തമിഴ്‌നാട് തിരുനെല്‍വേലിയിലെ തരുവൈ ഗ്രാമത്തില്‍ ഭാര്യയുമായി വഴക്കുണ്ടായതിനെ തുടര്‍ന്ന് മൂന്നു കുട്ടികളെ കൊലപ്പെടുത്തിയശേഷം യുവാവ് ജീവനൊടുക്കി. നിര്‍മാണ തൊഴിലാളിയായ രാജശേഖരനാണ് കുട്ടികളെ കൊലപ്പെടുത്തിയശേഷം ജീവനൊടുക്കിയത്. മുത്തുലക്ഷ്മി, കാവ്യ, ആര്യ എന്നീ കുട്ടികളെയാണ് ഇയാള്‍ കൊലപ്പെടുത്തിയത്. കുട്ടികള്‍ മൂന്നുപേരും എട്ടു വയസിനു താഴെ പ്രായമുള്ളരാണ്.
സംഭവത്തെകുറിച്ച് പോലീസ് പറയുന്നതിങ്ങനെ: മദ്യപിച്ചശേഷം രാജശേഖരന്‍ ഭാര്യ മേഗലയുമായി സ്ഥിരമായി വഴക്കുണ്ടാക്കിയിരുന്നു. കഴിഞ്ഞദിവസത്തെ വഴക്കിനിടെ മേഗല ഇവരുടെ കുടുംബവീട്ടിലേക്കു പോയി. കുട്ടികളെ ഒപ്പം കൊണ്ടുപോകാന്‍ ഇവര്‍ ശ്രമിച്ചെങ്കിലും രാജശേഖരന്‍ മര്‍ദിച്ചതിനെ തുടര്‍ന്ന് മേഗല ഈ ശ്രമത്തില്‍നിന്നു പിന്‍മാറി. പിന്നാലെ കുട്ടികള്‍ക്കു വിഷം കലര്‍ന്ന ഭക്ഷണം നല്‍കിയശേഷം രാജശേഖരന്‍ ഉറങ്ങാന്‍ പോയി. രാവിലെ ഉറക്കമുണര്‍പ്പോള്‍ കുട്ടികളെ മരിച്ചനിലയില്‍ കണ്ടെടത്തിയതിനെ തുടര്‍ന്ന് ഇയാള്‍ മണ്ണെണ്ണയൊഴിച്ച് സ്വയം തീകൊളുത്തുകയായിരുന്നു.
ഇയാളുടെ നിലവിളി കേട്ട് ഓടിയെത്തിയ നാട്ടുകാരാണ് മൃതദേഹങ്ങള്‍ കണ്ടെത്തിയത്. ഉടന്‍തന്നെ രാജശേഖരനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.