ലുലു ഗ്രൂപ്പില്‍ നിന്നും ഒന്നരക്കോടിയുമായി മലയാളി ജീവനക്കാരന്‍ മുങ്ങി...
ലുലു ഗ്രൂപ്പിന്റെ അബുദാബി ഹൈപ്പര്‍ മാര്‍ക്കറ്റില്‍ ഒന്നരക്കോടിയുടെ തിരിമറി നടത്തി മലയാളി മുങ്ങിയതായി പരാതി. കണ്ണൂര്‍ നാറാത്ത് സുഹറ മന്‍സിലില്‍ പൊയ്യക്കല്‍ പുതിയ പുരയില്‍ മുഹമ്മദ് നിയാസി (38) നെതിരെയാണ് ലുലു ഗ്രൂപ്പ് അബുദാബി പോലീസില്‍ പരാതി നല്‍കിയത്. അബുദാബി ഖാലിദിയ മാളിലെ ലുലു ഹൈപ്പര്‍ മാര്‍ക്കറ്റ് ക്യാഷ് ഓഫീസ് ഇന്‍ ചാര്‍ജായിരുന്നു ഇയാള്‍. നിയാസ് കഴിഞ്ഞ 15 വര്‍ഷമായി ലുലു ഗ്രൂപ്പിലാണ് ജോലിചെയ്തിരുന്നത്. എംബസി മുഖാന്തരം നിയാസിനെതിരെ കേരള പോലീസിലും ലുലു ഗ്രൂപ്പ് പരാതി നല്‍കിയിട്ടുണ്ട്.
മാര്‍ച്ച് 25-ന് ഉച്ചയ്ക്കായിരുന്നു നിയാസിന് ഡ്യൂട്ടി. എന്നാല്‍ ഇയാള്‍ ഹാജരായില്ല. ഇതോടെ ഇയാളെ സഹപ്രവര്‍ത്തകര്‍ ഫോണില്‍ ബന്ധപ്പെടാന്‍ ശ്രമിച്ചു. ഫോണ്‍ സ്വിച്ച്ഡ് ഓഫായിരുന്നു. ഇതിനിടെ ഇയാളുടെ ഭാര്യയും കുട്ടികളും ആരെയും അറിയിക്കാതെ പെട്ടെന്ന് നാട്ടിലേക്ക് പോയെന്ന സൂചനയും ലഭിച്ചു. തുടര്‍ന്ന് ഹൈപ്പര്‍ മാര്‍ക്കറ്റ് അധികൃതര്‍ നടത്തിയ പരിശോധനയില്‍ ക്യാഷ് ഓഫിസില്‍നിന്ന് ആറ് ലക്ഷം ദിര്‍ഹത്തിന്റെ കുറവ് കണ്ടുപിടിച്ചു. ഇതോടെയാണ് പണവുമായി ഇയാള്‍ മുങ്ങിയെന്ന് സ്ഥിരീകരിച്ചത്. ഇയാള്‍ ക്യാഷ് ഓഫിസില്‍ ജോലിചെയ്യുന്നതുകൊണ്ട് പാസ്‌പോര്‍ട്ട് കമ്പനിയാണ് നിയമപ്രകാരം സൂക്ഷിക്കുന്നത്. അതിനാല്‍ നിയാസിന് യുഎഇ വിട്ടുപോകാനാകില്ല. ഇയാള്‍ രാജ്യത്ത് തന്നെയുണ്ടെന്ന പ്രതീക്ഷയിലാണ് പൊലീസും.
എറണാകുളം സ്വദേശിനിയായ ഭാര്യയും രണ്ട് കുട്ടികളും നിയാസിനൊപ്പം ഏറെനാളായി അബുദാബിയിലുണ്ടായിരുന്നു. നിയാസിന്റെ തിരോധാനത്തിനു ശേഷമാണ് ഇവര്‍ നാട്ടിലേക്ക് പോയതായി സൂചന ലഭിച്ചത്. അബുദാബി പൊലീസ് അന്വേഷണം ആരംഭിച്ചിട്ടുണ്ട്.
https://www.facebook.com/Malayalivartha
