20 വര്‍ഷമായി ഒമാന്‍ ജയിലില്‍ കഴിയുന്ന നിരപരാധിയായ മലയാളി യുവാവിന് മോചനമൊരുങ്ങുന്നതിങ്ങനെ
20 വര്‍ഷമായി വിദേശത്ത് ജയിലില്‍ കഴിയുന്ന നിരപരാധിയായ മലയാളി യുവാവിന് മോചനത്തിന് വഴി തുറക്കുന്നു. ശാന്തിഗിരി ഓര്‍ഗനൈസിങ് സെക്രട്ടറി സ്വാമി ഗുരുരത്‌നം ജ്ഞാനതപസ്വിയുടെയും വിദേശ മലയാളികളുടെയും ഇടപെടലിലൂടെയാണ് മോചനത്തിനു വഴിതുറക്കുന്നത്. അമ്പലപ്പുഴ വടക്ക് പഞ്ചായത്ത് കാക്കാഴം വടക്കേ വെള്ളുപ്പറമ്പ് വീട്ടില്‍ പരേതരായ തങ്കപ്പന്‍ ഭാരതിയമ്മ ദമ്പതികളുടെ മകന്‍ സന്തോഷ് (41) ആണ് ഒമാനില്‍ ജയിലില്‍ കഴിയുന്നത്.
കുടുംബത്തിന്റെ പട്ടിണി മാറ്റാനായാണ് സന്തോഷ് ഒമാനിലെത്തിയത്. 1997ല്‍ അവിടെ ഒരു കടയില്‍ ജോലി ചെയ്തിരുന്നപ്പോഴാണ് സന്തോഷിന്റെ ജീവിതം ഇരുളിലായത്. സന്തോഷ് ജോലി ചെയ്തിരുന്ന കടയില്‍ നിന്നു നാല് പാകിസ്താന്‍ യുവാക്കള്‍ കട്ടര്‍ വാങ്ങി. ഈ ഉപകരണം ഉപയോഗിച്ച് അവര്‍ ബാങ്ക് കവര്‍ച്ച നടത്തി. ബാങ്കിലെ സുരക്ഷാ ജീവനക്കാരെ വധിക്കുകയും ചെയ്തു.
കേസില്‍ പ്രതിയാക്കപ്പെട്ട് സന്തോഷും തിരുവനന്തപുരം സ്വദേശിയായ ഷാജഹാനും ജയിലായി. ഷാജഹാന്‍ പിന്നീടു മോചിക്കപ്പെട്ടെങ്കിലും സന്തോഷിന്റെ ദുരിതജീവിതം തുടര്‍ന്നു. മകനെ ഒരു നോക്ക് കാണാന്‍ കഴിയാതെ അമ്മ ഭാരതിയമ്മ ആറു വര്‍ഷം മുമ്പ് മരിച്ചു.സന്തോഷിന്റെ മോചനത്തിനായി ശ്രമം തുടങ്ങിയത് പുന്നപ്ര തയ്യില്‍ ഹബീബ് റഹ്മാനാണ്.
ഒമാനിലെ വ്യവസായിയായ അദ്ദേഹം സന്തോഷിനെ ജയിലില്‍ പോയി കണ്ടിരുന്നു. ഹബീബില്‍ നിന്ന് സന്തോഷിനെപ്പറ്റി അറിഞ്ഞ സ്വാമി ഗുരുരത്‌നം ജ്ഞാനതപസ്വി ഇന്നലെ കാക്കാഴത്ത് സന്തോഷിന്റെ വീട്ടിലെത്തി. സഹോദരങ്ങളായ മഹേശന്‍, ഷണ്‍മുഖന്‍ എന്നിവരോട് കാര്യങ്ങള്‍ ചോദിച്ചറിഞ്ഞു.
നിരപരാധിയായ സന്തോഷിന്റെ മോചനത്തിനായി കേന്ദ്രമന്ത്രിമാരായ രാജ്‌നാഥ് സിംങ്, സുഷമ സ്വരാജ് എന്നിവരുമായി കൂടിക്കാഴ്ച നടത്തുമെന്ന് അദ്ദേഹം പറഞ്ഞു.
https://www.facebook.com/Malayalivartha
