തണുപ്പകറ്റാന്‍ കത്തിച്ച തീയില്‍ നിന്നും പുക ശ്വസിച്ച് ദമ്പതികള്‍ക്ക് ദാരുണാന്ത്യം. ഉത്തരാഖണ്ഡില്‍ ഭിലാംഗന മേഖലയിലെ ദ്വാരി-തപ്ല ഗ്രാമത്തില്‍ വ്യാഴാഴ്ച രാത്രിയാണ് സംഭവം. മദന്‍ മോഹന്‍ സെംവാല്‍ (52), ഭാര്യ യശോദാ ദേവി (48) എന്നിവരാണ് മരിച്ചത്.

വിവാഹ ചടങ്ങില്‍ പങ്കെടുക്കാനാണ് ഇരുവരും ഈ ഗ്രാമത്തിലെത്തിയത്. കടുത്ത തണുപ്പിനെ തുടര്‍ന്ന് രാത്രി 11 ഓടെ ഇവര്‍ വിറക് കൂട്ടി തീ കത്തിച്ചതിന് ശേഷം ഉറങ്ങാന്‍ പോയി. പിറ്റേന്ന് രാവിലെ മകന്‍ വന്ന് ഇവരെ വിളിച്ചുവെങ്കിലും വാതില്‍ തുറന്നില്ല. തുടര്‍ന്ന് വാതില്‍ തകര്‍ത്ത് അകത്ത് പ്രവേശിച്ചപ്പോള്‍ ഇവരെ മരിച്ച നിലയില്‍ കണ്ടെത്തുകയായിരുന്നു.

ഇവിടെ അടുത്ത കാലത്തായി തണുപ്പ് കൂടിയിരിക്കുകയാണ്. അടുപ്പിലെ പുകയില്‍ നിന്നുള്ള കാര്‍ബണ്‍ മോണോക്‌സൈഡ് വാതകമാണ് മരണത്തിലേക്ക് നയിച്ചതെന്നാണ് പ്രാഥമിക നിഗമനത്തിലുള്ളത്.