ഇടക്കാല ബജറ്റ് നിരാശാജനകമാണെന്ന് മുതിര്‍ന്ന കോണ്‍ഗ്രസ് എംപി ശശി തരൂര്‍. ബജറ്റിന് പരാജയത്തിന്റെ ഗ്രേഡ് മാത്രമെ നല്‍കാന്‍ കഴിയുകയുള്ളൂവെന്നും അദ്ദേഹം പറഞ്ഞു. ബജറ്റില്‍ നിര്‍മല സീതാരാമന്റേത് അവ്യക്തമായ ഭാഷയാണെന്നും കൃത്യമായ കണക്കുകളില്ലെന്നും ശശി തരൂര്‍ നേരത്തെ വിമര്‍ശിച്ചിരുന്നു.

വ്യാഴാഴ്ചയാണ് സീതാരാമന്‍ 2024-2025 ലെ ഇടക്കാല ബജറ്റ് അവതരിപ്പിച്ചു. കര്‍ഷകര്‍, യുവാക്കള്‍, സ്ത്രീകള്‍, ദരിദ്രരായ കുടുംബങ്ങള്‍ തുടങ്ങിയ ഗ്രൂപ്പുകള്‍ക്ക് മുന്‍ഗണന നല്‍കുന്നതിനൊപ്പം, സുസ്ഥിരമായ അടിസ്ഥാന സൗകര്യ വികസനത്തിലൂടെ തൊഴിലവസരങ്ങള്‍ സൃഷ്ടിക്കുന്നതിലാണ് സര്‍ക്കാരിന്റെ ശ്രദ്ധയെന്നും അവര്‍ പറഞ്ഞു. പണപ്പെരുപ്പം ജനങ്ങളെ സാരമായി ബാധിച്ചുവെന്ന് പറഞ്ഞ് തരൂര്‍ കേന്ദ്രത്തിലെ ബിജെപി സര്‍ക്കാരിനെതിരെയും ആഞ്ഞടിച്ചു. വിദേശ നിക്ഷേപം വര്‍ദ്ധിക്കുമെന്ന ധനമന്ത്രിയുടെ അവകാശവാദങ്ങളെ തരൂര്‍ വെല്ലുവിളിച്ചു. വിദേശ നിക്ഷേപം യുപിഎയുടെ കാലത്ത് ജിഡിപിയുടെ 3.6 ശതമാനം ആയിരുന്നത് ഇപ്പോള്‍ ഒരു ശതമാനമാണെന്നും അദ്ദേഹം പറഞ്ഞു.

കഴിഞ്ഞ 10 വര്‍ഷത്തെ മോദി സര്‍ക്കാരിന്റെ നേട്ടങ്ങള്‍ നിരത്തിയാണ് കേന്ദ്ര ധനമന്ത്രി നിര്‍മ്മല സീതാരാമന്‍ തന്റെ ആദ്യ ഇടക്കാല ബജറ്റ് അവതരണത്തിന് തുടക്കമിട്ടത്. സമ്പദ് വ്യവസ്ഥയില്‍ വലിയ പോസിറ്റീവ് മാറ്റം കണ്ടുവെന്നും എല്ലാവര്‍ക്കുമൊപ്പം, എല്ലാവര്‍ക്കും വികസനം എന്ന മന്ത്രവുമായി സര്‍ക്കാര്‍ മുന്നോട്ട് പോയെന്നും മന്ത്രി പറഞ്ഞു. കേന്ദ്രം പുതിയ പദ്ധതികള്‍ ആരംഭിച്ചു, തൊഴില്‍ മേഖലകളില്‍ വലിയ നടപടികള്‍ സ്വീകരിച്ചു. വീട്, വെള്ളം, പാചക വാതകം തുടങ്ങി എല്ലാവരുടെയും ബാങ്ക് അക്കൗണ്ട് തുടങ്ങുന്നത് വരെ ഗ്രാമവികസനത്തിന് വേണ്ടി ഒരുപാട് കാര്യങ്ങള്‍ ചെയ്തു. 80 കോടി ജനങ്ങള്‍ക്ക് ഞങ്ങള്‍ സൗജന്യ ഭക്ഷണം നല്‍കി. കഴിഞ്ഞ ദശകത്തില്‍ ഗ്രാമീണ തലത്തില്‍ വരുമാനത്തില്‍ ഗണ്യമായ പുരോഗതി ഉണ്ടായിട്ടുണ്ടെന്നും നിര്‍മല സീതാരാമന്‍ പറഞ്ഞു.