സൗദി അറേബ്യയിലെ പടിഞ്ഞാറന്‍ മേഖലയിലെ ജിസാനിനടുത്തുണ്ടായ വാഹനാപകടത്തില്‍ മലയാളി ഉള്‍പ്പെടെ ഒമ്പത് ഇന്ത്യക്കാര്‍ മരിച്ച സംഭവത്തില്‍ ജിദ്ദയിലെ ഇന്ത്യന്‍ കോണ്‍സുലേറ്റ് അനുശോചനം രേഖപ്പെടുത്തി. മരിച്ചവരുടെ കുടുംബത്തിന് കോണ്‍സുലേറ്റ് പൂര്‍ണ്ണ പിന്തുണ ഉറപ്പുനല്‍കുകയും പ്രാദേശിക അധികാരികളുമായും ഇരകളുടെ ബന്ധുക്കളുമായും ബന്ധപ്പെട്ടിട്ടുണ്ടെന്നും സ്ഥിരീകരിച്ചു.

ജിസാനില്‍ ബസും ട്രക്കും കൂട്ടിയിടിച്ചാണ് അപകടം ഉണ്ടായത്. കൊല്ലം കുണ്ടറ സ്വദേശി വിഷ്ണു നിവാസില്‍ വിഷ്ണുപ്രസാദ് പിള്ള ഉള്‍പ്പെടെ 9 ഇന്ത്യക്കാരാണ് അപകടത്തില്‍ മരണപ്പെട്ടത്. ആകെ 15 പേര്‍ക്ക് അപകടത്തില്‍ ജീവന്‍ നഷ്ടമായി.

വിഷ്ണു പിള്ളയുടെ മൃതദേഹം നിയമനടപടികള്‍ പൂര്‍ത്തിയാക്കി നാട്ടിലെത്തിച്ച് സംസ്‌കരിക്കും. കൊല്ലം ചക്രപാണി റോഡില്‍ നന്ദാവന്‍ കോളനിയിലെ പ്രസാദ് മാധവന്‍ പിള്ളയുടെയും രാധ പ്രസാദ് പിള്ളയുടെയും മകനാണ് അവിവാഹിതനായ വിഷ്ണുപ്രസാദ്. 3 വര്‍ഷമായി സൗദിയിലെ എസിഐസി കമ്പനിയില്‍ എന്‍ജിനീയറായി ജോലി ചെയ്തുവരികയായിരുന്നു. യുകെയില്‍ സോഫ്റ്റ് വെയര്‍ എന്‍ജിനീയറായ സഹോദരന്‍ മനു പ്രസാദ് അപകട വിവരം അറിഞ്ഞ് നാട്ടില്‍ എത്തിയിട്ടുണ്ട്.

'ദുരിതബാധിതരായ കുടുംബങ്ങള്‍ക്ക് ഞങ്ങളുടെ ഹൃദയംഗമമായ അനുശോചനം അറിയിക്കുന്നു. ജിദ്ദയിലെ ഇന്ത്യന്‍ കോണ്‍സുലേറ്റ് ജനറല്‍ പൂര്‍ണ്ണ പിന്തുണ നല്‍കുകയും അധികാരികളുമായും കുടുംബങ്ങളുമായും ബന്ധം പുലര്‍ത്തുകയും ചെയ്യുന്നു. പരിക്കേറ്റവര്‍ വേഗത്തില്‍ സുഖം പ്രാപിക്കട്ടെ.' കോണ്‍സുലേറ്റ് പറഞ്ഞു.

ജിദ്ദയിലെ കോണ്‍സല്‍ ജനറലുമായി സംസാരിച്ചതായി വിദേശകാര്യ മന്ത്രി എസ് ജയശങ്കറും സംഭവത്തില്‍ ദുഃഖം രേഖപ്പെടുത്തി.

വിദേശകാര്യ മന്ത്രി എസ് ജയശങ്കറും സംഭവത്തില്‍ ദുഃഖം രേഖപ്പെടുത്തി, കൊല്ലപ്പെട്ടവരുടെ കുടുംബങ്ങളുമായി അടുത്ത് സഹകരിച്ച് പ്രവര്‍ത്തിക്കുന്ന ജിദ്ദയിലെ കോണ്‍സല്‍ ജനറലുമായി താന്‍ സംസാരിച്ചതായി പറഞ്ഞു.

'ഈ അപകടത്തെക്കുറിച്ചും ജീവന്‍ നഷ്ടമായതിനെക്കുറിച്ചും അറിഞ്ഞതില്‍ ദുഃഖമുണ്ട്. ജിദ്ദയിലെ ഞങ്ങളുടെ കോണ്‍സല്‍ ജനറലുമായി സംസാരിച്ചു, ബന്ധപ്പെട്ട കുടുംബങ്ങളുമായി ബന്ധപ്പെട്ടിരിക്കുന്നു. ഈ ദാരുണമായ സാഹചര്യത്തില്‍ അദ്ദേഹം തന്റെ പൂര്‍ണ്ണ പിന്തുണ നല്‍കുന്നു.' ജയശങ്കര്‍ പറഞ്ഞു.

തെലങ്കാന സ്വദേശി രമേശ് കപല്ലി, ബിഹാര്‍ സ്വദേശികളായ മുഹമ്മദ് മുഹ്തഷിം, താരിഖ് അലാം, മഹേഷ് ചന്ദ്ര, മുസഫര്‍ ഹുസൈന്‍ ഖാന്‍ ഇബ്രാന്‍, പുഷ്‌കര്‍ സിങ് ദാമി, സഖലൈന്‍ ഹൈദര്‍, ദിനകര്‍ഭായ് ഹരിഭായ് എന്നിവരാണ് മരിച്ച മറ്റു ഇന്ത്യക്കാര്‍. 3 നേപ്പാള്‍, 3 ഘാന സ്വദേശികളാണ് മരിച്ച മറ്റുള്ളവര്‍.