എ.ടി.എം വാന്‍ തുറന്ന് കിടന്നതോടെ 26.17 ലക്ഷം രൂപ നഷ്ടപ്പെട്ടു. ഡല്‍ഹിയിലെ രജീന്ദര്‍ നഗറിലാണ് സംഭവം. എ.ടി.എമ്മില്‍ പണം നിറയ്ക്കുന്നതിനിടെ പണമിരിക്കുന്ന വാനിന്റെ വാതില്‍ അടയ്ക്കാന്‍ മറന്നുപോയി. വാനില്‍ ഇരുന്ന ഒരു പെട്ടിയുമായി പിന്നാലെ വന്ന ബൈക്ക് യാത്രികര്‍ കടന്നുകളഞ്ഞു. 26.17 ലക്ഷം രൂപയായിരുന്നു പെട്ടിയിലുണ്ടായിരുന്നത്. 

സംഭവത്തില്‍ ജീവനക്കാരുടെ പങ്കും പരിശോധിച്ചുവരികയാണെന്ന് പോലീസ് പറയുന്നു. ഇയാള്‍ മനഃപൂര്‍വ്വമാണോ വാതില്‍ തുറന്നിട്ടതെന്നും പോലീസ് സംശയിക്കുന്നു. പണത്തിന്റെ സൂക്ഷിപ്പുകാരനായ ജിതേന്ദര്‍ സിംഗ് എ.ടി.എമ്മില്‍ പണം നിറയ്ക്കുന്നതിനിടെ സുരക്ഷാ ജീവനക്കാരായ മൊഹദ് നദീമും ഗൗരവും വാഹനത്തിനു സമീപം നില്‍ക്കുകയായിരുന്നു. ഈ സമയം രൈഡവര്‍ സഞ്ജയും പുറത്തേക്കിറങ്ങി. വാനിന്റെ വാതിലും പെട്ടിയും അടയ്ക്കാതെ ഇവര്‍ സ്ഥലത്തുനിന്ന് മാറിനില്‍ക്കുമ്പോഴായിരുന്നു ബൈക്ക് യാത്രികര്‍ പണം തട്ടിയെടുത്തത്. മൂന്നു പേരാണ് ബൈക്കിലുണ്ടായിരുന്നത്. രണ്ടു കിലോമീറ്ററോളം ഇവര്‍ വാനിനെ പിന്തുടര്‍ന്നതായും കണ്ടെത്തി.

മോഷണം നടന്നശേഷമാണ് വിവരം ശ്രദ്ധയില്‍പെട്ടതെന്ന് സുരക്ഷാ ജീവനക്കാര്‍ പറയുന്നു. സ്ഥലത്തെ സിസിടിവി ദൃശ്യങ്ങള്‍ പരിശോധിച്ച് പോലീസ് പ്രതികളെ തിരിച്ചറിയാനുള്ള ശ്രമത്തിലാണ്. കാഷ് ഡെലിവറി കമ്പനിയുടെയും ജീവനക്കാരുടേയും വിവരങ്ങള്‍ ശേഖരിച്ച് അന്വേഷണം പുരോഗമിക്കുകയാണ്.