കോവിഡ് രണ്ടാം തരംഗം രാജ്യത്ത് വ്യാപകമായി വർധിച്ചിരിക്കുകയാണ്. ദിനംപ്രതി നിരവധിപേരാണ് മരണപെടുന്നതും. മിക്ക സംസ്ഥാനങ്ങളിലും കോവിഡ് വ്യാപനം ശക്തിയായിരിക്കുകയാണ്.

പ്രതിദിന കണക്കില്‍ നേരിയ കുറവ് മാത്രമേ പലയിടത്തുമുണ്ടായിട്ടുള‌ളു. അതുകൊണ്ട്തന്നെ മിക്കയിടങ്ങളിലും സംസ്ഥാന സര്‍ക്കാരുകള്‍ കര്‍ശന ലോക്ഡൗണ്‍ പ്രഖ്യാപിച്ചിരിക്കുകയാണ്. വിവാഹങ്ങള്‍ക്കും മ‌റ്റ് ചടങ്ങുകള്‍ക്കും നിയന്ത്രണങ്ങളുണ്ട്.

എന്നാല്‍ നിയന്ത്രണങ്ങള്‍ പാലിക്കാതെയും എന്തിന് മാസ്‌ക് പോലും വയ്‌ക്കാതെ കല്യാണത്തില്‍ പങ്കെടുക്കാനെത്തിയവരെ സ്ഥലത്ത് പരിശോധനയ്‌ക്കെത്തിയ പൊലീസ് അറസ്റ്റ് ചെയ്തു. മദ്ധ്യപ്രദേശിലെ ഭിന്ദിലാണ് സംഭവം.

ഒന്നും രണ്ടുമല്ല ഇത്തരത്തില്‍ മുന്നൂറുപേരാണ് കല്യാണത്തിനെത്തിയത്. പൊലീസിനെ കണ്ട് കുറേപ്പേര്‍ ഓടി രക്ഷപ്പെട്ടു. പിടിയിലായത് 17പേരാണ്. ഇവര്‍ക്ക് നല്‍കിയ ശിക്ഷയാണ് തമാശ. കൂട്ടം കൂടകൂടരുതെന്ന നിര്‍ദ്ദേശം നല്‍കിയത് ലംഘിച്ചതിന് ഇവരൊന്നിച്ച്‌ തവളച്ചാട്ടം നടത്താന്‍ പൊലീസ് ആവശ്യപ്പെട്ടു.

ശിക്ഷ ലഭിച്ചവ‌ര്‍ തവളച്ചാട്ടം നടത്തുന്നതിന്റെ വീഡിയോ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്. പൊലീസ് ചെയ്‌തത് നന്നായി എന്നാണ് മിക്കവരുടെയും അഭിപ്രായം.

മുന്‍പ് മാസ്‌ക് വയ്‌ക്കാതെ റോഡിലിറങ്ങിയ ഒരു സ്‌ത്രീയെ പൊലീസ് വലിച്ചിഴച്ചത് വലിയ വിവാദമായിരുന്നു. ബുധനാഴ്‌ച 5065 പേര്‍ക്കാണ് സംസ്ഥാനത്ത് കൊവിഡ് സ്ഥിരീകരിച്ചത്. മദ്ധ്യപ്രദേശില്‍ കൊവിഡ് മരണങ്ങളും ഏറിവരികയാണ്. 7227 പേര്‍ ഇതുവരെ മരണപ്പെടുകയുണ്ടായി.