തുടർച്ചയായി ആറാം തവണയാണ് നിർമലാ സീതാരാമൻ കേന്ദ്ര ബജറ്റ് അവതരിപ്പിക്കാനൊരുങ്ങുന്നത്. ഹ്രസ്വകാലത്തേക്കുള്ള ബജറ്റായ ഇടക്കാല ബജറ്റാണ് ഇന്ന് അവതരിപ്പിക്കുന്നത്. സർക്കാരിന്റെ ചെലവ്, വരുമാനം, ധനക്കമ്മി, സാമ്പത്തിക പ്രകടനം, ഏതാനും മാസത്തേക്കുള്ള പ്രവചനങ്ങൾ തുടങ്ങിയവയാകും ഇടക്കാല ബജറ്റിൽ അവതരിപ്പിക്കുക. എന്നിരുന്നാലും ഏറെ പ്രതീക്ഷയോടെയാണ് രാജ്യം ഈ ബജറ്റിനെ നോക്കി കാണുന്നത്.നാരീശക്തിയുടെ ഉത്സമാകും ഈ ബജറ്റ് എന്ന സൂചന പ്രധാനമന്ത്രി ഇന്നലെ തന്നെ നൽകിയിരുന്നു. അതിനാൽ സ്ത്രീശാക്തീകരണത്തിനും യുവജനങ്ങൾക്കുമായി നിരവധി ക്ഷേമ വികസന പദ്ധതികൾ ബജറ്റിൽ ഉണ്ടാകുമെന്നാണ് വിലയിരുത്തപ്പെടുന്നത്. വീണ്ടും അധികാരത്തിലേറുമെന്നും തദവസരത്തിൽ സമ്പൂർണ ബജറ്റുമായി എത്തുമെന്നും പ്രധാനമന്ത്രി ആത്മവിശ്വാസം പ്രകടിപ്പിച്ചിരുന്നു.

സസ്പെൻസുകൾ ഓരോന്നായി പുറത്തറിയുന്ന ബജറ്റ് തത്സമയം കാണാനുള്ള അവസരവും കേന്ദ്രം ഉറപ്പാക്കുന്നു.രാവിലെ 11 മണി മുതലാകും കേന്ദ്ര ബജറ്റ് അവതരണം ആരംഭിക്കുക. സൻസദ് ടിവി, ദൂരദർശൻ എന്നീ ചാനലു കളിൽ ബജറ്റഅ അവതരണം തത്സമയം വീക്ഷിക്കാവുന്നതാണ്. പ്രസ് ഇൻഫോർമേഷൻ ബ്യൂറോയുടെ ഓൺലൈൻ പ്ലാറ്റ്ഫോമുകൾ, സാമ്പത്തിക വെബ്സൈറ്റുകൾ എന്നിവിടങ്ങളിലും ബജറ്റ് അവതരണം കാണാം. ഇതിന് പുറമേ നിരവധി വാർത്താ ചാനലുകളിലും കേന്ദ്ര ബജറ്റ് അവതരണം ഉണ്ടാകും.പേപ്പർലെസ് ബജറ്റ് അവതരിപ്പിക്കുന്നതിനാൽ തന്നെ ജനങ്ങൾക്ക് “യൂണിയൻ ബജറ്റ് മൊബൈൽ ആപ്പിൽ” ലഭ്യമാകും.ഇം​ഗ്ലീഷിലും ഹിന്ദിയിലും വിവരങ്ങൾ ലഭിക്കും. യൂണിയൻ ബജറ്റ് വെബ് പോർട്ടലായ www.indiabudget.gov.in നിന്നും ആപ്പ് ഡൗൺലോഡ് ചെയ്യാവുന്നതാണ്. പാർലമെൻ്റിൽ കേന്ദ്ര ധനമന്ത്രി ബജറ്റ് പ്രസംഗം പൂർത്തിയാക്കിയ ശേഷം ബജറ്റ് രേഖകൾ മൊബൈൽ ആപ്പിൽ ലഭ്യമാകും.

