കുട്ടികള്‍ക്കെതിരായ ലൈംഗിക അതിക്രമം തടയല്‍ നിയമ(പോക്സോ)ത്തിന്റെ പരിധിയില്‍ മുസ്ലിം വ്യക്തിനിയമം വരില്ലെന്നു ഡല്‍ഹി ഹൈക്കോടതി. മുസ്ലിം പെണ്‍കുട്ടികളുടെ വിവാഹപ്രായത്തില്‍ പോക്സോയും മുസ്ലിം വ്യക്തിനിയമവും തമ്മില്‍ വൈരുധ്യം നിലനില്‍ക്കുകയാണെന്നും കോടതി നിരീക്ഷിച്ചു. 15 വയസുള്ള പെണ്‍കുട്ടിയെ 18 വയസുകാരന്റെ കൂടെ ജീവിക്കാന്‍ അനുവദിച്ചുകൊണ്ടാണ് ദക്ഷിണ ഡല്‍ഹി അഡീഷനല്‍ സെഷന്‍സ് ജഡ്ജി വിനോദ് യാദവിന്റെ ഉത്തരവ്. 

പെണ്‍കുട്ടിയുടെ മാതാവ് നല്‍കിയ പരാതി ഹൈക്കോടതി തള്ളി. യുവാവ് തന്റെ മകളെ വശീകരിച്ചു തട്ടിക്കൊണ്ടുപോയെന്നു കാണിച്ച് ദക്ഷിണ ഡല്‍ഹിയിലെ വീട്ടമ്മയാണ് കോടതിയെ സമീപിച്ചത്. പെണ്‍കുട്ടിയുടെ ഉമ്മയുടെ പരാതിയില്‍ പോലീസ് കര്‍ശന വകുപ്പുകളുള്ള പോക്സോ പ്രകാരം യുവാവിനെതിരേ കേസെടുക്കുകയും ചെയ്തു. തട്ടിക്കൊണ്ടു പോകല്‍, ബലാല്‍സംഗം എന്നീ കുറങ്ങളാണു യുവാവിനെതിരേ ചുമത്തിയത്. പെണ്‍കുട്ടിയുടെ മൊഴി മജിസ്ട്രേറ്റ് മുമ്പാകെ രേഖപ്പെടുത്തിയ ശേഷം അവര്‍ മാതാപിതാക്കളുടെ കൂടെ പോകാന്‍ കൂട്ടാക്കിയില്ല. ഇതേതുടര്‍ന്ന് അഭയകേന്ദ്രത്തിലേക്കു മാറ്റുകയായിരുന്നു. കേസ് പരിഗണിക്കവെ പെണ്‍കുട്ടിയെ തട്ടിക്കൊണ്ടുപോയി എന്ന ആരോപണം കോടതി തള്ളി. 

ഋതുമതിയാവുന്നതോടെ മുസ്ലിം വ്യക്തിനിയമത്തില്‍ പെണ്‍കുട്ടികള്‍ക്കു വിവാഹപ്രായമെത്തി. ഇക്കാരണത്താല്‍ 15 വയസുകാരിയുടെ വിവാഹം വ്യക്തിനിമയപ്രകാരം സാധുവാണ്. നിയമപ്രകാരം പെണ്‍കുട്ടിക്കു വിവാഹപ്രായം എത്തിയിട്ടില്ലെങ്കിലും മുസ്ലിം വ്യക്തിനിയമപ്രകാരം ഇരുവരും വിവാഹിതരായി ജീവിക്കുന്നതിന് എതിരല്ലെന്ന് കോടതി വ്യക്തമാക്കി. പ്രായപൂര്‍ത്തിയെത്താത്ത പെണ്‍കുട്ടികള്‍ ചൂഷണംചെയ്യപ്പെടുന്നത് തടയാന്‍ പോക്സോ നിയമം അപര്യാപ്തമാണെന്നും കോടതി നിരീക്ഷിച്ചു. 

പോക്സോ പ്രകാരം 15 വയസുകാരിക്ക് പ്രായപൂര്‍ത്തിയായിട്ടില്ല. മാത്രമല്ല, വിവാഹത്തിന് സമ്മതം തേടാനുള്ള പ്രായവും ആയിട്ടില്ല. എന്നാല്‍ കേസിലെ പെണ്‍കുട്ടി വിശ്വസിക്കുന്ന വ്യക്തിനിയമപ്രകാരം പെണ്‍കുട്ടിക്കു വിവാഹം കഴിക്കാവുന്നതുമാണ്. പോക്സോ നിയമമാക്കിയപ്പോള്‍ ഇത്തരത്തിലുള്ള ഘടകങ്ങള്‍ പാര്‍ലമെന്റ് മുന്‍കൂട്ടിക്കണ്ടില്ലെന്നും കോടതി അഭിപ്രായപ്പെട്ടു.