വീണ്ടും മലയാളിക്ക് ഭാഗ്യ സമ്മാനം. ദുബായ് ഡ്യൂട്ടി ഫ്രീ നറുക്കെടുപ്പിലാണ് ഭാഗ്യം മലയാളി യുവാവിനെ തേടി എത്തിയത് തൃശൂര്‍ സ്വദേശി അജിത് നരേന്ദ്രനാണ് കഴിഞ്ഞ ദിവസം നടന്ന നറുക്കെടുപ്പില്‍ 10 ലക്ഷം ഡോളര്‍ (7.5 കോടിയിലധികം ഇന്ത്യന്‍ രൂപ) സമ്മാനം ലഭിച്ചത്. സുഹൃത്തിനൊപ്പമാണ് അജിത് ഭാഗ്യം പരീക്ഷിക്കാന്‍ ടിക്കറ്റെടുത്തിരുന്നത്. 329-ാം സീരീസിലുള്ള 2657 നമ്പര്‍ ടിക്കറ്റാണ് ഇരുവരെയും കോടീശ്വരന്മാരാക്കിയത്.

അബുദാബി മാരിയറ്റ് ഹോട്ടലില്‍ പര്‍ച്ചേസിങ് മാനേജരായിരുന്ന അജിത് ജോലി നഷ്ടപ്പെട്ട് നാട്ടിലേക്ക് മടങ്ങാനിരിക്കുകയായിരുന്നു. 47 വയസുകാരനായ അദ്ദേഹം മൂന്ന് വര്‍ഷം മുമ്പാണ് അബുദാബിയിലെത്തിയത്. ഭാര്യയും രണ്ട് മക്കളും നാട്ടിലാണ്. സമ്മാനവിവരം അറിയിച്ചുകൊണ്ട് സംഘാടകര്‍ ഫോണില്‍ ബന്ധപ്പെട്ടപ്പോള്‍ വിശ്വസിക്കാനായില്ലെന്ന് അദ്ദേഹം പ്രദേശിക മാധ്യമങ്ങളോട് പറഞ്ഞു. അടുത്തിടെയാണ് ഓണ്‍ലൈനായി ഡ്യൂട്ടി ഫ്രീ നറുക്കെടുപ്പ് ടിക്കറ്റുകള്‍ വാങ്ങാന്‍ തുടങ്ങിയത്. ഇപ്പോഴത്തെ സാഹചര്യത്തില്‍ നറുക്കെടുപ്പും ടിക്കറ്റുമൊന്നും പിന്നീട് മനസില്‍ പോലും ഉണ്ടായിരുന്നില്ലെന്നും അദ്ദേഹം പറഞ്ഞു. ഇത്തവണത്തെ ദുബായ് ഡ്യൂട്ടി ഫ്രീ നറുക്കെടുപ്പിലെ രണ്ടും മൂന്നും സമ്മാനങ്ങളും മലയാളികള്‍ക്ക് തന്നെയാണ്. ബര്‍ദുബായില്‍ താമസിക്കുന്ന ടി. അബ്ദുല്‍ ജലീലിനും മറ്റൊരു മലയാളിയായ രാജേഷ് ബാലന്‍ പടിക്കലിനുമാണ് ആഢംബര ബൈക്കുകള്‍ സമ്മാനം ലഭിച്ചത്.

അതേസമയം കഴിഞ്ഞ ദിവസത്തെ യൂറോ ജാക്പോട്ടിന്റെ വന്‍ തുകയായ തൊണ്ണൂറ് ദശലക്ഷം യൂറോ (90 മില്യന്‍ യൂറോ) ഏകദേശം എഴുന്നൂറ് കോടിയുടെ അവകാശിയായത് ജര്‍മനിയിലെ ഒരു ഇരുപത്തിയഞ്ചുകാരന്‍ യൂണിവേഴ്സിറ്റി വിദ്യാര്‍ഥിയായിരുന്നു. ജര്‍മനിയുടെ തെക്കന്‍ സംസ്ഥാനമായ ബയേണിലെ മ്യൂണിക്ക് നഗരത്തില്‍ നിന്നാണ് ഈ ഭാഗ്യാവാനെന്ന് ലോട്ടറി അധികൃതര്‍ മാധ്യമങ്ങളെ അറിയിച്ചു.

