ശബരിമലയില്‍ പോകുന്നവരുടെ എണ്ണം നോക്കിയാല്‍ ഒന്നാം സ്ഥാനത്തുള്ളത് കമ്മ്യൂണിസ്റ്റുകാരായിരിക്കുമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. എല്‍ഡിഎഫ് ഒരു വിശ്വാസികള്‍ക്കും എതിരല്ലെന്നും അദ്ദേഹം പറഞ്ഞു. ശബരിമലയില്‍ പോകുന്നവരല്ലാം കോണ്‍ഗ്രസുകാരാണന്നാണ് ചിലരുടെ ധാരണ. എന്നാൽ താൻ ആഭ്യന്തര മന്ത്രിയായിരുന്ന കാലത്ത് ശബരിമല സന്ദര്‍ശിച്ചപ്പോള്‍, ലാല്‍സലാം വിളിച്ചാണ് അവിടെയുളളവര്‍ തന്നെ അഭിവാദ്യം ചെയ്തത് എന്നും കോടിയേരി പറഞ്ഞു.

അരൂരില്‍ ഇടതുസ്ഥാനാര്‍ത്ഥി മനു സി പുളിക്കലിനെതിരെ മതപരമായ ധ്രുവീകരണത്തിന് രമേശ് ചെന്നിത്തല ശ്രമിക്കുന്നുവെന്നും കോടിയേരി കുറ്റപ്പെടുത്തുകയുണ്ടായി. ഹിന്ദുമത വിശ്വാസി ആയ ശങ്കര്‍ റെയെ തോല്‍പ്പിക്കണം എന്ന് കാസര്‍കോട്ട് യുഡിഎഫ് പ്രചരിപ്പിക്കുന്നു. മാത്രമല്ല കഴിഞ്ഞ ലോക്‌സഭാ തെരഞ്ഞെടുപ്പ് സമയത്ത് ഇടതു സ്ഥാനാര്‍ത്ഥി സതീഷ് ചന്ദ്രന്‍ അവിശ്വാസി ആണെന്നായിരുന്നു പറഞ്ഞിരുന്നതെന്നും കോടിയേരി പറയുകയുണ്ടായി. മതവും ജാതിയും പറഞ്ഞു യുഡിഎഫ് വോട്ട് പിടിക്കുകയാണെന്ന് പറഞ്ഞ അദ്ദേഹം വര്‍ഗീയധ്രുവീകരണത്തിനാണ് അവരുടെ ശ്രമമെന്നും ചൂണ്ടിക്കാണിക്കുകയുണ്ടായി.