ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു കെറിയുടെ പ്രസ്താവനയെ രൂക്ഷമായി വിമര്‍ശിച്ചു. ഇസ്രയേലിനോട് യു.എസ് പക്ഷപാതപരമായി പെരുമാറുന്നുവെന്ന് അദ്ദേഹം ആരോപിച്ചു. പലസ്തീനിലെ ഇസ്രയേല്‍ കുടിയേറ്റം പശ്ചിമേഷ്യയിലെ സമാധനം തകര്‍ത്തുകൊണ്ടിരിക്കുകയാണെന്ന് യു.എസ്. വിദേശകാര്യസെക്രട്ടറി ജോണ്‍ കെറി അഭിപ്രായപ്പെട്ടു. വര്‍ഷങ്ങളായി സഖ്യത്തിലായിരുന്ന ഇസ്രയേലിനെതിരെ പതിവില്ലാത്ത വിമര്‍ശനമാണ് കെറിയുടെ ഭാഗത്ത്‌നിന്നുണ്ടായത്. ഡിസംബര്‍ 23-ന് ഇസ്രയേലിന്റെ പലസ്തീന്‍ അധിനിവേശത്തിനെതിരെ കൊണ്ടുവന്ന യു.എന്‍ പ്രമേയത്തെ യു.എസ് എതിര്‍ത്തിരുന്നില്ല. ഈ സാഹചര്യത്തിലാണ് ഇസ്രയേലിനെതിരെ കെറിയുടെ പ്രസ്താവന. 

ഇസ്രയേലികളും പലസ്തീനികളും സ്വന്തം രാജ്യങ്ങളില്‍ ജീവിക്കുന്നകാര്യത്തില്‍ ഒരു തീരുമാനത്തിലെത്താത്തിടത്തോളം കാലം പശ്ചിമേഷ്യയില്‍ സമാധനമുണ്ടാകില്ലെന്ന് ആഴ്ചകള്‍ക്കുമുമ്പ് നടത്തിയ പ്രസംഗത്തിലാണ് കെറി പറഞ്ഞത്. പലസ്തീനില്‍ നടക്കുന്ന ഭീകരാക്രമണങ്ങളെയും കെറി പ്രസംഗത്തില്‍ അപലപിച്ചു. അമേരിക്ക ഇസ്രയേലിനെതിരെ തിരിഞ്ഞിരിക്കുകയാണെന്നും ഇസ്രയേല്‍-പലസ്തീന്‍ പ്രശ്‌നങ്ങളുടെ മൂലകാരണം മനസ്സിലാക്കാതെയാണ് കെറിയുടെ പ്രസ്താവനയെന്നും നെതന്യാഹു പറഞ്ഞു. ഇസ്രയേലിനെ പിന്തുണച്ച് ട്വീറ്റ് ചെയ്ത ട്രംപില്‍ നിന്ന് അനുകൂലനടപടികള്‍ ഉണ്ടാകുമെന്ന പ്രതീക്ഷയിലാണ് ഇസ്രയേല്‍.