ഡ്രൈവ്–ത്രൂ കോവിഡ്–19 പരിശോധനക്ക് വിധേയമാകുന്നവരിൽ രോഗം സ്ഥിരീകരിക്കപ്പെട്ടാലല്ലാതെ അവരുടെ ഇഹ്തിറാസ് ആപ്പിൽ നിറം മാറില്ല. ടെസ്റ്റിന് വിധേയമാകുന്നതുകൊണ്ടുമാത്രം ഒരാളുടെ ആപ്പിൽ ചാര നിറം വരില്ല. പ്രൈമറി ഹെൽത്ത്കെയർ കോർപറേഷനാണ് ഇതുസംബന്ധിച്ച് ആളുകളുടെ സംശയവും ആശങ്കയും ദൂരീകരിച്ചിരിക്കുന്നത്. രോഗം സ്ഥിരീകരിച്ചാൽ മാത്രമേ ആപ്പിൽ നിറം മാറുകയുള്ളൂവെന്നും ആശങ്കപ്പെടേണ്ടതില്ലെന്നും പി എച്ച് സി സി വ്യക്തമാക്കി.

പി എച്ച് സി സിക്ക് കീഴിൽ നടക്കുന്ന ഡ്രൈവ്–ത്രൂ പരിശോധനക്ക് വിധേയമാകുന്നവരിൽ ഇഹ്തിറാസ് ആപ്പിൻറെ നിറം പച്ചയിൽ നിന്നും ചാരനിറമാകുമെന്ന ആശങ്കക്ക് അടിസ്ഥാനമില്ല. പരിശോധനാ ഫലം വരുന്നത് വരെ ഇപ്രകാരം സംഭവിക്കുകയില്ലെന്നും പി എച്ച് സി സി കാൻസർ എർലി സ്ക്രീനിങ് പ്രോഗ്രാം മേധാവി ഡോ. ശൈഖ അബൂ ശൈഖ പറഞ്ഞു.ഇത്തരം ആശങ്കകൾ ഒഴിവാക്കണമെന്നും ഇഹ്തിറാസിലെ സ്റ്റാറ്റസിലെ നിറം പരിശോധനാ ഫലവുമായി നേരിട്ടാണ് ബന്ധിപ്പിച്ചിരിക്കുന്നതെന്നും ഡോ. അബൂ ശൈഖ വ്യക്തമാക്കി.പി എച്ച് സി സിയിൽ നിന്ന് പ്രത്യേകം മൊബൈൽ വഴി ക്ഷണിക്കപ്പെട്ടവരെ മാത്രമേ പരിശോധനക്ക് വിധേയമാക്കുകയുള്ളൂ.

രോഗം നേരത്തേ കണ്ടെത്തുന്നതിനും രോഗവ്യാപനം തടയാനും ഇത് ഏറെ സഹായകരമാണ്. പി എച്ച് സി സിയുടെ ലഅബൈബ്, അൽ വഅബ്, അൽ തുമാമ എന്നീ ഹെൽത്ത് സെൻററുകളിലാണ് ഇത്തരത്തിൽ പരിശോധന നടക്കുന്നത്. പദ്ധതിക്ക് കീഴിൽ സ്വാബിംഗ് ഹബ്ബുകൾ (സ്രവം ശേഖരിക്കുന്ന കേന്ദ്രങ്ങൾ) ഈ കേന്ദ്രങ്ങളിൽ സജ്ജമാക്കിയിട്ടുണ്ട്. സമൂഹ വ്യാപനത്തിെൻറ തോത് കണ്ടെത്തുന്നതിനും ൈഡ്രവ്–ത്രൂ സ്വാബിംഗ് ഹബ്ബുകൾ ഏറെ സഹായിക്കുന്നു. വയസ്സ്, ലിംഗം, ദേശം എന്നിവയുടെ അടിസ്ഥാനത്തിൽ സമൂഹത്തിൽ നിന്നും ക്രമരഹിതമായി തെരഞ്ഞെടുക്കുന്നവർക്കാണ് പരിശോധനക്കായി ക്ഷണം അയക്കുന്നത്.

തെരഞ്ഞെടുത്തവരുടെ മൊബൈലിലേക്ക് എസ്് എം എസ് അയക്കുന്നതോടെയാണ് നടപടികൾക്ക് തുടക്കമാകുക. എസ് എം എസ് ലഭിക്കുന്നതോടെ ഒൺലൈൻ രെജിസ്േട്രഷൻ പൂർത്തീകരിക്കണം. ഇത് സ്ഥിരീകരിച്ച് പി എച്ച് സി സി ടെസ് റ്റിനായി ഹാജരാകേണ്ട കേന്ദ്രവും സമയവും അറിയിക്കും. അധികൃതരുടെ നിർദേശ പ്രകാരം സ്വന്തം വാഹനത്തിൽ നിർണിത ടെസ്റ്റിംഗ് ഹെൽത്ത് സെൻററിലെത്തി ആരോഗ്യ പ്രവർത്തകർ നൽകുന്ന ചോദ്യാവലി വാഹനത്തിലിരുന്ന് തന്നെ പൂരിപ്പിച്ച് നൽകണം. വാഹനത്തിൽ നിന്നിറങ്ങാതെ തന്നെ ആരോഗ്യപ്രവർത്തകർ വ്യക്തിയുടെ മൂക്കിൽ നിന്നും തൊണ്ടയിൽ നിന്നും സ്രവം എടുത്ത് പരിശോധനക്കയക്കും. പരിശോധനയുടെ ഫലം പിന്നീട് എസ് എം എസ് അയക്കും. കോവിഡ്–19 രോഗിയുമായി നേരത്തേ സമ്പർക്കം പുലർത്തിയവരാണെങ്കിൽ ഫലം വരുന്നത് വരെ സമ്പർക്ക വിലക്കിൽ വീട്ടിൽ കഴിയേണ്ടി വരും.