ആത്മഹത്യാ ടൂറിസത്തിന് പ്രചാരമേറുന്നു. ആത്മഹത്യാ ടൂറിസത്തിന് വേണ്ട സഹായം ഒരുക്കുന്നതിന് സ്വിറ്റസര്‍ലണ്ടില്‍ ഒരു സംഘടന തന്നെയുണ്ട്. 'ഡിഗ്‌നിറ്റാസ്'എന്നാണ് ആ സംഘടനയുടെ പേര്. 2016-ല്‍ 201 പേര്‍ക്ക് മരണം ഒരുക്കിയതായി ഡിഗ്‌നിറ്റാസ് പസ്താവനയില്‍ അറിയിച്ചു. ഡിഗ്‌നിറ്റാസില്‍ നിന്നും മരണം സ്വീകരിച്ചവരില്‍ ആറ് പേര്‍ മാത്രമാണ് സ്വിറ്റസര്‍ലണ്ട്കാര്‍. ബാക്കി വരുന്ന 195 പേരും വിദേശീയരാണ്. ജര്‍മനി 73, യു കെ 47, ഫ്രാന്‍സ് 30 എന്നിങ്ങനെയാണ് സ്വിറ്റസര്‍ലണ്ടില്‍ ആത്മഹത്യാ ടൂറിസത്തിനായി വന്നവരുടെ കണക്ക്. ഓസ്ട്രിയ, ഇസ്രായേല്‍, യു എസ്, കാനഡ എന്നീ രാജ്യങ്ങളില്‍ നിന്ന് പോലും മരിക്കാനായി സ്വിറ്റസര്‍ലണ്ടിലേക്കു ആളുകള്‍ എത്തിയതായി ഡിഗ്‌നിറ്റാസ് പറയുന്നു. സ്വിറ്റസര്‍ലണ്ടില്‍ മരണത്തിന് സൗകര്യം ചെയുതുകൊടുക്കുന്ന എക്‌സിറ്റ് എന്ന മറ്റൊരു ഓര്‍ഗനൈസേഷനുമുണ്ട്. എക്‌സിറ്റിന്റെ കണക്കുകള്‍ കൂടെ കൂട്ടിയാല്‍, സ്വിറ്റസര്‍ലണ്ടിലേക്കു മരണത്തിനായി പ്രതിവര്‍ഷം വരുന്നവരുടെ എണ്ണം ഇനിയും കൂടും. ചികില്‍സിച്ചാല്‍ സുഖപ്പെടാത്ത രോഗപീഡകള്‍ അനുഭവിക്കുന്നവര്‍ക്ക് ജീവിതം അവസാനിപ്പിക്കണമെന്ന് നിശ്ചയിച്ചാല്‍ ഡോക്ടറുടെ സാക്ഷ്യപത്രമുണ്ടെങ്കില്‍ ഒരു നിശ്ചിത ഫീസ് ഈടാക്കി മരിക്കുന്നതിനുവേണ്ടിയുളള സൗകര്യങ്ങള്‍ ഈ സംഘടനകള്‍ ചെയ്തു കൊടുക്കും. ദയാവധത്തിന് ഒട്ടുമിക്ക രാജ്യങ്ങളിലും അനുമതിയില്ല. സ്വിറ്റ്‌സര്‍ലാന്റില്‍ അതിനുളള അനുമതി ഉളളതുകൊണ്ടാണ് ആത്മഹത്യാ ടൂറിസത്തിന് അവിടെ പ്രചാരമേറുന്നത്. സംഘടനയില്‍ അംഗത്വം എടുക്കുന്നവര്‍ക്കാണ് ഇവര്‍ ഈ സൗകര്യങ്ങള്‍ ചെയ്യുതു കൊടുക്കുന്നത്. ജര്‍മനി, ബ്രിട്ടന്‍, ഫ്രാന്‍സ് എന്നീ രാജ്യങ്ങളില്‍ നിന്നുള്ളവരാണ് ഇവരില്‍ അധികവും. 7764 പേര്‍ക്കാണ് നിലവില്‍ ഡിഗ്‌നിറ്റാസില്‍ അംഗത്വം ഉള്ളത്. ഇതില്‍ 473 പേര്‍ 2016 ല്‍ മാത്രം പുതുതായി അംഗത്വം എടുത്തത് അതിനു മുമ്പുള്ള വര്‍ഷത്തേക്കാള്‍ ഒമ്പത് ശതമാനം കൂടുതലാണ്. എന്നാല്‍ മരണം സ്വീകരിച്ചവരുടെ എണ്ണം 222 ല്‍ നിന്നും 201 ലേക്ക് പോയ വര്‍ഷം കുറഞ്ഞതായി ഡിഗ്‌നിറ്റാസ് വ്യക്തമാക്കി.