അധികാരത്തിന്റെ ധാര്‍ഷ്ട്യം സാധാരണക്കാരില്‍ അഹന്തയായി കാണിക്കുന്ന പല ഉദ്യോഗസ്ഥരെയും നാം കണ്ടിട്ടുണ്ട്. എത്രതന്നെ വാര്‍ത്തകള്‍ വന്നാലും എത്ര തന്നെ പ്രതിഷേധമുയര്‍ന്നാലും അദ്ധ്വാനിച്ചു ജീവിക്കുന്നവരോട് പുച്ഛ ഭാവമാണ് പല ഉദ്യോഗസ്ഥര്‍ക്കും . സമാനമായ കാഴ്ചയാണ് മധ്യപ്രദേശിലെ ഇന്‍ഡോറില്‍ നിന്നും ഇപ്പോള്‍ സോഷ്യല്‍ മീഡിയയില്‍ പ്രചരിക്കുന്നതും..100 രൂപ കൈക്കൂലി കൊടുക്കാന്‍ വിസമ്മതിച്ചതിന് പതിനാലുകാരനായ ബാലന്‍ മുട്ട കച്ചവടം നടത്തുന്ന ഉന്തുവണ്ടി തട്ടി മറിച്ച് സര്‍ക്കാര്‍ ഉദ്യോഗസ്ഥര്‍. മുട്ട വിറ്റു കൊണ്ടിരിക്കുന്ന സ്ഥലത്തുനിന്നും മാറണമെന്നും അതിന് തയ്യാറല്ലെങ്കില്‍ കൈക്കൂലിയായി 100 രൂപ നല്‍കണമെന്നും ഉദ്യോഗസ്ഥര്‍ ആവശ്യപ്പെടുകയായിരുന്നു. എന്നാല്‍ കുട്ടി ഇതിന് തയ്യാറാകാത്തതിനെ തുടര്‍ന്ന് മുട്ടകള്‍ നിറച്ച് ഉന്തുവണ്ടി നടുറോഡിലേക്ക് ഉദ്യോഗസ്ഥര്‍ തള്ളി മറിക്കുകയായിരുന്നു

യാത്രക്കാരില്‍ ഒരാള്‍ പകര്‍ത്തിയ ദൃശ്യങ്ങളിലൂടെയാണ് സംഭവം ഇപ്പോള്‍ വാര്‍ത്തയാകുന്നത്. മുട്ടകള്‍ നശിപ്പിച്ച ഉദ്യോഗസ്ഥരുടെ പ്രവര്‍ത്തിയെ ബാലന്‍ ചോദ്യം ചെയ്യുന്നതായി ദൃശ്യങ്ങളില്‍ കാണാം. തങ്ങള്‍ക്ക് ജീവിക്കുന്നതിന് ആകെയുണ്ടായിരുന്ന വരുമാനമാര്‍ഗമാണ് മുട്ട കച്ചവടം എന്നും വില്പനയ്ക്ക് എടുത്ത മുട്ടകള്‍ പൂര്‍ണമായും നശിച്ചതോടെ ഇനി എന്തു ചെയ്യണമെന്നറിയില്ല എന്നും ബാലന്റെ കുടുംബാംഗങ്ങള്‍ പറയുന്നു

ട്വിറ്ററില്‍ പങ്കുവെച്ച ദൃശ്യങ്ങള്‍ നിരവധി പേരാണ് ഷെയര്‍ ചെയ്തിരിക്കുന്നത്. ബാലന്റെ കുടുംബത്തിന് ആകെയുണ്ടായിരുന്ന ജീവനോപാധി നശിപ്പിച്ചതിന് ഉദ്യോഗസ്ഥര്‍ക്കെതിരെ കടുത്ത പ്രതിഷേധമാണ് സമൂഹ മാധ്യമങ്ങള്‍ പറയുന്നത്.

 "