ഇന്ത്യയിലെ ആദ്യ വോട്ടര്‍ ഇപ്പോഴും ജീവിച്ചിരിപ്പുണ്ട്. ഹിമാചല്‍ പ്രദേശിലെ വോട്ടറാണ് അദ്ദേഹം. ഇന്ത്യയുടെ വോട്ടുകഥ തുടങ്ങുന്നത് ശ്യാം സരണ്‍ നെഗി എന്ന ഇദ്ദേഹത്തിന്റെ വോട്ടോടെയാണ്.

ശ്യാം സരണ്‍ നെഗിക്ക് പ്രായം 102 കഴിഞ്ഞു.1951 ഒക്ടോബറില്‍ നെഗിയാണ് ഇന്ത്യയിലെ വോട്ടെടുപ്പ് ഉല്‍ഘാടനം ചെയ്തത് എന്ന് തന്നെ പറയാം. ഹിമാചലിലെ കല്‍പയാണ് സ്വദേശം. ഇന്ത്യയുടെ ആദ്യ തിരഞ്ഞെടുപ്പിലെ ആദ്യ വോട്ട് ഇവിടെയാകാന്‍ കാരണമുണ്ട്.

മഞ്ഞുകാലമായിക്കഴിഞ്ഞാല്‍ പിന്നെ ഇവിടെ ജനജീവിതം സ്തംഭിക്കും. പുറംനാടുമായി ബന്ധവും മുറിയും. രാജ്യത്തിന്റെ മറ്റു ഭാഗങ്ങളെ അപേക്ഷിച്ച് വോട്ടെടുപ്പ് അങ്ങനെ അഞ്ചു മാസം നേരത്തേയായി. അങ്ങനെ 1951 ഒക്ടോബര്‍ 25-ന് ശ്യാം സരണ്‍ നെഗി ആദ്യ വോട്ട് രേഖപ്പെടുത്തി. പഴയ സ്‌കൂള്‍ അധ്യാപകനാണ് ഇദ്ദേഹം.

2017-ലെ സംസ്ഥാന തിരഞ്ഞെടുപ്പില്‍ വോട്ടു ചെയ്യാന്‍ എത്തിയപ്പോള്‍ തിരഞ്ഞെടുപ്പു കമ്മിഷനും നാട്ടുകാരും ചേര്‍ന്ന് വന്‍ സ്വീകരണമാണ് ആദ്യ വോട്ടര്‍ക്ക് നല്‍കിയത്. അനാരോഗ്യം തടസ്സമായില്ലെങ്കില്‍ ഇത്തവണയും നെഗിയെ പോളിങ് ബൂത്തില്‍ പ്രതീക്ഷിക്കാം.