പശു ചത്താല് പോസ്റ്റ്മോര്ട്ടം നടത്തണമെന്ന വിചിത്രമായ ഉത്തരവുമായി ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് രംഗത്തെത്തി, അസ്വഭാവികത തോന്നിയാല് പോസ്റ്റ്മോര്ട്ടം നടത്തി കാരണം കണ്ടുപിടിക്കാമെന്നും നടപടികള് സ്വീകരിക്കാമെന്നും ഉത്തരവില് പറയുന്നു
പശു ചത്താല് പോസ്റ്റ്മോര്ട്ടം നടത്തണമെന്ന വിചിത്രമായ ഉത്തരവുമായി ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് രംഗത്തെത്തി. അസ്വഭാവികത തോന്നിയാല് പോസ്റ്റ്മോര്ട്ടം നടത്തി കാരണം കണ്ടുപിടിക്കാമെന്നും നടപടികള് സ്വീകരിക്കാമെന്നും ഉത്തരവില് പറയുന്നു. ഇതുസംബന്ധിച്ച സര്ക്കുലര് മൃഗക്ഷേമവകുപ്പ്, ജില്ലാ ഭരണകൂടത്തിനും ഉദ്യോഗസ്ഥര്ക്കും അയച്ചു. അതേസമയം തെരഞ്ഞെടുപ്പ് മുന്നില് കണ്ടുള്ള നീക്കമാണിതെന്ന് കോണ്ഗ്രസും ബി.എസ്.പിയും എസ്.പിയും ആരോപിച്ചു. സംസ്ഥാനത്ത് മുന്നേറ്റമുണ്ടാക്കാന് കോണ്ഗ്രസ് പ്രിയങ്കാ ഗാന്ധിയെ എ.ഐ.സി.സി ജനറല് സെക്രട്ടറിയാക്കിയ ശേഷം ചുമതല നല്കിയതോടെ ബി.ജെ.പി ആശങ്കയിലാണ്. പരമ്പരാഗത കോണ്ഗ്രസ് വോട്ടുകള് തിരികെ പിടിച്ചാല് അത് ബി.ജെ.പിക്ക് വലിയ തിരിച്ചടിയാകും.
പശുക്കള് കൊല്ലപ്പെടുന്ന സാഹചര്യത്തില് സംരക്ഷണ കേന്ദ്രങ്ങള് പണിയാനായി മുനിസിപ്പല് കോര്പ്പറേഷനുകള്ക്ക് യോഗി സര്ക്കാര് കോടികള് അനുവദിച്ചതിന് പിന്നാലെ പോസ്റ്റുമോര്ട്ടം എന്ന പുതിയ പദ്ധതി മുന്നോട്ട് വെച്ചത്. പശുക്കളെ ആരെങ്കിലും കൊല്ലുകയോ സ്വാഭാവികമായി ചാവുകയോ ചെയ്താല് റിപ്പോര്ട്ട് സര്ക്കാരിന് നല്കണം. ചത്തത് സ്വാഭാവികമാണെങ്കില് അതത് പ്രദേശത്തുള്ളവരെ അറിയിക്കണം. ഇത്തരത്തിലുള്ള നിര്ദ്ദേശങ്ങളടങ്ങിയ പട്ടികയും സര്ക്കാര് പുറത്തിറക്കിയിട്ടുണ്ട്. അലഞ്ഞ് തിരിഞ്ഞ് നടക്കുന്ന പശുക്കളെ ഉപയോഗശൂന്യമായ സര്ക്കാര് കെട്ടിടങ്ങളില് പാര്പ്പിക്കണം. അവയ്ക്കെല്ലാം ബാര്കോഡ് ഏര്പ്പെടുത്തണം. കാലീത്തീറ്റ അടക്കമുള്ള സംവിധാനവും ഒരുക്കണം. തുടങ്ങിയ നിര്ദ്ദേശങ്ങള്ക്ക് പിന്നാലെയാണ് പുതിയ ഉത്തരവ്.
അസ്വഭാവികമായി പശുക്കളെ ചത്തനിലയില് കണ്ടെത്തുകയോ, ആര്ക്കെങ്കിലും സംശയമോ, പരാതിയോ, ആരോപണമോ ഉണ്ടെങ്കില് ഉടന് പോസ്റ്റ്മോര്ട്ടം നടത്തണം എന്നീ കാര്യങ്ങള് ഉത്തരവില് പറയുന്നു. അലഞ്ഞ്തിരിഞ്ഞ് നടക്കുന്ന പശുക്കള് വിളകള് നശിപ്പിച്ചാല് കര്ഷകര് ആക്രമിക്കുന്ന സംഭവങ്ങള് സംസ്ഥാനത്ത് വര്ദ്ധിച്ചുവരുകയാണ്. അതിന്റെ പശ്ചാത്തലത്തിലാണ് പുതിയ നീക്കമെന്ന് അറിയുന്നു. ചത്ത പശുക്കളെ ദഹിപ്പിക്കണമെന്നും അതിന്റെ ചെലവുകള് സര്ക്കാര് വകുപ്പുകള് വഹിക്കണമെന്നും ഉത്തരവില് വ്യക്തമാക്കുന്നു. അതനായുളള ഫണ്ട് സന്നദ്ധസംഘടനകളില് നിന്നും മത സ്ഥാപനങ്ങളില് നിന്നും ശേഖരിക്കണമെന്നും പറയുന്നു. സംസ്ഥാനത്തുടനീളം അലഞ്ഞ്തിരിഞ്ഞ് നടക്കുന്ന പശുക്കളുടെ സെന്സസ് പൂര്ത്തിയായി വരുന്നതായി ഉദ്യോഗസ്ഥര് പറയുന്നു.
പ്രത്യേക കേന്ദ്രങ്ങളില് പാര്പ്പിക്കുന്ന പശുക്കള്ക്ക് സമയത്തിന് ആഹാരം നല്കണം. അതില് 90 ശതമാനം കാലിത്തീറ്റയും 10 ശതമാനം വെജിറ്റബിള്സും ഫൈബറും അടങ്ങിയ ഭക്ഷണമായിരിക്കണം. പശുക്കള് തമ്മിലടിക്കാതിരിക്കാന് ഒരേ പ്രായത്തിലുള്ളവയെ ചെറു സംഘങ്ങളാക്കി പാര്പ്പിക്കണം. തുടങ്ങിയ കാര്യങ്ങളും റിപ്പോര്ട്ടില് പറയുന്നു. എന്നാല് ബുലന്ദ്ഷഹറില് പശുവിന്റെ മൃതദേഹാവശിഷ്ടം കണ്ടെത്തിയതിനെ തുടര്ന്ന് പലയിടങ്ങളിലും ഉണ്ടായ സംഘര്ഷങ്ങള് കെട്ടടങ്ങാത്ത സാഹചര്യത്തിലാണ് പുതിയ നിര്ദേശമെന്നാണ് സര്ക്കാര് വൃത്തങ്ങള് അറിയിച്ചു. പശുക്കള്ക്ക് സംരക്ഷണം ഉറപ്പാക്കാന് മദ്യത്തിന് പ്രത്യേക നികുതിയും ഏര്പ്പെടുത്തിരുന്നു.
https://www.facebook.com/Malayalivartha
