ഭാര്യയ്ക്കെതിരായ അതിക്രമത്തില് ഭര്ത്താവിന്റെ പെണ്സുഹൃത്തിനെതിരെ കേസെടുക്കാനാവില്ലെന്ന് കോടതി
ഭാര്യയ്ക്കുനേരെയുള്ള അതിക്രമത്തിന്റെ പേരില് ഭര്ത്താവിന്റെ പെണ്സുഹൃത്തിനെതിരെ ഭാരതീയ ന്യായ സംഹിത പ്രകാരം കേസെടുക്കാനാവില്ലെന്ന് കര്ണാടക ഹൈക്കോടതി. ഭര്ത്താവില് നിന്നോ അയാളുടെ ബന്ധുക്കളില്നിന്നോ ഭാര്യ നേരിടുന്ന അതിക്രമത്തിന് പ്രതികള്ക്ക് പരമാവധി മൂന്നുവര്ഷം തടവോ പിഴയോ നല്കാമെന്ന ബിഎന്എസ് 85ാം സെക്ഷന് ഭര്ത്താവിന്റെ പെണ്സുഹൃത്തിന്റെ കാര്യത്തില് ബാധകമല്ലെന്ന് ജസ്റ്റിസ് എം.നാഗപ്രസന്ന പറഞ്ഞു. പെണ്സുഹൃത്തിനെ ഭര്ത്താവിന്റെ ബന്ധുവായി കണക്കാക്കാനാവില്ലെന്ന് കോടതി പറഞ്ഞു. ഡെച്ചമ്മ കൗശിക് കേസിലെ സുപ്രീംകോടതി വിധി ചൂണ്ടിക്കാട്ടിയാണ് കോടതിയുടെ നിരീക്ഷണം.
ആണ്സുഹൃത്ത് ഭാര്യയെ അതിക്രമത്തിനിരയാക്കിയതിന്റെ പേരില് തനിക്കെതിരെയും ക്രിമിനല് കേസ് ചുമത്തിയ വിചാരണക്കോടതി നടപടിക്കെതിരെ യുവതി സമര്പ്പിച്ച ഹര്ജിയിലാണ് കര്ണാടക ഹൈക്കോടതിയുടെ നടപടി. വിവാഹിതനായ പുരുഷന്റെ കാമുകിയെയോ മറ്റ് പെണ്സുഹൃത്തുക്കളെയോ ബന്ധുക്കളായി കണക്കാക്കാന് കഴിയില്ലെന്ന് കോടതി പറഞ്ഞു. അതുകൊണ്ടുതന്നെ അവര്ക്കെതിരെ ബിഎന്എസ് 85ാം വകുപ്പ് ചുമത്താനാവില്ലെന്നും കോടതി വ്യക്തമാക്കി.
https://www.facebook.com/Malayalivartha
