വന്ദേഭാരത് മിഷന്... യു.എ.ഇയിലേക്ക് മടങ്ങാന് കാത്തിരിക്കുന്നവര്ക്കായി ജൂലൈ 12 മുതല് വിമാന സര്വിസ് ആരംഭിക്കുന്നു
യു.എ.ഇയിലേക്ക് ഇന്ത്യയില് നിന്ന് മടങ്ങാന് കാത്തിരിക്കുന്നവര്ക്കായി ജൂലൈ 12 മുതല് വിമാന സര്വിസ് ആരംഭിക്കുന്നു. വന്ദേഭാരത് മിഷനില് ഉള്പ്പെടുത്തിയാണ് സര്വിസ് തുടങ്ങുന്നത്. യു.എ.ഇയില് താമസ വിസയുള്ളവര്ക്കാണ് നിലവില് അവസരം. ഇതിനായി എയര് ഇന്ത്യ എക്സ്പ്രസിന്റെ വെബ്സൈറ്റ് വഴി ടിക്കറ്റ് ബുക്ക് ചെയ്യാം. 26 വരെയുള്ള ബുക്കിങ്ങാണ് ഇപ്പോള് ആരംഭിച്ചിരിക്കുന്നത്.അംഗീകൃത ട്രാവല് ഏജന്റുമാര്, കോള് സന്റെര് എന്നിവ മുഖേനയും ടിക്കറ്റ് ബുക്ക് ചെയ്യാം.
24,000 മുതല് 30,000 രൂപ വരെയാണ് ടിക്കറ്റ് നിരക്ക്. യു.എ.ഇയില് നിന്ന് കേരളത്തിലേക്ക് മടങ്ങുന്നവരില് നിന്ന് 15,000 രൂപയാണ് ഈടാക്കിക്കൊണ്ടിരിക്കുന്നത്.കേരളത്തില് നിന്ന് 51 വിമാനങ്ങളാണ് ഏര്പ്പെടുത്തിയിരിക്കുന്നത്. കൊച്ചി 21, കോഴിക്കോട് 15, തിരുവനന്തപുരം ഒമ്പത്, കണ്ണൂര് ആറ് എന്നിങ്ങനെയാണ് വിമാനങ്ങളുടെ എണ്ണം. അബൂദബി, ഷാര്ജ, ദുബൈ വിമാനത്താവളങ്ങളിലേക്കാണ് സര്വിസ്. മടങ്ങിയെത്തുന്നവര്ക്ക് അംഗീകൃത ലാബില് നിന്നുള്ള കോവിഡ് നെഗറ്റിവ് സര്ട്ടിഫിക്കറ്റ് നിര്ബന്ധമാണ്. യാത്രക്ക് 96 മണിക്കൂറിനുള്ളില് നടത്തിയ പരിശോധനയുടെ ഫലമാണ് വേണ്ടത്.
യു.എ.ഇ ഫെഡറല് അതോറിറ്റി ഫോര് ഐഡന്റിറ്റി ആന്ഡ് സിറ്റിസന്ഷിപ്പിന്റെ (ഐ.സി.എ) വെബ്സൈറ്റില് (smartservices.ica.gov.ae) രജിസ്റ്റര് ചെയ്ത് അനുമതി നേടിയ ശേഷം വേണം ടിക്കറ്റെടുക്കാന്.
കോവിഡുമായി ബന്ധപ്പെട്ട് യു.എ.ഇ പുറത്തിറക്കിയ ഡി.എക്സ്.ബി സ്മാര്ട്ട് ആപ് നിര്ബന്ധമായും ഡൗണ്ലോഡ് ചെയ്തിരിക്കണം. ഇന്ത്യയില് നിന്ന് യു.എ.ഇയിലേക്ക് വിമാനങ്ങള് ചാര്ട്ടര് ചെയ്യാന് യു.എ.ഇയിലെ വിമാനക്കമ്പനികള്ക്ക് അനുമതി നല്കി.
"
https://www.facebook.com/Malayalivartha