കല്ക്കരിപ്പാടം അഴിമതി; പ്രധാനമന്ത്രിയുടെ ഓഫീസിന് സി.ബി.ഐ ചോദ്യാവലി കൈമാറി
കല്ക്കരിപ്പാടം അഴിമതി കേസില് സി.ബി.ഐ പ്രധാനമന്ത്രിയുടെ ഓഫീസിന് ചോദ്യാവലി കൈമാറി. കുമാര മംഗലം ബിര്ളയുടെ ഹിന്ഡാല്കോയ്ക്ക് കല്ക്കരിപ്പാടം അനുവദിച്ചത് സംബന്ധിച്ച വിശദാംശങ്ങള് ആരാഞ്ഞു കൊണ്ടുള്ളതാണ് ചോദ്യാവലി.
കേസില് ഇതുവരെ 14 പ്രഥമവിവര റിപ്പോര്ട്ടുകളാണ് സി.ബി.ഐ ഫയല് ചെയ്തത്. മുന് കല്ക്കരി വകുപ്പു സെക്രട്ടറി പി.സി പരേഖിനെയും കുമാരമംഗലം ബിര്ളയെയും പ്രതിചേര്ത്ത് അവസാനം രജിസ്റ്റര് ചെയ്ത റിപ്പോര്ട്ടുമായി ബന്ധപ്പെട്ടാണ് പ്രധാനമന്ത്രിയുടെ ഓഫീസിന് ചോദ്യാവലി നല്കിയത്.
2005 ല് പ്രധാനമന്ത്രി മന്മോഹന്സിങ് കല്ക്കരിവകുപ്പിന്റെ ചുമതല വഹിച്ചിരുന്ന സമയത്താണ് ഹിന്ഡാല്കോ കമ്പനിക്ക് കല്ക്കരിപ്പാടം അനുവദിച്ചത്. എന്നാല് യോഗ്യതയുടെ അടിസ്ഥാനത്തില് മാത്രമാണ് കല്ക്കരിപ്പാടങ്ങള് അനുവദിച്ചതെന്നാണ് പ്രധാനമന്ത്രിയുടെ ഓഫീസിന്റെ വിശദീകരണം. ഹിന്ഡാല്കോയ്ക്ക് പാടം നല്കാന് ഒഡീഷ മുഖ്യമന്ത്രി നവീന് പട്നാനായിക്ക് ശൂപാര്ശ ചെയ്തതായും പ്രധാനമന്ത്രിയുടെ ഓഫീസ് അറിയിക്കുന്നു.
കല്ക്കരിപ്പാടം അനുവദിച്ചതില് ഗൂഢാലോചനക്കുറ്റം ചുമത്തി പി.സി. പരേഖിനെയും കുമാരമംഗലം ബിര്ളയെയും സി.ബി.ഐ. കേസിലുള്പ്പെടുത്തിയതിനു പിന്നാലെ, ഞാന് തെറ്റുകാരനെന്ന് സി.ബി.ഐ. കരുതുന്നെങ്കില്, പ്രധാനമന്ത്രിക്കും തുല്യ ഉത്തരവാദിത്വമുണ്ടെന്ന പരേഖിന്റെ പരാമര്ശം വിവാദമായിരുന്നു.
വരും ദിവസങ്ങളില് പ്രധാനമന്ത്രിയുടെ ഓഫീസിലെ പ്രമുഖരെ സി.ബി.ഐ ചോദ്യം ചെയ്യുമെന്നാണ് സൂചന. കേസ് വരും ദിവസം സുപ്രീം കോടതിയുടെ പരിഗണനക്ക് വരുന്നുണ്ട്. കോടതിയുടെ നിലപാടുകള്ക്കനുസരിച്ചായിരിക്കും പ്രധാനമന്ത്രിയെ ചോദ്യം ചെയ്യണമോ എന്ന വിഷയത്തില് സി.ബി.ഐ തീരുമാനമെടുക്കുക.
https://www.facebook.com/Malayalivartha