ഝാര്ഖണ്ഡില് പുതിയ സര്ക്കാരുണ്ടാക്കാന് ഗവര്ണറുടെ അനുമതി... മുഖ്യമന്ത്രിയായി സത്യപ്രതിജ്ഞ ചെയ്യാന് ജെ.എം.എം. നിയമസഭാകക്ഷിനേതാവ് ചംപായ് സോറനെ ഗവര്ണര് ക്ഷണിച്ചു; പത്തുദിവസത്തിനകം ഭൂരിപക്ഷം തെളിയിക്കണം
ഝാര്ഖണ്ഡില് പുതിയ സര്ക്കാരുണ്ടാക്കാന് ഗവര്ണറുടെ അനുമതി... മുഖ്യമന്ത്രിയായി സത്യപ്രതിജ്ഞ ചെയ്യാന് ജെ.എം.എം. നിയമസഭാകക്ഷിനേതാവ് ചംപായ് സോറനെ ഗവര്ണര് ക്ഷണിച്ചു; പത്തുദിവസത്തിനകം ഭൂരിപക്ഷം തെളിയിക്കണം.
വ്യാഴാഴ്ച അര്ധരാത്രിയോടെ ഗവര്ണറുടെ പ്രിന്സിപ്പല് സെക്രട്ടറി നിതിന് മദന് കുല്ക്കര്ണിയാണ് ഇക്കാര്യമറിയിച്ചത്. പത്തുദിവസത്തിനകം ഭൂരിപക്ഷം തെളിയിക്കാനാവശ്യപ്പെട്ടിട്ടുണ്ട്. വെള്ളിയാഴ്ച സത്യപ്രതിജ്ഞ നടത്തുമെനന്ന് സംസ്ഥാന കോണ്ഗ്രസ് അധ്യക്ഷന് രാജേഷ് താക്കൂര് പറഞ്ഞു. നേരത്തെ, രാജ്ഭവനിലെത്തിയ സോറന് സര്ക്കാര് ഉണ്ടാക്കാനുള്ള തന്റെ അവകാശവാദം അംഗീകരിക്കണമെന്ന് ഗവര്ണര് സി.പി. രാധാകൃഷ്ണനോട് ആവശ്യപ്പെട്ടിട്ടുണ്ടായിരുന്നു.
അതിനിടെ സര്ക്കാര് രൂപവത്കരിക്കാന് ക്ഷണം വൈകുന്നത് ബി.ജെ.പി. കുതിരക്കച്ചവടത്തിനായി ദുരുപയോഗം ചെയ്യുമെന്ന ആശങ്കയെത്തുടര്ന്ന് ഭരണസഖ്യം 43 എം.എല്.എ.മാരെ ഹൈദരാബാദിലേക്ക് മാററാനായി രണ്ടു ചാര്ട്ടേഡ് വിമാനങ്ങള് ബുക്കുചെയ്തിരുന്നു. എം.എല്.എമാര് റാഞ്ചി വിമാനത്താവളത്തിലെത്തി കാത്തുനിന്നെങ്കിലും കാഴ്ചാസാധ്യത കുറവായതിനാല് വിമാനങ്ങള്ക്ക് പുറപ്പെടാന് കഴിഞ്ഞില്ല. തുടര്ന്ന്, എം.എല്.എ.മാര് താമസിച്ചിരുന്ന സര്ക്യൂട്ട് ഹൗസിലേക്ക് മടങ്ങി.
അതേസമയം ഇന്നലെ രാത്രിയാണ് മുന് മുഖ്യമന്ത്രി ഹേമന്ത് സോറനെ ഇഡി അറസ്റ്റ് ചെയ്തത്. ഭൂമി കുംഭകോണ കേസില് ഏഴര മണിക്കൂര് ചോദ്യം ചെയ്ത ശേഷമാണ് ഹേമന്ത് സോറനെ ഇഡി അറസ്റ്റ് ചെയ്തത്. അറസ്റ്റിന് തൊട്ടുമുന്പ് സോറന് രാജ്ഭവനിലെത്തി രാജിക്കത്ത് ഗവര്ണര്ക്ക് കൈമാറുകയായിരുന്നു. പിന്നാലെ നിലവില് ഗതാഗത മന്ത്രിയായ ചംപായ് സോറനെ മുഖ്യമന്ത്രിയാക്കണമെന്നാവശ്യപ്പെട്ട് ഭരണകക്ഷി നേതാക്കള് നേതാക്കള് ഗവര്ണറെ കാണുകയായിരുന്നു.
"
https://www.facebook.com/Malayalivartha
