യുഎഇയില് പുതിയ വിസാ നിയമം
യുഎഇയില് പുതിയ വിസാ നിയമം പ്രാബല്ല്യത്തില്. ജീവനക്കാരന്റെ താമസ വീസ റദ്ദാക്കിയാലും ഒപ്പമുള്ള കുടുംബാംഗങ്ങളുടെ വിസ റദ്ദാകാത്ത രീതിയിലാണ് വിസ നിയമ മാറ്റം. ഇതിനായി 5000 ദിര്ഹം കെട്ടിവയ്ക്കണം. ജീവനക്കാരന് പുതിയ വിസ നേടി താമസാനുമതി ശരിയാക്കുമ്പോള് തുക തിരികെ ലഭിക്കും. സന്ദര്ശകര്ക്കും താമസക്കാര്ക്കും ഗുണകരമായ നിരവധി വ്യവസ്ഥകളോടെയാണ് യുഎഇ പുതിയ വിസാ നിയമം കൊണ്ടുവരുന്നത്. 5000 ദിര്ഹം കെട്ടിവെച്ചാല് ജീവനക്കാരന്റെ താമസ വിസ റദ്ദാക്കിയാലും ഇനിമുതല് ഒപ്പമുള്ള കുടുംബാംഗങ്ങളുടെ വിസ റദ്ദാകില്ല. ജീവനക്കാരന് പുതിയ വിസ നേടി താമസാനുമതി ശരിയാക്കുമ്പോള് കെട്ടിവെച്ച തുക തിരികെ ലഭിക്കും. വിസാ പരിഷ്കാരങ്ങളുടെ കൂട്ടത്തിലാണ് ഈ വ്യവസ്ഥയും ഉള്പ്പെടുത്തിയിരിക്കുന്നത്.
വനിതാ നിക്ഷേപകരുടെ കുടുംബാംഗങ്ങള്ക്ക് ഓരോരുത്തര്ക്കും 3000 ദിര്ഹം വീതം കെട്ടിവച്ചാല് വിസ ലഭിക്കും. ഈ തുകയും തിരികെ ലഭിക്കും. ജോലിക്കും സന്ദര്ശനത്തിനും മള്ട്ടിപ്പിള് എന്ട്രി പെര്മിറ്റ്, സ്റ്റഡി വിസ, ചികിത്സയ്ക്കും കോണ്ഫറന്സുകളില് പങ്കെടുക്കാനും പ്രത്യേക എന്ട്രി പെര്മിറ്റ് തുടങ്ങിയവയും പുതുതായി ഏര്പ്പെടുത്തുന്നുണ്ട്. വ്യാജരേഖ ചമച്ച് താമസ വിസയ്ക്ക് അപേക്ഷ നല്കിയാല് പിഴ 5000 ദിര്ഹമാകും. ഒരു വര്ഷത്തിനകം തന്നെ വീണ്ടും വ്യാജരേഖ നല്കുന്നവരുടെ പിഴ അരലക്ഷം ദിര്ഹം വരെയാക്കും. താമസ വിസയില്ലാതെ അനധികൃതമായി കഴിയുന്നവരെ സ്വദേശത്തേക്ക് അയയ്ക്കാന് പ്രത്യേക ഫണ്ട് രൂപീകരിക്കാനും വ്യവസ്ഥയുണ്ട്. റസിഡന്സി ഡിപ്പാര്ട്മെന്റിന്റെ പോര്ട്ടല് ഉപയോഗിക്കുന്നവര് വിവരങ്ങള് കൃത്യമായി നല്കിയില്ലെങ്കില് 100 ദിര്ഹം പിഴ ഈടാക്കാം. ജീവനക്കാരുമായി ബന്ധപ്പെട്ട വിവരങ്ങള് കൃത്യസമയത്തു നല്കാത്ത കമ്പനികള് ജീവനക്കാരുടെ എണ്ണം അനുസരിച്ച് 1000 ദിര്ഹം വീതം പിഴ നല്കേണ്ടിവരും. കമ്പനിയുടെ വിശദാംശങ്ങളില് വരുന്ന മാറ്റങ്ങള് മന്ത്രാലയത്തെ നിര്ദിഷ്ട സമയത്ത് അറിയിച്ചില്ലെങ്കിലും 1000 ദിര്ഹം പിഴ നല്കേണ്ടിവരും
https://www.facebook.com/Malayalivartha
