എയര്പോര്ട്ട് ടാക്സ് വര്ധനക്ക് പിന്നാലെ സുരക്ഷാഫീയും
ഒമാന് വിമാനത്താവളങ്ങളില്നിന്നുള്ള വിമാനയാത്രക്കാര്ക്ക് പുതിയ ഫീസ് ചുമത്തുന്നു. എയര്പോര്ട്ട് ടാക്സ് വര്ധനക്ക് പിന്നാലെയാണിത്. സുരക്ഷാഫീ ഇനത്തില് ഒരു ടിക്കറ്റില് ഒരു റിയാല് വീതം ഈടാക്കാനാണ് ഒമാന് എയര്പോര്ട്സ് മാനേജ്മെന്റ് കമ്പനിയുടെ തീരുമാനം. അന്താരാഷ്ട്ര യാത്രക്കാരും ട്രാന്സിറ്റ് യാത്രക്കാരും ഈ അധിക ഫീസ് ജനുവരി ഒന്നുമുതല് നല്കണം. സുരക്ഷാഫീസില് നിന്ന് പ്രാദേശിക യാത്രക്കാരെ ഒഴിവാക്കിയിട്ടുണ്ട്. എട്ടു റിയാലില്നിന്ന് വിമാനത്താവള നികുതി വര്ധിപ്പിക്കാനുള്ള തീരുമാനം കഴിഞ്ഞ മാര്ച്ച് 16-നാണ് വിമാനത്താവള കമ്പനി പുറപ്പെടുവിച്ചത്. ജൂലൈ ഒന്നു മുതല് അന്താരാഷ്ട്ര യാത്രക്കാരില് നിന്ന് പത്ത് റിയാലാണ് വിമാനത്താവള നികുതി ഈടാക്കിയത്. സുരക്ഷാ ഫീസ് ഏര്പ്പെടുത്തുന്നതിലൂടെ പത്തു ദശലക്ഷം റിയാലിന്റെ അധിക വരുമാനമാണ് കമ്പനി കണക്കാക്കുന്നത്. സിവില് ഏവിയേഷന് പൊതു അതോറിറ്റിയുടെ നിര്ദേശ പ്രകാരമാണ് പുതിയ സുരക്ഷാ നികുതി ചുമത്തുന്നതെന്ന് വിമാനത്താവള കമ്പനി സര്ക്കുലറില് പറയുന്നു. പ്രാദേശിക യാത്രക്കാര്ക്ക് ഒരു റിയാല് ആയിരുന്ന വിമാനത്താവള നികുതി ജനുവരി ഒന്നുമുതല് നാലുറിയാലായി വര്ധിക്കും. 200 കിലോഗ്രാം വരെ ഭാരം വരുന്ന അന്താരാഷ്ട്ര കാര്ഗോകള്ക്കും ഒരു റിയാല് വീതം നല്കേണ്ടി വരും. രണ്ടു വയസസ്സില് താഴെയുള്ള കുട്ടികള്ക്കും ഡ്യൂട്ടിയിലുള്ള എയര്ക്രാഫ്റ്റ് ജീവനക്കാര്ക്കും പുതിയ ഫീസില് ഇളവുള്ളതായി സര്ക്കുലറില് പറയുന്നു. വിമാന കമ്പനി പ്രതിനിധികളുമായി നടത്തിയ കൂടികാഴ്ചകള്ക്ക് ശേഷമാണ് പുതിയ സുരക്ഷാ നികുതി ചുമത്താന് തീരുമാനിച്ചത്.
https://www.facebook.com/Malayalivartha
