ആന്ധ്രാ മുഖ്യമന്ത്രി ജഗ്ഗന്‍മോഹന്‍ റെഡ്ഡി പണിതുടങ്ങി... മുന്‍ മുഖ്യമന്ത്രി ചന്ദ്രബാബു നായിഡു കോടികള്‍ ചെലവിട്ട് നിര്‍മിച്ച ഓഫീസ് പൊളിക്കാന്‍ ജഗ്ഗന്‍ ഉത്തരവിട്ടു. ഏകദേശം എട്ട് കോടിയോളം രൂപ മുടക്കിയാണ് ഈ കെട്ടിടം നിര്‍മിച്ചത്. അമരാവതിയിലെ ഔദ്യോഗിക വസതിയോട് ചേര്‍ന്ന് മറ്റൊരു കെട്ടിടം കഴിഞ്ഞ സര്‍ക്കാരിന്റെ കാലത്ത് പണിതിരുന്നു. അവിടെ ജില്ലാ കളക്ടര്‍മാരുടെ യോഗം വിളിച്ച ജഗ്ഗന്‍ ഇത് ഈ കെട്ടിടത്തിലെ അവസാനത്തെ യോഗമായിരിക്കുമെന്ന് അറിയിക്കുകയായിരുന്നു. ടി.ഡി.പി ഇതിനെതിരെ രംഗത്ത് വന്നിട്ടുണ്ട്. നരേന്ദ്രമോദിയോടൊപ്പം ചേര്‍ന്ന് ജഗ്ഗന്‍ പ്രതികാര രാഷ്ട്രീയം കളിക്കുകയാണെന്നാണ് പ്രധാന ആക്ഷേപം. അനധികൃത സ്വത്ത് സമ്പാദന കേസില്‍ ജഗ്ഗന്‍ ജയിലില്‍ കിടന്നപ്പോള്‍ ചന്ദ്രബാബു നായിഡു ഇതുപോലുള്ള നാടകങ്ങള്‍ കളിച്ചിരുന്നു. 

നിയമസഭാ തെരഞ്ഞെടുപ്പിലെ കനത്ത പരാജയത്തിന് ശേഷം പ്രതിപക്ഷ നേതാവിനായി പ്രസ്തുത കെട്ടിടം അനുവദിക്കണമെന്ന്് ചന്ദ്രബാബു നായിഡു മുഖ്യമന്ത്രിക്ക് കത്തയച്ചിരുന്നു. ആരുമായും സഖ്യമില്ലാതെയാണ് ജഗ്ഗന്റെ വൈ.എസ്.ആര്‍ കോണ്‍ഗ്രസ് അധികാരത്തിലെത്തിയത്. അതിന് ശേഷം ജഗ്ഗന്‍ പ്രധാനമന്ത്രി നരേന്ദ്രമോദിയെ സന്ദര്‍ശിച്ചിരുന്നു. പാര്‍ലമെന്റിലെ ഡെപ്യൂട്ടി സ്പീക്കര്‍ പദവി വൈ.എസ്.ആര്‍ കോണ്‍ഗ്രസിന് ബി.ജെ.പി വാഗ്ദാനം ചെയ്‌തെങ്കിലും ജഗ്ഗന്‍ സ്വീകരിച്ചില്ലെന്ന് വാര്‍ത്തകളുണ്ടായിരുന്നു. ജഗ്ഗന്റെ പിതാവ് വൈ.എസ്.ആര്‍ മരിച്ച ശേഷം അദ്ദേഹത്തെ മുഖ്യമന്ത്രിയാക്കണമെന്ന് ഭൂരിപക്ഷം എം.എല്‍.എമാരും ഹൈക്കമാന്‍ഡിനോട് ആവശ്യപ്പെട്ടെങ്കിലും കോണ്‍ഗ്രസ് അധ്യക്ഷയായിരുന്ന സോണിയാ ഗാന്ധിയും ജനറല്‍ സെക്രട്ടറി രാഹുല്‍ ഗാന്ധിയും എതിര്‍ത്തു. തുടര്‍ന്നാണ് ജഗ്ഗന്‍ പുതിയ പാര്‍ട്ടി രൂപീകരിച്ചത്. തുടര്‍ന്ന് അന്നത്തെ യു.പി.എ സര്‍ക്കാര്‍ ജഗ്ഗനെതിരെ അനധികൃത സ്വത്ത് സമ്പാദനക്കേസ് അടക്കം നിരവധി കേസുകള്‍ എടുത്തിരുന്നു. ആ കേസിന്റെ രേഖകള്‍ വെച്ച് ബി.ജെ.പി സര്‍ക്കാര്‍ ജഗ്ഗനെ വരുതിയില്‍ നിര്‍ത്തുകയാണെന്ന് ആക്ഷേപമുണ്ട്. 

