സഞ്ചാര യോഗ്യമാല്ലാത്തെ റോഡുകള്‍ നന്നാക്കിയെടുക്കുന്നതുമായി ബന്ധപ്പെട്ട്, പുതിയ സിനിമയുടെ റിലീസിന്റെ തിരക്കിനിടയിലും ജയസൂര്യയുടെ ഭാഗത്ത് നിന്നുണ്ടായ ഇടപെടലിനെ അഭിനന്ദിച്ചു കൊണ്ട് മുഖ്യമന്ത്രി പിണറായി വിജയന്റെ ഫെയ്‌സ്ബുക് പോസ്റ്റ്. കേരളത്തിലെ ജനങ്ങളുടെ അടിസ്ഥാന സൗകര്യങ്ങളില്‍ ഒന്നായ റോഡുകള്‍ നന്നാക്കണമെന്നാവശ്യപ്പെട്ടു കൊണ്ട് കഴിഞ്ഞ ദിവസം ഫെയ്‌സ്ബുക്കിലൂടെ തന്നെ ജയസൂര്യ വീഡിയോ സന്ദേശം അയച്ചിരുന്നു. ഇതിനുള്ള മറുപടിയാണ് പിണറായി വിജയന്‍ നല്‍കിയത്.മുന്‍പ് നേരില്‍ കണ്ടപ്പോള്‍ മുഖ്യമന്ത്രിയുടെ തിരക്ക് കാരണം പറയാന്‍ കഴിയാത്തതു കൊണ്ടാണ് വീഡിയോ സന്ദേശമെന്നും ജനങ്ങളോട് സ്‌നേഹം ഉണ്ടെങ്കില്‍ വഴി നന്നാക്കാന്‍ സര്‍ക്കാര്‍ വേഗം ഇക്കാര്യത്തില്‍ ഇടപെടണമെന്നും ജയസൂര്യ വ്യക്തമാക്കിയിരുന്നു.

അതത് പ്രദേശത്തെ റോഡുകള്‍ മോശമായാല്‍ അത് സംബന്ധിച്ച് ജനങ്ങള്‍ ജനപ്രതിനിധികള്‍ക്ക് നല്‍കുന്ന പരാതികള്‍ ബന്ധപ്പെട്ട എഞ്ചിനിയര്‍മാര്‍ക്ക് കൈമാറി നടപടിയെടുക്കാന്‍ വലിയ കാലതാമസം നേരിടുന്നത് ഒഴിവാക്കിയേ തീരൂ. ജനപങ്കാളിത്തത്തോടെ റോഡുകളുടെ നിലവാരം ഉയര്‍ത്താനാകുമെന്നാണ് തന്റെ ഉറച്ച വിശ്വാസമെന്ന് പിണറായി തന്റെ ഫെയ്‌സ്ബുക്ക് പോസ്റ്റിലൂടെ അറിയിച്ചു.

ജയസൂര്യയെ പോലുള്ള പ്രശസ്ത താരങ്ങളും നിര്‍മ്മാതാക്കളും സ്വയം മുന്നിട്ടിറങ്ങിയും തങ്ങളുടെ കമ്പനികളുടെ സി എസ് ആര്‍ ഫണ്ടുകള്‍ ഉപയോഗിച്ചും സാമൂഹ്യ പ്രവര്‍ത്തനങ്ങളുടെ ഭാഗമായിട്ടും ഇത്തരം പ്രോജക്ടുകള്‍ ചെയ്യാന്‍ ശ്രമിക്കുമ്പോള്‍ തദ്ദേശ ഭരണ സ്ഥാപനങ്ങളുടെയും പ്രാദേശിക സമൂഹത്തിന്റെയും പിന്തുണ അവര്‍ക്കുണ്ടാകും എന്നും വിശ്വസിക്കുന്നതായും പിണറായി പറഞ്ഞു.

തന്റെ തിരക്കുകള്‍ക്കിടയിലും സമൂഹത്തിനു വേണ്ട കാര്യങ്ങള്‍ ശ്രദ്ധയില്‍ പെടുത്തിയതിനു ജയസസൂര്യയെ അഭിനന്ദിക്കുന്നു. ജയസൂര്യയുടെ അടുത്ത ചിത്രത്തിന് എല്ലാ ഭാവുകങ്ങളും നേര്‍ന്നു കൊണ്ടായിരുന്നു പിണറായി വിജയന്റെ മറുപടി.