കേരളത്തിന് ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സ് (എയിംസ്) അനുവദിച്ചിട്ടില്ലെന്ന് കേന്ദ്രസര്‍ക്കാര്‍. ആരോഗ്യ മന്ത്രി ജെ.പി നഡ്ഢ ലോക്‌സഭയില്‍ അറിയിച്ചതാണ് ഇക്കാര്യം. ശശി തരൂര്‍ എം.പിയുടെ ചോദ്യത്തിന് മറുപടിയായാണ് നഡ്ഢ ഇക്കാര്യം അറിയിച്ചത്. ജൂണില്‍ സംസ്ഥാന ആരോഗ്യമന്ത്രിയുമായി നടത്തിയ കൂടിക്കാഴ്ചയിലും ആരോഗ്യ മന്ത്രി ജെ.പി നഢ്ഡ എയിംസിനെ സംബന്ധിച്ച് ഉറപ്പു നല്‍കിയിരുന്നു. എയിംസിനായി കിനാലൂരില്‍ ഇരുനൂറ് ഏക്കര്‍ സ്ഥലം കണ്ടെത്തിയത് സംസ്ഥാനം കേന്ദ്രത്തെ അറിയിച്ചിരുന്നു.
തിരുവനന്തപുരത്ത് അനുവദിച്ച എയിംസിനെക്കുറിച്ചുള്ള ചോദ്യമാണ് ശശി തരൂര്‍ ചോദിച്ചത്. എന്നാല്‍ കേരളത്തിന് ഒരിക്കലും എയിംസ് അനുവദിച്ചിട്ടില്ലെന്ന മറുപടിയാണ് കേന്ദ്ര ആരോഗ്യമന്ത്രി നല്‍കിയത്. എയിംസിന്റെ കാര്യത്തില്‍ യാതൊരു നിര്‍ദ്ദേശമോ ഉറപ്പോ രേഖാമൂലം നല്‍കിയിട്ടില്ലെന്ന് മന്ത്രി രേഖാമൂലം നല്‍കിയ മറുപടിയില്‍ വ്യക്തമാക്കി. എയിംസിന്റെ കാര്യത്തില്‍ മുന്‍ നിലപാടില്‍ നിന്ന് വ്യത്യസ്തമാണ് കേന്ദ്രസര്‍ക്കാര്‍ നല്‍കിയ മറുപടി.