ഓണ്‍ലൈനായി എരുമയെ വാങ്ങാന്‍ പണം നല്‍കിയ ക്ഷീരകര്‍ഷകന് നഷ്ടമായത് 10,000 രൂപ. ഉത്തര്‍പ്രദേശിലെ റായ്ബറേലി സ്വദേശിയായ ക്ഷിരകര്‍ഷകന്‍ സുനില്‍ കുമാറിനാണ് പണം നഷ്ടമായത്. 55,000 രൂപ പറഞ്ഞുറപ്പിച്ച എരുമയ്ക്കായി അഡ്വാന്‍സ് നല്‍കിയ പതിനായിരം രൂപയാണ് നഷ്ടമായത്. യൂട്യൂബില്‍ കണ്ട വീഡിയോയുടെ അടിസ്ഥാനത്തിലാണ് എരുമയെ വാങ്ങാന്‍ തീരുമാനിച്ചത്.

വീഡിയോയില്‍ നല്‍കിയിരുന്ന ഫോണ്‍ നമ്പരില്‍ രാജസ്ഥാനിലെ കിഷന്‍ ഭയ്യാ ഡയറി ഫാമിലേക്ക് വിളിച്ചാണ് സുനില്‍ എരുമയെ ബുക്ക് ചെയ്തത്. ജയ്പൂര്‍ ആസ്ഥാനമായി പ്രവര്‍ത്തിക്കുന്ന ഫാമിലെ ശുബം എന്നയാളുമായി സംസാരിക്കുകയും ചെയ്തു. ശുബവുമായി ഫോണില്‍ സംസാരിച്ചപ്പോള്‍ മുന്തിയ ഇനം എരുമയാണ് ഉള്ളതെന്നും ദിവസവും 18 ലിറ്റര്‍ പാല്‍ വരെ ലഭിക്കുമെന്ന് പറഞ്ഞ് വിശ്വസിപ്പിക്കുകയും ചെയ്തിരുന്നു.

തുടര്‍ന്ന് എരുമയുടെ ഒരു വീഡിയോ അയച്ച് നല്‍കിയ ശേഷം പതിനായിരം രൂപ അക്കൗണ്ടിലേക്ക് അയക്കാന്‍ നിര്‍ദേശിച്ചു. എരുമയെ കയ്യില്‍ കിട്ടിയ ശേഷം ബാക്കി പണം നല്‍കിയാല്‍ മതിയെന്ന് പറഞ്ഞതനുസരിച്ച് പതിനായിരം രൂപ നല്‍കി. എന്നാല്‍ പറഞ്ഞ ദിവസം എരുമ എത്തിയില്ല. ഇതോടെ വീണ്ടും ഫാമിലേക്ക് വിളിച്ചപ്പോള്‍ 25,000 രൂപ കൂടി അയക്കാന്‍ ആവശ്യപ്പെട്ടു. വീണ്ടും പണം ആവശ്യപ്പെട്ടപ്പോള്‍ തട്ടിപ്പ് മനസ്സിലായതിനെ തുടര്‍ന്ന് സുനില്‍ പരാതിയുമായി പൊലീസിനെ സമീപിക്കുകയായിരുന്നു.