വളരെ വേദനയോടെയാണ് പ്രവാസി മലയാളികള്‍ ഈ വാര്‍ത്ത കേട്ടത്. ഷാര്‍ജയില്‍ വ്യാപാരിയായ മുഹമ്മദ് അലിയാണ്(52) കൊല്ലപ്പെട്ടത്. മജസ്റ്റിക് സൂപ്പര്‍മാര്‍ക്ക് നടത്തിവരികെയായിരുന്നു മുഹമ്മദ് അലി.

ഷാര്‍ജയിലെ മെയ്‌സലൂണ്‍ ഭാഗത്തുള്ള വ്യാപാര സ്ഥാപനത്തിനു പുറത്തായാണ് ഇയാളെ കൊല്ലപ്പെട്ട നിലയില്‍ കണ്ടെത്തിയത്. സമീപത്തുള്ള കടക്കാരാണ് ഇക്കാര്യം പൊലീസിനെ അറിയിച്ചത്. മുഹമ്മദ് അലിയെ സൂപ്പര്‍മാര്‍ക്കറ്റിനുള്ളില്‍ ആരോ അപായപ്പെടുത്തിയെന്നാണ് സൂചന. മുഹമ്മദ് അലിയുടെ നിലവിളി കേട്ട് ഓടിയെത്തിയ കടക്കാരന്‍ മുഹമ്മദ് അലിയെ കടയ്ക്ക് പുറത്ത് ചോരയില്‍ കുളിച്ച നിലയില്‍ കണ്ടെത്തുകയായിരുന്നു. അല്‍പ്പസമയത്തിനുള്ളില്‍ കുഴഞ്ഞു വീണ് മരിക്കുകയും ചെയ്തു. മുഹമ്മദ് അലിയെ ആക്രമിച്ച ആള്‍ ഓടിപ്പോയെന്നാണ് വിലയിരുത്തല്‍. അക്രമിയെ കണ്ടില്ലെന്നാണ് തൊട്ടടുത്ത കടക്കാരന്‍ നല്‍കിയിക്കുന്ന മൊഴി.

സംഭവുമായി ബന്ധപ്പെട്ട് പൊലീസ് അന്വേഷണം ആരംഭിച്ചിട്ടുണ്ട്. സമീപത്തുള്ള സിസിടിവി ദൃശ്യങ്ങളില്‍ നിന്നും തെളിവുകള്‍ ശേഖരിച്ചു വരികയാണെന്ന് പൊലീസ് അറിയിച്ചു. അലിയുടെ കടയില്‍ സിസിടിവി ഇല്ലാത്തത് അന്വേഷണത്തെ പ്രതികൂലമായി ബാധിക്കുമെന്നും പൊലീസ് പറഞ്ഞു. ഒന്നേലേറെ മുറിവുകള്‍ മുഹമ്മദ് അലിയുടെ ദേഹത്തുണ്ടായിരുന്നതായി പൊലീസ് അറിയിച്ചു. തൊട്ടടുത്ത കടയിലെ ക്യാമറകള്‍ പൊലീസ് പരിശോധിച്ചിട്ടുണ്ട്. ഏഷ്യാക്കാരനാണ് അക്രമിയെന്നും പൊലീസ് സ്ഥിരീകരിക്കുന്നു. അതിനപ്പുറത്തേക്ക് ഒരു തുമ്പും കിട്ടിയിട്ടില്ല. മോഷണ ശ്രമമാകും നടന്നതെന്നാണ് പൊലീസിന്റെ പ്രാഥമിക നിഗമനം.

മെയ്‌സലൂണില്‍ 30 വര്‍ഷമായി സൂപ്പര്‍ മാര്‍ക്കറ്റ് നടത്തുകയാണ് അലി. അലിക്ക് കൊല്ലാന്‍ മാത്രമുള്ള ശത്രുക്കള്‍ ഇല്ലെന്നാണ് തങ്ങളുടെ അറിവെന്നും മോഷണശ്രമമാകാം കൊലപാതകത്തിനു കാരണമായതെന്നുമാണ് സമീപത്തുള്ള വ്യാപാരികള്‍ നല്‍കിയ വിവരം. പൊലീസ് നടപടികള്‍ അവസാനിച്ചതിനു ശേഷം മൃതശരീരം നാട്ടലേക്ക് അയക്കും. നാട്ടുകാരുമായി നല്ല ബന്ധം മുഹമ്മദ് അലി പുലര്‍ത്തിയിരുന്നു. അതുകൊണ്ട് തന്നെ കൊലയില്‍ പ്രദേശമാകെ ഞെട്ടിയ അവസ്ഥയിലാണ്.
സഹോദരന്‍ അബ്ദുള്‍ അസീസ് അലിയുമായി ചേര്‍ന്നാണ് മുഹമ്മദ് അലി കച്ചവടം നടത്തിയിരുന്നത്. മറ്റൊരു സഹോദരന്‍ ഗഫൂറും ഒപ്പമുണ്ടായിരുന്നു. രാവിലെ ഏഴര മുതല്‍ രണ്ട് മണിവരെ മുഹമ്മദ് അലിക്കാകും കടയുടെ ചുമതല. അതിന് ശേഷം ഗഫൂറും. ഭാര്യയും രണ്ടു മക്കളും ഉണ്ട്.