അപ്രതീക്ഷിതമായ തിരിച്ചടികളാണ് ഗള്‍ഫ് രാഷ്ട്രങ്ങള്‍ പ്രവാസി മലയാളികള്‍ക്ക് നല്‍കുന്നത്. യാത്രാവിലക്ക് നീട്ടിയും സര്‍വീസില്‍ നിന്ന് ഒഴിവാക്കിയുമൊക്കെയുള്ള തീരുമാനങ്ങള്‍ വളരെയധികം ദോഷകരമായി പ്രവാസികളെ ബാധിക്കുന്നു. ഈ ഘട്ടത്തില്‍ മറ്റൊരു നീക്കം നടത്താന്‍ ഒരുങ്ങുകയാണ് പ്രവാസികള്‍.


ഇന്ത്യയില്‍നിന്നുള്ളവര്‍ക്ക് യു.എ.ഇ. പ്രവേശനവിലക്ക് കഴിഞ്ഞദിവസം നീട്ടിയിരുന്നു. ഇതോടെ നാട്ടില്‍ കുടുങ്ങിയ പ്രവാസി മലയാളികളുടെ ദുരിതം ഏറുകയാണ്. ഇത് മൂന്നാംതവണയാണ് പ്രവേശനവിലക്ക് നീട്ടുന്നത്.

ഏപ്രിലില്‍ തുടങ്ങിയ പ്രവേശനവിലക്ക് എത്രയും പെട്ടെന്ന് അവസാനിക്കുമെന്ന പ്രതീക്ഷയിലായിരുന്നു പ്രവാസികളും കാത്തിരുന്നത് . പ്രതികൂല സാഹചര്യങ്ങളായിട്ടും അടുത്ത ബന്ധുക്കളുടെ മരണം ഉള്‍പ്പെടെയുള്ള അത്യാവശ്യങ്ങള്‍ക്ക് നാട്ടില്‍ പോയവരാണ് കുടുങ്ങിയവരിലേറെയും. വിസ കാലാവധി കഴിയാറായതോടെ തൊഴില്‍ നഷ്ടപ്പെടുമെന്ന് ആശങ്കയുള്ളവരും എങ്ങിനെയെങ്കിലും യു.എ.ഇ.യിലെത്താന്‍ ശ്രമിക്കുകയാണ്.

നിലവില്‍ വിസ കാലാവധി കഴിഞ്ഞവരുടെ കാര്യത്തില്‍ അനുകൂലമായ മാനുഷികപരിഗണന യു.എ.ഇ. അധികൃതരില്‍നിന്ന് ഉണ്ടാകുമെന്നാണ് പ്രവാസികളുടെ പ്രതീക്ഷ. ഇക്കാര്യത്തില്‍ ദുബായ് ഇന്ത്യന്‍ കോണ്‍സല്‍ ജനറല്‍ ഡോ. അമാന്‍പുരിയും കഴിഞ്ഞ ദിവസം ഉറപ്പ് കൊടുത്തിരുന്നു.

വിഷയം യു.എ.ഇ. അധികൃതരുടെ ശ്രദ്ധയില്‍പ്പെടുത്തിയിട്ടുണ്ടെന്നും അനുഭാവപൂര്‍വമായ തീരുമാനം ഉണ്ടാകുമെന്നും ഇന്ത്യന്‍ സ്ഥാനപതി പവന്‍ കപൂറും അറിയിച്ചിരുന്നു.

കോവിഡ് വാക്‌സിന്‍ സ്വീകരിച്ചവര്‍ക്കെങ്കിലും യു.എ.ഇ.യില്‍ എത്രയും പെട്ടെന്ന് എത്താനുള്ള സാഹചര്യമൊരുക്കണമെന്നാണ് പ്രവാസികളുടെ ഉയര്‍ത്തുന്ന പ്രധാന ആവശ്യം. ഇക്കാര്യത്തില്‍ കേന്ദ്രസര്‍ക്കാര്‍ ഇടപെടണമെന്നും ആവശ്യമുയരുന്നുണ്ട്.

നാട്ടില്‍ കുടുങ്ങിയതോടെ യു.എ.ഇ.യിലെ സ്വന്തംസ്ഥാപനം മുന്നോട്ട് കൊണ്ടുപോകാന്‍ കഴിയാതെ പ്രയാസപ്പെടുന്നവരുമുണ്ട്. ദുബായില്‍ സ്വന്തമായി ചെറിയ ടെക്സ്‌റ്റൈല്‍ ഷോപ്പ് നടത്തിയ എറണാകുളം പാലാരിവട്ടം സ്വദേശികളായ മുകേഷ്ലാലിനും കുടുംബത്തിനും നാട്ടില്‍ കുടുങ്ങിയതോടെ ഷോപ്പ് അടക്കേണ്ടി വന്നു.

നീണ്ടകാലത്തെ അധ്വാനവും വന്‍മുതല്‍മുടക്കും വെറുതെ ആയതിന്റെ വിഷമത്തിലാണ് പലരും. കൂടാതെ വിസാ കാലാവധി കഴിയാറായതും വലിയ മാനസിക പ്രയാസമുണ്ടാക്കുന്നുണ്ട്.