പാര്‍ലമെന്റിലെ വന്മാരെയെല്ലാം വെട്ടി ചരിത്രത്തിലേക്ക് കുതിച്ച് നിര്‍മ്മല സീതാരാമന്‍. പുതിയ പാര്‍ലമെന്റില്‍ നാരീശക്തിയുടെ കരുത്തായി നിര്‍മലാ സീതാരാമന്റെ ബജറ്റ് അവതരണം. പല റെക്കോര്‍ഡുകളിലും മുത്തമിട്ട് നിര്‍മ്മലയുടെ കുതിപ്പ് തുടരുന്നു. അക്കൂട്ടത്തില്‍ ഇന്ദിര ഗാന്ധിയുടേയും നേട്ടത്തിന് ഒപ്പമെത്തി. തുടര്‍ച്ചയായി ആറു കേന്ദ്ര ബജറ്റുകള്‍ അവതരിപ്പിച്ച രണ്ടാമത്തെ ധനമന്ത്രിയെന്ന റെക്കോഡിലേക്കും നിര്‍മലാ സീതാരാമന്‍ എത്തുകയാണ്. മുന്‍പ്രധാനമന്ത്രി മൊറാര്‍ജി ദേശായിയാണ് മുമ്പ് ഈ നേട്ടം സ്വന്തമാക്കിയിട്ടുള്ളത്.

വ്യാഴാഴ്ചത്തെ ഇടക്കാല ബജറ്റോടുകൂടി മുന്‍കേന്ദ്ര ധനമന്ത്രിമാരായ മന്മോഹന്‍ സിങ്, അരുണ്‍ ജെയ്റ്റ്‌ലി, പി. ചിദംബരം, യശ്വന്ത് സിന്‍ഹ എന്നിവരുടെ അഞ്ചു ബജറ്റ് നേട്ടം മറികടന്നു. പൊതുതിരഞ്ഞെടുപ്പിനു തൊട്ടുമുമ്പുള്ള ബജറ്റായതിനാല്‍ വമ്പന്‍ പ്രഖ്യാപനങ്ങള്‍ ഉണ്ടാകില്ലെന്നും വോട്ട് ഓണ്‍ അക്കൗണ്ട് ആയിരിക്കുമെന്നും കഴിഞ്ഞമാസം നിര്‍മല വ്യക്തമാക്കിയിരുന്നു. 2019ലാണ് നിര്‍മലാ സീതാരാമന്‍ ധനമന്ത്രിയായി ചുമതലയേറ്റത്. ഇന്ദിരാഗാന്ധിക്കുശേഷം ബജറ്റ് അവതരിപ്പിക്കുന്ന വനിതയെന്ന ബഹുമതിയും നിര്‍മലയ്ക്കാണ്. ഫോബ്‌സ് മാസികയുടെ 2023ലെ ഏറ്റവും കരുത്തുറ്റ വനിതകളില്‍ ഇടം നേടിയ നാലു ഇന്ത്യന്‍ വനിതകളില്‍ ഒരാളാണ് കേന്ദ്രമന്ത്രി നിര്‍മല സീതാരാമന്‍. പട്ടികയില്‍ നിര്‍മലാ സീതാരാമനാണ് ഇന്ത്യയില്‍ നിന്നുള്ള വനിതകളില്‍ ഏറ്റവും മുന്നില്‍. 32ാം സ്ഥാമനമാണ് ഇന്ത്യയുടെ ധനകാര്യ വകുപ്പ് മന്ത്രിയും ബിജെപിയുടെ മുതിര്‍ന്ന നേതാവുമായ നിര്‍മല സീതാരാമന്‍ സ്വന്തമാക്കിയത്. 2019 മുതല്‍ ധനകാര്യ, കോര്‍പറേറ്റ് വകുപ്പ് മന്ത്രിയാണ്.

2017 മുതല്‍ 2019 വരെ പ്രതിരോധ മന്ത്രിയായിരുന്നു. ഇന്ദിരാഗാന്ധിക്ക് ശേഷം പ്രതിരോധ വകുപ്പും ധനകാര്യ വകുപ്പും കൈകാര്യം ചെയ്ത സ്ത്രീയെന്ന നേട്ടവും നിര്‍മലാ സീതീരാമന് സ്വന്തമാണ്. 2022ലെ ലോകത്തിലെ ഏറ്റവും ശക്തരായ വനിതകളുടെ പട്ടികയില്‍ 36ാം സ്ഥാനം നേടിയിരുന്നു. 2019 മുതലാണ് നിര്‍മല സീതാരാമന്‍ തുടര്‍ച്ചയായി ബജറ്റ് അവതരിപ്പിച്ച് തുടങ്ങിയത്. 195964 കാലഘട്ടത്തില്‍ തുടര്‍ച്ചയായി അഞ്ച് വാര്‍ഷിക ബജറ്റുകളും ഒരു ഇടക്കാല ബജറ്റും മൊറാര്‍ജി ദേശായി അവതരിപ്പിച്ചിട്ടുണ്ട്. പത്ത് ബജറ്റുകള്‍ അവതരിപ്പിച്ച് ഏറ്റവും അധികം ബജറ്റുകള്‍ അവതരിപ്പിച്ചതിന്റെ ക്രെഡിറ്റും മൊറാര്‍ജി ദേശായിക്കാണ്.

