിയ നിലയിലായിരുന്നു. നിലവില്‍ ജനങ്ങള്‍ കൂട്ടമായി സ്ഥലത്തെത്തുന്നതിനെ തുടര്‍ന്ന് പോലീസ് മേഖല വളഞ്ഞിരിക്കുകയാണ്.

അയല്‍പക്കത്ത് താമസിക്കുന്നവരെ പോലീസ് ചോദ്യം ചെയ്തുവരികയാണ്. ഒരു കുടുംബത്തില്‍പ്പെട്ടവരാണ് 11 പേരുമെന്നാണ് വിവരങ്ങള്‍. ഇവരുടെ കുടുംബങ്ങളെ പോലീസ് വിളിപ്പിച്ചു. ദൂരത്തുള്ള കുടുംബാംഗങ്ങളെയും വിളിച്ചുവരുത്തി കുടുംബവുമായി ബന്ധപ്പെട്ട വിവരങ്ങള്‍ ശേഖരിക്കുകയാണ്.

പ്രദേശത്ത് വന്‍ പോലീസ് സംഘമത്തിയിട്ടുണ്ട്. ആരെയും പോകാന്‍ അനുവദിക്കുന്നില്ല. സംശയമുള്ള ഓരോരുത്തരെയും ചോദ്യം ചെയ്യുന്നുണ്ട്. എന്താണ് ഇത്രയും പേര്‍ ഒരുമിച്ച് മരിക്കാന്‍ കാരണമെന്ന ചോദ്യമാണ് കുഴക്കുന്നത്. കുടുംബത്തിന് സാമ്പത്തിക ബാധ്യതയുണ്ടായിരുന്നോ എന്ന കാര്യവും പോലീസ് അന്വേഷിക്കുന്നുണ്ട്.

ഗുരു ഗോവിന്ദ് സിങ് ആശുപത്രിക്ക് എതിര്‍വശമുള്ള വീട്ടിലാണ് മൃതദേഹങ്ങള്‍ കണ്ടെത്തിയത്. ഈ കുടുംബത്തിന് ഗുരുദ്വാരക്കടുത്ത് ഒരു പലചരക്ക് കടയുണ്ട്. മറ്റു ചില വ്യാപാര സ്ഥാപനങ്ങളുമുണ്ടെന്ന് പോലീസിന് വിവരം ലഭിച്ചു. ആത്മഹത്യാ കുറിപ്പൊന്നും വീട്ടില്‍ കണ്ടെത്തിയില്ല. ഇതാണ് കൂടുതല്‍ ദുരൂഹതയ്ക്ക് ഇടയാക്കുന്നത്.

സാധാരണ ഇവരുടെ പലചരക്ക് കട രാവിലെ ആറ് മണിക്ക് തുറക്കാറുണ്ട്. എന്നാല്‍ 7.30 ആയിട്ടും കട തുറന്നില്ല. ഇതേ തുടര്‍ന്ന് സംശയം തോന്നിയവര്‍ വീട്ടിലേക്ക് അന്വേഷിച്ച് ചെല്ലുകയായിരുന്നു. അപ്പോഴാണ് തൂങ്ങി കിടക്കുന്ന മൃതദേഹങ്ങള്‍ കണ്ടത്. ഉടന്‍ പോലീസില്‍ അറിയിക്കുകയായിരുന്നു.

മൃതദേഹങ്ങള്‍ പോസ്റ്റ്‌മോര്‍ട്ടം നടത്താന്‍ ഗുരു ഗോവിന്ദ് സിങ് ആശുപത്രിയിലേക്ക് മാറ്റി. അന്വേഷണം തുടരുന്നുണ്ടെന്ന് പോലീസ് പറഞ്ഞു. പത്ത് മൃതദേഹങ്ങളാണ് തൂങ്ങി കിടന്നിരുന്നതെന്നും ഒരു മൃതദേഹം നിലത്താണുണ്ടായിരുന്നതെന്നും വാര്‍ത്താ ഏജന്‍സിയായ എഎന്‍ഐ റിപ്പോര്‍ട്ട് ചെയ്തു. മരിച്ചവരില്‍ 75 വയസുകാരനും രണ്ട് കുട്ടികളും ഉള്‍പ്പെടും.

പലചരക്ക് കടയ്ക്ക് പുറമെ ഒരു പ്ലേവുഡ് കടയും ഇവര്‍ക്കുണ്ട്. ബുറാരിയിലെ സാന്റ് നഗറിലെ രണ്ടുനില വീട്ടിലാണ് കുടുംബം താമസിക്കുന്നത്. പ്രദേശത്തെ സിസിടിവികള്‍ പോലീസ് പരിശോധിച്ച് വരികയാണ്. ആത്മഹത്യ ചെയ്തതാണെന്നാണ് പോലീസിന്റെ നിഗമനം. എന്നാല്‍ മറ്റു സാധ്യതകളും തള്ളുന്നില്ല. വിശദമായ അന്വേഷണത്തിന് ശേഷമേ കൂടുതല്‍ പറയാന്‍ സാധിക്കൂവെന്ന് പോലീസ് പ്രതികരിച്ചു.