സാമൂഹ്യവ്യാപനം സ്ഥിരീകരിച്ച ഒമാനിൽ ഇന്നലെ കോവിഡ് 19 ബാധിച്ച് രണ്ട് മലയാളികൾ കൂടി മരിച്ചു. പത്തനംതിട്ട കോഴഞ്ചേരി പാറോലില്‍ മാത്യൂ ഫിലിപ്പ് എന്ന സണ്ണി (70), പാലക്കാട് തിരുവല്ലാമല പഴമ്പാലക്കോട് തോട്ടത്തില്‍ വീട്ടില്‍ ശശിധരന്‍ (58) എന്നിവരാണ് കൊറോണ ബാധ മൂലം മരിച്ചത്. ഇതോടെ ഒമാനിൽ കോവിഡ് ബാധിച്ച് മരിച്ച മലയാളികളുടെ എണ്ണം 11 ആയി ഉയരുകയുണ്ടായി.

ബുധനാഴ്ച രാത്രി പത്ത് മണിയോടെയാണ് മാത്യൂ ഫിലിപ്പ് രോഗം മൂർച്ഛിച്ചതിനെ തുടർന്ന് മരിച്ചത്. കോവിഡ് ലക്ഷണങ്ങളെ തുടര്‍ന്ന് ഈ മാസം രണ്ട് മുതല്‍ റൂവിയിലെ സ്വകാര്യ ആശുപത്രിയില്‍ ചികിത്സയില്‍ കഴിയുകയായിരുന്നു. രോഗം ഗുരുതരമായതിനെ തുടര്‍ന്ന് 17ാം തിയതി റോയല്‍ ആശുപത്രിയിലേക്ക് വിദഗ്ധ ചികിത്സയ്ക്കായി മാറ്റുകയായിരുന്നു. ദിവസങ്ങളായി ഇവിടെ തീവ്ര പരിചരണ വിഭാഗത്തില്‍ ചികിത്സയിലായിരുന്നു ഇദ്ദേഹം.

കഴിഞ്ഞ 46 വര്‍ഷമായി ഒമാനില്‍ പ്രവാസിയായ മാത്യൂ ഫിലിപ്പ് ഹൈപ്പര്‍മാര്‍ക്കറ്റ് നടത്തിവരികയായിരുന്നു. ഒമാൻ മാർത്തോമ്മാ ചർച്ച് ഇടവകാംഗമാണ് ഇദ്ദേഹം. ഭാര്യ ബീന, മക്കൾ സീബു, സീന, സിൻസി. നടപടിക്രമങ്ങൾ പൂർത്തിയാക്കി മൃതദേഹം ഒമാനിൽത്തന്നെ കോവിഡ് പ്രോട്ടോകോൾ പ്രകാരം സംസ്കരിക്കും.

അതോടൊപ്പം തന്നെ ശശിധരനും ബുധനാഴ്ച രാത്രി റോയല്‍ ആശുപത്രിയില്‍ വെച്ചാണ് മരിച്ചത്. കോവിഡ് ബാധയെ തുടര്‍ന്ന് ഈ മാസം എട്ടിന് അല്‍ നഹ്ദ ആശുപത്രിയില്‍ പ്രവേശിപ്പിച്ചിരുന്ന ശശിധരനെ രോഗം മൂര്‍ച്ഛിച്ചതിനെ തുടര്‍ന്ന് റോയല്‍ ആശുപത്രിയിലേക്ക് ഇദ്ദേഹത്തെ മാറ്റുകയായിരുന്നു. 15 ദിവസമായി ഇവിടെ തീവ്രപരിചരണ വിഭാഗത്തില്‍ കഴിയുകയായിരുന്നു. റൂവി ഹമരിയയില്‍ തയ്യല്‍ ജോലിക്കാരന്‍ ആയിരുന്നു ഇദ്ദേഹം. നേരത്തെ സൗദിയില്‍ പ്രവാസിയായിരുന്ന ശശിധരന്‍ ഒരു വര്‍ഷം മുമ്പാണ് ഒമാനില്‍ തിരികെ എത്തിയത്.ഭാര്യ: പങ്കജ ദേവി, മക്കള്‍: ശില്‍പ, അഖില്‍, അജിത്ത്. മരുമക്കള്‍: മിജീഷ്, ബിനുഷ എന്നിവരാണ്.