വിലക്കയറ്റത്തിൻ്റെ ഞെട്ടൽ സമ്മാനിച്ചുകൊണ്ടാണ് ബജറ്റ് ദിനം വന്നെത്തിയിരിക്കുന്നത്. എണ്ണ വിപണന കമ്പനികൾ 19 കിലോഗ്രാം വാണിജ്യ ഗ്യാസ് സിലിണ്ടറിൻ്റെ വില വർദ്ധിപ്പിച്ചിരിക്കുന്നു. വില വർദ്ധനവിനു ശേഷം ഡൽഹിയിൽ 19 കിലോഗ്രാം വാണിജ്യ ഗ്യാസ് സിലിണ്ടറിൻ്റെ വില1755.50 രൂപയിൽ നിന്ന് 1769.50 രൂപയായി ഉയർന്നു. കൊൽക്കത്തയിൽ ഒരു സിലിണ്ടറിൻ്റെ വില 1869.00 രൂപയിൽ നിന്ന് 1887 രൂപയായി ഉയർത്തി. നേരത്തെ മുംബൈയിൽ 1708 രൂപയ്ക്ക് ലഭ്യമായിരുന്ന വാണിജ്യ സിലിണ്ടർ ഇനി 1723 രൂപയ്ക്ക് ലഭിക്കും. അതേസമയം ചെന്നൈയിൽ വില 1924.50 രൂപയിൽ നിന്ന് 1937 രൂപയായി ഉയർന്നു. എന്നാൽ 14.2 കിലോഗ്രാം ഗാർഹിക ഗ്യാസ് സിലിണ്ടറിൻ്റെ വില ഉയർത്തിയിട്ടില്ല. 2024 ഫെബ്രുവരി 1 മുതലുള്ള രണ്ടാമത്തെ പ്രധാന മാറ്റം ഓൺലൈൻ പണമിടപാടുമായി ബന്ധപ്പെട്ടതാണ്. സ്വീകർത്താവിൻ്റെ മൊബൈൽ നമ്പറും ബാങ്ക് അക്കൗണ്ടിൻ്റെ പേരും ചേർത്ത് ഉപയോക്താക്കൾക്ക് ഐഎംപിഎസ് വഴി പണം കൈമാറാൻ കഴിയും.

നാഷണൽ പേയ്‌മെൻ്റ് കോർപ്പറേഷൻ ഓഫ് ഇന്ത്യ (NPCI) പ്രകാരം ഇനി ഗുണഭോക്താവിൻ്റെ പേരും IFSC കോഡും ആവശ്യമില്ല.ഈ ഇടക്കാല ബജറ്റ് 2024-ൽ ഗംഭീരമായ പ്രഖ്യാപനങ്ങളൊന്നും ഉണ്ടായേക്കില്ലെന്ന് ധനമന്ത്രി നിർമ്മല സീതാരാമൻ അഭിപ്രായപ്പെട്ടെങ്കിലും, പ്രത്യക്ഷ നികുതി രംഗത്ത്, ഈ വോട്ട് ഓൺ അക്കൗണ്ട് ബജറ്റിന് ആദായനികുതി വ്യവസ്ഥകൾ യുക്തിസഹമാക്കുന്നതിന് ശ്രദ്ധേയവും വളരെ ആവശ്യമുള്ളതുമായ ചില നടപടികൾ മേശപ്പുറത്ത് കൊണ്ടുവരാൻ കഴിയും. ഇന്ത്യയിലെ ദ്രുതഗതിയിലുള്ള സാമ്പത്തിക വികാസവും അതിവേഗം വളരുന്ന സമ്പദ്‌വ്യവസ്ഥയാകാനുള്ള നമ്മുടെ അഭിലാഷവും കാരണം, നികുതി പിരിവ് പ്രക്രിയയെ ലളിതമാക്കുന്ന നടപടികളെങ്കിലും ഉണ്ടാകുമെന്ന് പ്രതീക്ഷിക്കാം.