രണ്ടാം മോദിസര്‍ക്കാരിന്റെ അവസാന ബജറ്റ് പാര്‍ലമെന്റില്‍ അവതരിപ്പിക്കുന്നു... പാവപ്പെട്ടവര്‍, സ്ത്രീകള്‍, കര്‍ഷകര്‍ , യുവാക്കള്‍ എന്നിവര്‍ക്ക് സര്‍ക്കാരിന്റെ ആദ്യ പരിഗണന... ദാരിദ്ര്യനിര്‍മ്മാര്‍ജ്ജനം യാഥാര്‍ത്ഥ്യമാക്കി, തൊഴില്‍ സാധ്യതകള്‍ വര്‍ദ്ധിച്ചു.. നേട്ടങ്ങള്‍ എണ്ണിപ്പറഞ്ഞ് ധനമന്ത്രി.

പൊതുതിരഞ്ഞെടുപ്പ് വരാനിരിക്കേ ധനമന്ത്രി നിര്‍മലാ സീതാരാമന്‍ ഇടക്കാല ബജറ്റാണ് അവതരിപ്പിക്കുന്നത്. '2014ല്‍ ഞങ്ങള്‍ അധികാരമേറ്റെടുക്കുമ്പോള്‍ രാജ്യം വലിയ വെല്ലുവിളികളെ അഭിമുഖീകരിക്കുകയായിരുന്നു. 'സബ്കാ സത് സബ്കാ വികാസ്' ഈ മന്ത്രമേറ്റെടുത്ത് സര്‍ക്കാര്‍ ആ വെല്ലുവിളികളെ അതിജീവിച്ചുവെന്ന് നിര്‍മലസീതാരാമന്‍.

യുവത്വമുള്ള നമ്മുടെ രാജ്യത്തിന് ഉയര്‍ന്ന അഭിലാഷങ്ങളും വര്‍ത്തമാനകാലത്തെ ശോഭനമായ ഭാവിയെക്കുറിച്ചുള്ള പ്രതീക്ഷയും ആത്മവിശ്വാസവുമുണ്ട്. ഞങ്ങളുടെ സര്‍ക്കാര്‍ നടത്തിയ പ്രവര്‍ത്തനത്തെ അടിസ്ഥാനമാക്കി വീണ്ടും ജനങ്ങളാല്‍ ശക്തമായ ഒരു ജനവിധിയോടെ ഞങ്ങളെ അനുഗ്രഹിക്കുമെന്ന് പ്രതീക്ഷിക്കുന്നു' .


പ്രധാനമന്ത്രി മോദിയുടെ ഭരണത്തിനു കീഴില്‍ രാജ്യം പുരോഗതിയിലേക്ക് കുതിച്ചു. അമൃതകാലത്തിനായി സര്‍ക്കാര്‍ പ്രയത്‌നിച്ചു. സാമ്പത്തിക രംഗത്ത് കഴിഞ്ഞ 10 വര്‍ഷത്തിനിടെ ഗുണപരമായ മാറ്റങ്ങളുണ്ടായെന്നും ധനമന്ത്രി നിര്‍മല സീതാരാമന്‍. വിവിധ തലങ്ങളിലുള്ള ദാരിദ്ര്യത്തില്‍നിന്ന് 25 കോടി ജനങ്ങളെ സര്‍ക്കാര്‍ മുക്തരാക്കി.

വിവിധ മേഖലകളിലെ പിന്നാക്ക വിഭാഗക്കാരെ ശാക്തീകരിക്കാന്‍ സര്‍ക്കാരിനായി. പിഎം ജന്‍ധന്‍ അക്കൗണ്ടു വഴി 32 ലക്ഷംകോടി രൂപ ജനങ്ങള്‍ക്ക് എത്തിച്ചു നല്‍കി. കര്‍ഷകരുടെ ക്ഷേമത്തിനായി കിസാന്‍ സമ്മാന്‍ യോജനയിലൂടെ 11.2 കോടി പേര്‍ക്ക് ആനുകൂല്യങ്ങള്‍ ലഭ്യമാക്കി. പാര്‍ശ്വവല്‍ക്കരിക്കപ്പെട്ടവര്‍ക്കും ചെറുകിട കര്‍ഷകര്‍ക്കും ഇതിന്റെ ഗുണഫലം ലഭിച്ചു. ഫസല്‍ ഭീമ യോജനയിലൂടെ 4 കോടി കര്‍ഷകര്‍ക്ക് വായ്പ ലഭ്യമാക്കി.


