നികുതി ചുമത്താനുള്ള നീക്കത്തിനെതിരെ ഐ.എം.എഫ്
ഗള്ഫ് മേഖലയില് ജോലിചെയ്യുന്ന വിദേശികള് നാട്ടിലയക്കുന്ന പണത്തിന് നികുതി ചുമത്താനുളള നീക്കത്തിനെതിരെ മുന്നറിയിപ്പുമായി ഐ.എം.എഫ് വീണ്ടും രംഗത്ത് എത്തി. ഇതുകൊണ്ട് പ്രതീക്ഷിക്കുന്ന ഒരു നേട്ടവും ജി.സി.സി രാജ്യങ്ങളിലെ സമ്പദ് വ്യവസ്ഥക്ക് ലഭിക്കുകയില്ലെന്നും വിപരീത ഫലമുണ്ടാക്കുമെന്നും അന്താരാഷ്ട്ര നാണയനിധി വ്യക്തമാക്കി. ഏകദേശം 84.4 ബില്യണ് ഡോളറാണ് വിദേശികള് പ്രതിവര്ഷം നാട്ടില് അയക്കുന്നത്. രാജ്യങ്ങളിലെ ആഭ്യന്തര ഉല്പാദനത്തിന്റെ മൂന്ന് ശതമാനം മാത്രമാണ് വിദേശികള് ശമ്പളമായി പറ്റുന്നതെന്നാണ് കണക്കുകള് കാണിക്കുന്നത്. പണത്തിന് നികുതി ചുമത്തിയാല് സര്ക്കാര് ഖജനാവുകളില് എത്തുക ഗള്ഫ് രാജ്യങ്ങളിലെ മൊത്തം വരുമാനത്തിന്റെ 0.3 ശതമാനം മാത്രമായിരിക്കും. ഇങ്ങനെ കിട്ടുന്ന തുകകൊണ്ട് സമ്പദ് വ്യവസ്ഥയില് നേരിയ ചലനംപോലും സൃഷ്ടിക്കാന് കഴിയില്ലെന്നും നേട്ടം നിസ്സാരമായിരിക്കുമെന്നും ഐ.എം.എഫ് വിലയിരുത്തി. ഇത്രയും ചെറിയ ഒരു നേട്ടത്തിന് വേണ്ടി നികുതി ഏര്പ്പെടുത്തിയാല് വിദേശികളെ ആകര്ഷിക്കുന്ന രാജ്യങ്ങളുടെ പട്ടികയില് ഗള്ഫ് രാജ്യങ്ങള് പിറകോട്ടുപോവുന്ന സാഹചര്യം ഉണ്ടാകുമെന്നും അത് ബുദ്ധിപരമല്ലെന്നും ഐ.എം.എഫ് വ്യക്തമാക്കി.
വിദേശികള് അയക്കുന്ന പണത്തിന് അഞ്ചു ശതമാനം വരെ നികുതി ചുമത്താനാണ് പ്രത്യേക സമിതിയുടെ പഠന റിപ്പോര്ട്ടിലുള്ളത്. 100 ദീനാറില് കുറവുള്ള സംഖ്യയാണ് അയക്കുന്നതെങ്കില് രണ്ടു ശതമാനം, 100 ദീനാറിനും 500 ദീനാറിനും ഇടക്കുള്ള തുകയാണെങ്കില് നാലു ശതമാനം, 500 ദീനാറിനുമുകളിലുള്ള സംഖ്യയാണെങ്കില് അഞ്ചു ശതമാനം എന്നിങ്ങനെ നികുതി ഈടാക്കണമെന്നാണ് കരടുനിര്ദേശത്തിലുള്ളത്. നികുതി സമാഹരണം ധനമന്ത്രാലയം പുറത്തിറക്കുന്ന സ്റ്റാമ്പുകള് വഴിയായിരിക്കും. ഇവ അംഗീകാരമുള്ള എക്സ്ചേഞ്ച് കമ്പനികള്ക്കും ബാങ്കുകള്ക്കും ലഭ്യമാക്കും. ഇതുവഴിയല്ലാതെ പണമയക്കുന്നവര്ക്ക് ആറുമാസം വരെ തടവും 10,000 ദീനാറില് കൂടാത്ത പിഴയും ശിക്ഷയായി നല്കണം തുടങ്ങിയ ശുപാര്ശകളും റിപ്പോട്ടിലുണ്ട്. വിദേശ തൊഴിലാളിക്ക് ഒരു മാസം നാട്ടിലേക്ക് അയക്കാവുന്ന പരാമാവധി തുക അയാളുടെ ശമ്പളത്തിന് സമാനമാക്കി പരിമിതപ്പെടുത്താനും ആലോചനയുണ്ട്.
https://www.facebook.com/Malayalivartha