കേന്ദ്രീയവിദ്യാലയങ്ങളിലെ ഈശ്വര പ്രാര്ത്ഥന നിര്ത്തലാക്കണമെന്ന് ആവശ്യപ്പെടുന്ന ഹര്ജി സുപ്രീംകോടതിയുടെ ഭരണഘടനാബെഞ്ചിലേക്ക്
കേന്ദ്രീയവിദ്യാലയങ്ങളിലെ ഈശ്വര പ്രാര്ഥന നിര്ത്തലാക്കണമെന്ന് ആവശ്യപ്പെടുന്ന ഹര്ജി സുപ്രീംകോടതിയുടെ ഭരണഘടനാബെഞ്ചിലേക്ക്. സര്ക്കാര് നടത്തുന്ന വിദ്യാഭ്യാസസ്ഥാപനങ്ങള് ഏതെങ്കിലും ഒരു മതത്തിന് പ്രചാരം കൊടുക്കുന്നത് ശരിയല്ലെന്ന് ചൂണ്ടിക്കാട്ടി മധ്യപ്രദേശിലെ അഡ്വ. വിനായക് ഷായാണ് ഹര്ജി നല്കിയത്.
വിഷയം ഭരണഘടനാബെഞ്ചിന് വിടുന്നതിനായി ജസ്റ്റിസുമാരായ ആര്.എഫ്. നരിമാന്, വിനീത് സരണ് എന്നിവരുടെ ബെഞ്ച് ചീഫ് ജസ്റ്റിസിന്റെ പരിഗണനയ്ക്കയച്ചു. രാജ്യത്തെ 1,125 കേന്ദ്രീയവിദ്യാലയങ്ങളില് പഠിക്കുന്ന വിവിധ മതവിശ്വാസികളായ കുട്ടികളെല്ലാം 'അസതോമാ സദ്ഗമയാ...' എന്നു തുടങ്ങുന്ന പ്രാര്ഥനാഗാനം ആലപിക്കേണ്ടിവരുന്നതായി ഹര്ജിയില് ചൂണ്ടിക്കാട്ടി. സര്ക്കാര് പണം മുടക്കുന്ന സ്കൂളുകളിലോ മറ്റു വിദ്യാഭ്യാസസ്ഥാപനങ്ങളിലോ ഏതെങ്കിലുമൊരു മതത്തിനു പ്രചാരം നല്കുന്നത് ശരിയല്ല. ഒരു തരത്തിലുള്ള പ്രാര്ഥനകളും ആവശ്യമില്ല.
വിദ്യാര്ഥികളില് ശാസ്ത്ര പഠനാഭിരുചി വളര്ത്തുന്നതിന് പ്രാര്ഥനകള് തടസ്സം നില്ക്കുന്നു. പ്രതിബന്ധങ്ങള് തരണം ചെയ്യാന് പ്രായോഗികമാര്ഗങ്ങള് തേടുന്നതിനുപകരം ദൈവത്തില് അഭയംതേടാനാകും വിദ്യാര്ഥികള് ശ്രമിക്കുകയെന്നും ഹര്ജിയില് പറയുന്നു. സര്ക്കാര് ഫണ്ട് ഉപയോഗിക്കുന്ന വിദ്യാഭ്യാസസ്ഥാപനങ്ങളില് മതപരമായ നിര്ദേശങ്ങള് പാടില്ലെന്ന് ഭരണഘടനയുടെ 28(1) വകുപ്പ് വ്യക്തമാക്കുന്നു. കേന്ദ്രീയവിദ്യാലയങ്ങളിലെ പ്രാര്ഥന സൂക്ഷ്മമായി പഠിച്ചാല് ഹിന്ദുമതത്തെ അടിസ്ഥാനപ്പെടുത്തിയുള്ളതാണെന്ന് വ്യക്തമാകും. രാജ്യവ്യാപകമായി വിദ്യാര്ഥികള്ക്കും അധ്യാപകര്ക്കുമിടയില് ഈ പ്രാര്ഥന അടിച്ചേല്പ്പിക്കാന് സര്ക്കാരിന് സാധിക്കുമോ എന്നതാണ് വിഷയം. അതിനാല് കേന്ദ്രീയ വിദ്യാലയങ്ങളിലെ അസംബ്ലിയില് ഒരു തരത്തിലുള്ള പ്രാര്ഥനയും വേണ്ടെന്ന് നിര്ദേശിക്കണം. വിദ്യാര്ഥികളില് ശാസ്ത്രീയമായ പഠനരീതി പ്രോത്സാഹിപ്പിക്കണം. കേന്ദ്ര മാനവശേഷിമന്ത്രാലയത്തിന് കീഴിലാണ് 50 വര്ഷത്തിലേറെയായി കേന്ദ്രീയ വിദ്യാലയങ്ങള് പ്രവര്ത്തിക്കുന്നത്. ലോകത്തെതന്നെ ഏറ്റവും വലിയ സ്കൂള് ശൃംഖലയുമാണിത്. കേന്ദ്രീയവിദ്യാലയങ്ങളിലെല്ലാം ഒരേ പാഠ്യരീതിയും സിലബസുമാണ് പിന്തുടരുന്നത്. ഭരണഘടന പൗരന്മാര്ക്ക് അഭിപ്രായസ്വാതന്ത്ര്യം ഉറപ്പുനല്കിയിരിക്കെ, ഏതെങ്കിലും മതത്തിന്റെ പ്രാര്ഥനാഗാനം അടിച്ചേല്പ്പിക്കരുതെന്നും ഹര്ജിയില് ആവശ്യപ്പെട്ടു.
https://www.facebook.com/Malayalivartha