മോദിക്കൊപ്പം നിന്ന ചന്ദ്രബാബു നായിഡു തെരഞ്ഞെടുപ്പിന് മുമ്പ് സഖ്യം വിട്ട്, മമതാ ബാനര്‍ജി അടക്കമുള്ളവരുമായി ചേര്‍ന്ന് സഖ്യം ഉണ്ടാക്കാന്‍ നോക്കി പരാജയപ്പെട്ടിരുന്നു. മോദിക്കെതിരെ രൂക്ഷവിമര്‍ശനവും നടത്തിയിരുന്നു. നായിഡുവിനോടുള്ള പക വീട്ടാന്‍ ജഗ്ഗനെ കൂട്ടുപിടിച്ച് ബി.ജെ.പി കളിക്കുന്ന നാടകമാണ് ആന്ധ്രയില്‍ നടക്കുന്നതെന്ന് ടി.ഡി.പി ആരോപിക്കുന്നു. ആന്ധ്രയ്ക്ക് പ്രത്യേക പദവി ചന്ദ്രബാബു നായിഡു ആവശ്യപ്പെട്ടെങ്കിലും അനുവദിക്കാതെ നരേന്ദ്രമോദി സര്‍ക്കാര്‍ ഒളിച്ചുകളിക്കുകയായിരുന്നു. തുടര്‍ന്നാണ് എന്‍.ഡി.എ സഖ്യം വിട്ടതെന്ന് ടി.ഡി.പി വ്യക്തമാക്കി. ലോക്‌സഭയില്‍ 22 എം.പിമാരുമായി ഏറ്റവും വലിയ നാലാമത്തെ കക്ഷിയാണ് വൈ.എസ്.ആര്‍ കോണ്‍ഗ്രസ്. അതിനാല്‍ അവര്‍ക്ക് വേണ്ടി എന്ത് ചെയ്യാനും ബി.ജെ.പിയും ബി.ജെ.പിയെ സഹായിക്കാന്‍ വൈ.എസ്.ആര്‍ കോണ്‍ഗ്രസ്സും ഏതറ്റംവരെ പോകുമെന്നും ടി.ഡി.പി ആരോപിക്കുന്നു.

ബി.ജെ.പി മുന്നോട്ട് വെച്ച ഡെപ്യൂട്ടി സ്പീക്കര്‍ സ്ഥാനം വേണ്ടെന്നും ആന്ധ്രയ്ക്ക് പ്രത്യേകപദവി വേണമെന്നും വൈ.എസ്.ആര്‍ കോണ്‍ഗ്രസ് ആവശ്യപ്പെട്ടു. ജഗന്‍മോഹന്‍ റെഡ്ഡിയ്ക്ക് സ്വന്തമായി 375 കോടിയിലധികം രൂപയുടെ ആസ്തിയുണ്ട്. ഇത്രയും ആസ്തി ഉണ്ടായിട്ടും സ്വന്തമായി ഒരു വാഹനം പോലും ഇല്ലാത്തയാളാണ് അദ്ദേഹം. അതില്‍ ദുരൂഹതയുണ്ടെന്ന് ടി.ഡി.പി തെരഞ്ഞെടുപ്പ് പ്രചരണ വേളയില്‍ ആരോപിച്ചിരുന്നു. അതിന്റെയൊക്കെ പ്രതികാരം തീര്‍ക്കുകയാണ് മുഖ്യമന്ത്രി പ്രതിപക്ഷ ബഹുമാനം പോലും കാണിക്കുന്നില്ലെന്നും ടി.ഡി.പി നേതാക്കള്‍ ആരോപിക്കുന്നു. എന്തായാലും കെട്ടിടം പൊളിക്കുമെന്ന ഉറച്ചനിലപാടിലാണ് ജഗ്ഗന്‍ മോഹന്‍ റഡ്ഡി.