തെരുവോര കച്ചവടക്കാര്‍ക്കും പാവപ്പെട്ടവര്‍ക്കും ഗുണകരമായ പദ്ധതികള്‍ സര്‍ക്കാര്‍ ലഭ്യമാക്കി. ഇവര്‍ക്ക് വായ്പ ലഭ്യമാക്കി. വ്യവസായ മേഖലയില്‍ വന്‍ പുരോഗതിയുണ്ടായെന്നും ധനമന്ത്രി.

മുദ്രാ യോജനയിലൂടെ പുതിയ സംരംഭങ്ങള്‍ക്കുള്ള വായ്പകള്‍ അനുവദിച്ചു. വ്യവസായ മേഖലയില്‍ വലിയ പുരോഗതി കൈവരിക്കാന്‍ രാജ്യത്തിനായി.


വിദ്യാഭ്യാസ മേഖലയില്‍ സമഗ്ര പുരോഗതിക്കുള്ള നിരവധി പദ്ധതികള്‍ ആവിഷ്‌കരിച്ചു. പിഎം ശ്രീ പദ്ധതിയിലൂടെ വിദ്യാഭ്യാസ ഗുണനിലവാരം ഉയര്‍ത്താനായി. സ്‌കില്‍ ഇന്ത്യ മിഷനിലൂടെ 1.4 കോടി യുവാക്കള്‍ക്ക് പരിശീലനം നല്‍കി. 3000 പുതിയ ഐടിഐകള്‍ സ്ഥാപിച്ചു. 7 ഐഐടികള്‍, 16 ഐഐഐടികള്‍, 7 ഐഐഎമ്മുകള്‍, 15 എയിംസ്, 300ലേറെ സര്‍വകലാശാലകള്‍ എന്നിവ കഴിഞ്ഞ 10 വര്‍ഷത്തിനിടെ ആരംഭിച്ചു.

കായികരംഗത്ത് വന്‍ പുരോഗതി കൈവരിക്കാന്‍ രാജ്യത്തിനായി. ഏഷ്യന്‍ ഗെയിംസിലും ഏഷ്യന്‍ പാരാ ഗെയിംസിലും പുതിയ ഉയരങ്ങള്‍ കീഴടക്കാന്‍ കായിക താരങ്ങള്‍ക്കായി. ചെസ് ലോകകപ്പില്‍ മാഗ്‌നസ് കാള്‍സനെതിരെ ഇന്ത്യയുടെ പ്രഗ്‌നാനന്ദ പുറത്തെടുത്ത പ്രകടനം പ്രത്യേകം പരാമര്‍ശിക്കുന്നു. 80ലേറെ ചെസ് ഗ്രാന്‍ഡ്മാസ്റ്റര്‍മാര്‍ ഇന്ന് നമുക്കുണ്ട്

വനിതാ സംരംഭകര്‍ക്ക് 30 കോടി മുദ്രാ ലോണുകള്‍ നല്‍കി. പത്ത് വര്‍ഷത്തിനിടെ ഉന്നതവിദ്യാഭ്യാസ സ്ഥാപനങ്ങളില്‍ പെണ്‍കുട്ടികളുടെ പ്രവേശനം 28 ശതമാനം വര്‍ധിച്ചു. തൊഴിലിടങ്ങളില്‍ സ്ത്രീകളുടെ പ്രാതിനിധ്യം വര്‍ദ്ധിക്കുകയും ചെയ്തു.