രണ്ട് അമേരിക്കന്‍ ഇന്ത്യക്കാര്‍ തിരുപ്പതി വെങ്കടേശ്വര ക്ഷേത്രത്തിനു കാണിക്കയായി നല്‍കിയത് 13.5 കോടി രൂപ. ആന്ധ്രാപ്രദേശ് സ്വദേശികളായ ഇക രവി, ഗുതികോണ്ഡ ശ്രീനിവാസ് എന്നിവരാണു ഈ തുക നല്‍കിയത്.
ബോസ്റ്റണിലെ ആര്‍.എക്‌സ്. അഡ്വാന്‍സ് എന്ന മരുന്നുകമ്പനിയുടെ സ്ഥാപകനും സി.ഇ.ഒ.യുമായ രവി നല്‍കിയത് 10 കോടി രൂപയാണ്. ഫ്‌ലോറിഡയിലെ സോഫ്റ്റ്‌വേര്‍ ഡെവലപ്‌മെന്റ് ആന്‍ഡ് കണ്‍സള്‍ട്ടിങ് സ്ഥാപനമായ ജെ.സി.ജി. ടെക്‌നോളജീസിന്റെ സി.ഇ.ഒ.യായ ശ്രീനിവാസ് മൂന്നരക്കോടി നല്‍കി. തിരുമല തിരുപ്പതി ദേവസ്ഥാനത്തിന്റെ (ടി.ടി.ഡി.) അധികൃതര്‍ക്ക് ആന്ധ്രാപ്രദേശ് വ്യവസായമന്ത്രി അമര്‍നാഥ് റെഡ്ഡിയുടെ സാന്നിധ്യത്തില്‍ ഇരുവരും ചെക്കുകള്‍ കൈമാറി.
ഒമ്പതുദിവസം നടതുറക്കില്ല
തിരുപ്പതി വെങ്കടേശ്വര ക്ഷേത്രം ഓഗസ്റ്റ് ഒമ്പതുമുതല്‍ 17 വരെ ഒമ്പതുദിവസത്തേക്ക് അടച്ചിടുന്നു. 12 വര്‍ഷംതോറും ശ്രീകോവിലില്‍ നടക്കേണ്ട പ്രധാന പ്രതിഷ്ഠ ഉറപ്പിക്കുന്ന ജോലിയുടെയും പൂജയുടെയും ഭാഗമായിട്ടാണിത്. ഈ ദിവസങ്ങളില്‍ ഭക്തര്‍ക്ക് ദര്‍ശനം അനുവദിക്കില്ല. എന്നാല്‍, തിരുപ്പതിയിലെത്തുന്ന ഭക്തര്‍ക്ക് അവിടെ താമസിക്കാവുന്നതാണെന്ന് അധികൃതര്‍ വ്യക്തമാക്കി.തുക ടി.ടി.ഡി. നടത്തുന്ന പൊതുക്ഷേമ പരിപാടികള്‍ക്കും അന്നദാനത്തിനും ആശുപത്രിക്കും കുട്ടികളുടെ അനാഥാലയത്തിനുമായി ചെലവഴിക്കണമെന്ന് ശ്രീനിവാസ് ആവശ്യപ്പെട്ടിട്ടുണ്ട്.
2018-19 വര്‍ഷം ക്ഷേത്രത്തിന്റെ വരുമാനം 2,894 കോടി രൂപയാവുമെന്നാണ് കരുതുന്നത്. അതില്‍ കാണിക്കയായി ലഭിക്കുന്നതുമാത്രം 1,156 കോടിയാവുമെന്നും ടി.ടി.ഡി. കണക്കുകൂട്ടുന്നു.