ബി.ജെ.പി അധ്യക്ഷന്‍ അമിത് ഷാ മുഖ്യപ്രതിയായ വ്യാജ ഏറ്റുമുട്ടല്‍ കേസ് വിചാരണ നടത്തിയ ജഡ്ജി ബി.എച്ച്. ലോയയുടെ ദുരൂഹ മരണത്തില്‍ അന്വേഷണ ആവശ്യം തള്ളിയ വിധി പുനഃപരിശോധിക്കണമെന്ന് ആവശ്യപ്പെട്ട് സുപ്രീംകോടതിയില്‍ ഹര്‍ജി. ജഡ്ജി ലോയയുടെ മരണത്തില്‍ അന്വേഷണം ആവശ്യപ്പെട്ടതിന് ചീഫ് ജസ്റ്റിസ് അധ്യക്ഷനായ സുപ്രീംകോടതി ബെഞ്ചിന്റെ രൂക്ഷവിമര്‍ശനമേറ്റുവാങ്ങിയ ഹര്‍ജിക്കാരായ ബോംബെ ലോയേഴ്‌സ് അസോസിയേഷനാണ് പുനഃപരിശോധന ഹരജിയുമായി പരമോന്നത കോടതിയെ സമീപിച്ചത്. 
ജഡ്ജി ലോയയുടെ മരണവുമായി ബന്ധപ്പെട്ട കേസില്‍ ജില്ല ജഡ്ജിമാരെ ക്രോസ് വിസ്താരം നടത്താന്‍പോലും തയാറാകാതെ വിധി പുറപ്പെടുവിച്ചതിലൂടെ സുപ്രീംകോടതിക്ക് തെറ്റുപറ്റിയെന്ന് ഹരജിയില്‍ പറയുന്നു. അവരെ ക്രോസ്‌വിസ്താരം ചെയ്യണമെന്ന ആവശ്യം ജുഡീഷ്യറിക്കെതിരായ അപവാദമായി സുപ്രീംകോടതി വിമര്‍ശിച്ചത് തെറ്റാണ്. 

മഹാരാഷ്ട്ര പൊലീസ് ഇന്റലിജന്‍സ് നടത്തിയ അന്വേഷണം മാത്രമാണ് ആകെക്കൂടി സുപ്രീംകോടതി വിധിക്ക് അടിസ്ഥാനമാക്കിയത്. എന്നിട്ടും ഈ അന്വേഷണ റിപ്പോര്‍ട്ട് ഒരു സത്യവാങ്മൂലത്തിന്റെ രൂപത്തില്‍ സുപ്രീംകോടതിയില്‍ സമര്‍പ്പിക്കാന്‍പോലും മഹാരാഷ്ട്ര സര്‍ക്കാര്‍ തയ്യാറായിട്ടില്ല. പൊതുതാല്‍പര്യത്തിന് ഹാനികരമായ നടപടിയാണ് അതിലൂടെ സര്‍ക്കാരിന്റെ ഭാഗത്തു നിന്നുണ്ടായത്. അതിനാല്‍ സുപ്രീംകോടതി നേരത്തേ പുറപ്പെടുവിച്ച വിധി പുനഃപരിശോധിക്കണമെന്നും തിരിച്ചുവിളിക്കണമെന്നും ബോംബെ ലോയേഴ്‌സ് അസോസിയേഷന്‍ ഹരജിയില്‍ ആവശ്യപ്പെട്ടു. ഏപ്രില്‍ 19ന് പുറപ്പെടുവിച്ച വിവാദ വിധിയില്‍ ജഡ്ജി ബ്രിജ് ഗോപാല്‍ ഹര്‍കിഷന്‍ ലോയയുടെ മരണം സ്വാഭാവികമാണെന്ന് പ്രഖ്യാപിച്ച സുപ്രീംകോടതി മരണവുമായി ബന്ധപ്പെട്ട് ഭാവിയിലുണ്ടാകാവുന്ന നിയമനടപടികള്‍ക്കും എന്നെന്നേക്കുമായി തടയിട്ടിരുന്നു.
മഹാരാഷ്ട്ര പൊലീസ് രേഖാമൂലം നല്‍കിയ പ്രസ്താവനകളുടെ അടിസ്ഥാനത്തിലാണ് അന്വേഷണം ആവശ്യമില്ലെന്ന് സുപ്രീംകോടതി വിധിച്ചത്. മരിച്ച ദിവസം ജഡ്ജി ലോയയുടെ കൂടെയുണ്ടായിരുന്ന നാലു ജഡ്ജിമാരുടെ മൊഴിയിലെ വൈരുധ്യങ്ങള്‍ സുപ്രീംകോടതിക്കു മുമ്പാകെ ഹരജിക്കാരുടെ അഭിഭാഷകര്‍ എടുത്തുകാട്ടിയിരുന്നെങ്കിലും ആ നാല് പ്രസ്താവനകളില്‍ ഒരു തര്‍ക്കംപോലുമില്ല എന്നായിരുന്നു സുപ്രീംകോടതിയുടെ നിലപാട്.