നേരത്തെ ധനമന്ത്രിമാരായ മന്മോഹന്‍ സിംഗ്, അരുണ്‍ ജെയ്റ്റ്‌ലി, പി.ചിദംബരം, യശ്വന്ത് സിന്‍ഹ എന്നിവരും തുടര്‍ച്ചയായി അഞ്ച് തവണ ബജറ്റ് അവതരിപ്പിച്ചിട്ടുണ്ട്. പി. ചിദംബരം 20032005 മുതല്‍ 20082009 വരെയും യശ്വന്ത് സിന്‍ഹ 1998ലും, 19992000 മുതല്‍ 200203 വരെയും തുടര്‍ച്ചയായി ബജറ്റ് അവതരിപ്പിച്ചു. യശ്വന്ത് സിന്‍ഹയാണ് വൈകുന്നേരം അഞ്ചിനുള്ള ബജറ്റ് അവതരണ സമയം മാറ്റി രാവിലെ 11 മുതലാക്കിയത്. 1991 മുതല്‍ 1996 വരെയുള്ള കാലഘട്ടത്തിലാണ് മന്‍മോഹന്‍ സിങ് തുടര്‍ച്ചായായി അഞ്ച് ബജറ്റുകള്‍ അവതരിപ്പിച്ചത്. ഇവരെ പിന്നാലാക്കിയാണ് നിര്‍മല സീതാരാമന്‍ തുടര്‍ച്ചയായി ആറ് തവണ കേന്ദ്ര ബജറ്റ് അവതരിപ്പിക്കുന്ന ധനമന്ത്രി എന്ന റെക്കോര്‍ഡ് സ്വന്തമാക്കുന്നത്.

ഏറ്റവും ദൈര്‍ഘ്യമേറിയ ബജറ്റ് അവതരിപ്പിച്ച റെക്കോഡും നിര്‍മല സീതാരാമനാണ്. 2020ല്‍ രണ്ട് മണിക്കൂര്‍ 42 മിനിട്ട് സമയമെടുത്തായിരുന്നു ബജറ്റ് അവതരണം. പേപ്പര്‍ ഇല്ലാതെ, അച്ചടിച്ച കോപ്പി ഇല്ലാതെ ബജറ്റ് അവതരിപ്പിച്ച ആദ്യ കേന്ദ്ര ധനമന്ത്രിയും നിര്‍മലാ സീതാരാമന്‍ ആയിരുന്നു. 2021ലെ ബജറ്റിലായിരുന്നു ഇത്. അച്ചടിച്ച കോപ്പി ഇല്ലാത്തതുകൊണ്ട് തന്നെ പാര്‍ലമെന്റ് അംഗങ്ങള്‍ക്കും പൊതുജനങ്ങള്‍ക്കും 'യൂണിയന്‍ ബജറ്റ് മൊബൈല്‍ ആപ്പില്‍' ലഭ്യമായിരുന്നു.

നിലപാടുകളില്‍ പല എതിര്‍പ്പുകളും ഉണ്ടെങ്കിലും കേന്ദ്രമന്ത്രിമാരില്‍ ഏറ്റവും കരുത്തുറ്റ മന്ത്രിയാണ് നിര്‍മ്മല. പലപ്പോഴും നിര്‍മ്മല സീതാരാമന്റെ ഇടപെടലുകള്‍ ചര്‍ച്ചയായിട്ടുണ്ട്. ഇതുമാത്രമല്ല കുറിക്ക് കൊള്ളുന്ന മറുപടികള്‍ കൊടുത്ത് ശത്രുക്കളെ അടിച്ചിരുത്തിയും നിര്‍മ്മല മാധ്യമങ്ങളില്‍ നിറഞ്ഞിട്ടുണ്ട്. അടുത്തിടെയാണ് ഉദയനിധി സ്റ്റാലിനുമായ് പോര് നടന്നത്. കേന്ദ്രം ഫണ്ട് തരാത്തതില്‍ പ്രകോപിതനായ ഉദയനിധി മാധ്യമങ്ങള്‍ക്ക് മുന്‍പില്‍ അവ അപ്പവീട്ട് സ്വത്താ കേട്ടേന്ന് മറുപടി കൊടുത്തിരുന്നു. ഇതിന് നിര്‍മ്മല സീതാരാമന്‍ കൊടുത്ത മറുപടി സ്റ്റാലിന്റെയും കരുണാനിധിയുടേയും പേരില്‍ അല്ലെ ഉദയനിധി രാഷ്ട്രീയത്തില്‍ വന്നതെന്ന മറുപടിയാണ് കൊടുത്തത്. രാഷ്ട്രീയത്തില്‍ ഒരു മര്യാദപാലിക്കണമെന്നും പറയുന്ന ഓരോ വാക്കും ശ്രദ്ധിച്ച് പറയണമെന്നും മുന്നറിയിപ്പ് കൊടുത്തു. പലപ്പോഴും തമിഴില്‍ സംസാരിച്ചും നിര്‍മ്മല വൈറലായിട്ടുണ്ട്. കൃത്യവും വ്യക്തവുമായ വളരെ ഷാര്‍പ്പായുമാണ് നിര്‍മ്മലയുടെ പ്രസ്താവനകള്‍. വെറുതെ വിവാദങ്ങളില്‍ ചെന്നുവീഴാറില്ല.