ഭരണഘടന ഉറപ്പ് നല്‍കുന്ന ജനാധിപത്യ തത്വങ്ങളെയും രാജ്യത്തിന്റെ മതേതരത്വത്തെയും ബാധിക്കാവുന്ന തരത്തിലുള്ള പ്രക്ഷുബ്ദമായ ഒരു രാഷ്ട്രീയ സാഹചര്യമാണ് രാജ്യത്ത് നിലവിലുള്ളതെന്ന് ഡല്‍ഹി ആര്‍ച്ച് ബിഷപ്പ്. ഇന്ത്യയ്ക്ക് വേണ്ടിയുള്ള പ്രാര്‍ത്ഥനാ പ്രചാരണത്തിന് ആഹ്വാനം നല്‍കി പുറത്തിറക്കിയ ഇടയലേഖനത്തിലാണ് ഡല്‍ഹി ആര്‍ച്ച് ബിഷപ് അനില്‍ കൗട്ടോയുടെ ഇത്തരമൊരു പ്രസ്താവന. രാജ്യത്തിന്റെ പുനഃരുദ്ധാരണത്തിനായി എല്ലാ വെള്ളിയാഴ്ചയും ഉപവാസം അനുഷ്ഠിക്കണമെന്നും ഇടയലേഖനത്തിലൂടെ ബിഷപ്പ് വിശ്വാസികളോട് ആഹ്വാനം ചെയ്യുന്നുണ്ട്.

രാജ്യത്തിനു വേണ്ടിയും നമ്മുടെ രാഷ്ട്രീയ നേതാക്കള്‍ക്കു വേണ്ടിയും പ്രാര്‍ത്ഥിക്കുക എന്നത് പരിശുദ്ധമായ ആചാരമാണ്.പ്രത്യേകിച്ച് പൊതുതിരഞ്ഞെടുപ്പ് അടുത്തിരിക്കുന്ന ഈ സമയത്ത്. 2019 ല്‍ രാജ്യത്ത് ഒരു പുതിയ സര്‍ക്കാര്‍ വരുന്നത് മുന്നില്‍ക്കണ്ട് പ്രാര്‍ത്ഥനാ യജ്ഞം ആരംഭിക്കുമെന്നറിയിച്ചു കൊണ്ടുള്ള ഇടയലേഖനം ഇക്കഴിഞ്ഞ എട്ടാം തീയതിയാണ് ബിഷപ്പ് പുറത്തിറക്കിയിരിക്കുന്നത്.

അതേസമയം കത്ത് വിവാദമായതോടെ വിശദീകരണവുമായി ആര്‍ച്ചു ബിഷപ്പിന്റെ ഓഫീസ് രംഗത്തെത്തിയിട്ടുണ്ട്. മുന്‍കാലങ്ങളിലും തിരഞ്ഞെടുപ്പ് കാലത്ത് ഇത്തരം കത്തുകള്‍ എഴുതിയിട്ടുണ്ടെന്നും ആര്‍ച്ചു ബിഷപ്പിന്റെ കത്ത് സര്‍ക്കാരിനോ പ്രധാനമന്ത്രിക്കോ എതിരല്ലെന്നുമാണ് ഓഫീസിന്റെ വിശദീകരണം.