സുരക്ഷാകാരണങ്ങളാല്‍ ഈ ഭാഗ്യവാനെപ്പറ്റിയുള്ള കൂടുതല്‍ വിവരങ്ങള്‍ ലോട്ടറി അധികൃതര്‍ പുറത്ത് വിട്ടില്ല. ഈ വന്‍ തുകയ്ക്കായി കേവലം പതിനാറ് യൂറോ, ഇരുപത്തിയഞ്ച് സെന്റാണ് ഈ വിദ്യാര്‍ഥി മുടക്കിയത്. കളി അവസാനിക്കുന്നതിന് രണ്ട് മിനിറ്റ് മുമ്പാണ് ഇയാള്‍ ലോട്ടറി കളിച്ചതെന്ന് ലോട്ടറി അധികൃതര്‍ വെളിപ്പെടുത്തി. ലോട്ടറി ടിക്കറ്റ് ഇയാള്‍ അധികൃതര്‍ക്ക് കൈമാറി. അടുത്ത ദിവസം തന്നെ ഈ വന്‍ തുക ഇയാളുടെ ബാങ്ക് അക്കൗണ്ടിലെത്തും.

ഇത്രയും വലിയ തുക എന്ത് ചെയ്യും എന്ന് ഇയാള്‍ക്ക് നിശ്ചയമില്ല എന്നാണ് ലോട്ടറി അധികൃതരെ ഇയാള്‍ അറിയിച്ചത്. ഇതിനായി പ്രത്യേക ഉപദേശകരെ ലോട്ടറി അധികൃതര്‍ തന്നെ ഇയാള്‍ക്ക് ഉടനെ ശുപാര്‍ശ ചെയ്തു കൊടുക്കുകയും 2020 ഡിസംബര്‍ 31 വരെ നികുതി ഈ വന്‍ തുകയ്ക്ക് സര്‍ക്കാര്‍ ചുമത്തുകയില്ല. ഇയാള്‍ക്ക് ഇഷ്ടം പോലെ പണം ചിലവിടാം. അതിന് കണക്ക് സൂക്ഷിക്കണ്ട.
പക്ഷേ, 2021 മുതല്‍ മിച്ചമുള്ള തുകയ്ക്ക് സര്‍ക്കാരിലേക്ക് വന്‍ തുക നികുതിയായി അടയ്ക്കേണ്ടി വരും. അതാണ് ലോട്ടറി നിയമം. 6,11,12,21,41 എന്നീ നമ്പരുകളോടൊപ്പം 1, 2 എന്നീ സൂപ്പര്‍ നമ്പരുകളും ചേര്‍ന്നാണ് ഈ വന്‍ തുകക്ക് ഈ വിദ്യാര്‍ഥി അവകാശിയായത്. കഴിഞ്ഞ നാലാഴ്ചയായി ജാക്പോട്ട് അടിയ്ക്കാതെ ഈ തുക വര്‍ധിച്ച് 90 മില്യന്‍ യൂറോയില്‍ എത്തുകയായിരുന്നു.

കോവിഡ് കാലമായതുകൊണ്ട് യൂണിവേഴ്സിറ്റി അടഞ്ഞ് കിടക്കുകയായിരുന്നു. ഹോട്ടലില്‍ പോയി എന്തെങ്കിലും ജോലി ചെയ്യാം എന്ന് കരുതി അതും അടഞ്ഞ് കിടക്കുന്നു. എന്തും വരട്ടെ എന്ന് കരുതിയാണ് മിച്ചം വെച്ച തുക വെച്ച് ലോട്ടറി കളിച്ചതെന്ന് ഈ വിദ്യാര്‍ഥി ലോട്ടറി അധികൃതരോട് തന്റെ പിന്നാമ്പുറ കഥ വെളിപ്പെടുത്തി. യൂറോപ്പിലെ പതിനെട്ടിലധികം രാജ്യങ്ങളില്‍ നിന്നുള്ളവര്‍ എല്ലാം വെള്ളിയാഴ്ചയും യൂറോ ലോട്ടറിയില്‍ പങ്കുചേര്‍ന്ന് ഭാഗ്യം അന്വേഷിക്കാറുണ്ട്. ഹെല്‍സിങ്കിയാണ് യൂറോ ലോട്ടറിയുടെ ആസ്ഥാനം.