ലോകമെമ്പാടുമുള്ള മലയാളികളുടെ ആഘോഷം ഫെയിസ്ബുക്കില്‍ പൊടിപൊടിക്കുകയാണ്, ജി.എന്‍.പി.സി എന്ന ഗ്രൂപ്പിലൂടെ... ജി.എന്‍.പി.സി എന്ന് വെച്ചാല്‍ ഗ്ലാസ്സിലെ നുരയും പ്ലേറ്റിലെ കറിയും. മദ്യപാനവും ആഘോഷം മാത്രമല്ല യാത്രകളും ഭക്ഷണവും നല്ല യാത്രാവിശേഷങ്ങളും വ്യത്യസ്തമായ രുചിക്കൂട്ടുകളും ലോകത്ത് കിട്ടുന്ന വിവിധതരം മദ്യങ്ങളും ഗ്രൂപ്പില്‍ പങ്കുവെയ്ക്കാം. കുടിയന്‍മാര്‍ക്കാണ് ഗ്രൂപ്പില്‍ മേല്‍ക്കോയ്മ. 2017 മെയ് ഒന്നിന് തുടങ്ങിയ ഗ്രൂപ്പില്‍ രണ്ടുലക്ഷത്തോളം പേരാണുള്ളത്.

തിരുവനന്തപുരം സ്വദേശിയും ബിസിനസ്സുകാരനുമായ ടി .എല്‍.അജിത് കുമാറിന് തോന്നിയ ആശയമാണ് ഗ്രൂപ്പ് ഉണ്ടാക്കാന്‍ കാരണമായത്. സുരക്ഷിത മദ്യപാനം, യാത്രാനുഭവങ്ങള്‍, ഭക്ഷണവൈവിധ്യം എന്നിവ ലക്ഷ്യമായി ഒരു ഗ്രൂപ്പ് തുടങ്ങണമെന്നായിരുന്നു അജിത്തിന്റെ ആശയം. ഫെയ്‌സ് ബുക്കില്‍ ആയിരത്തി അഞ്ഞൂറോളം സുഹൃത്തുക്കളുണ്ടായിരുന്ന അജിത്ത് സമാന ചിന്താഗതിക്കാരുടെ അഭിപ്രായം തേടി അവരെ ചേര്‍ത്താണ് ഗ്രൂപ്പ് തുടങ്ങിയത്. ഗ്ലാസ്സിലെ നുരയും പ്ലേറ്റിലെ കറിയും… ജി എന്‍ പി സി.. എന്ന് പേരുമിട്ടു. പേര് കണ്ടതും ലോകമെമ്പാടുമുള്ള മലയാളികള്‍ ഏറ്റെടുത്തു. ഗ്രൂപ്പിന്റെ വളര്‍ച്ച പെട്ടെന്നായിരുന്നു. 

കഴിഞ്ഞ മാസം അംഗസംഖ് ഒരു ലക്ഷം കടന്നു. മെയ് ഒന്നിനായിരുന്നു വാര്‍ഷികാഘോഷം.അതിനായി വലിയ പ്രചരണം ഫെയ്‌സ് ബുക്കില്‍ നടന്നു. ആറുദിവസം കൊണ്ട് 80, 000 പുതിയ അംഗങ്ങള്‍ ചേര്‍ന്നു. 20, 000 പേര്‍ അംഗത്വത്തിനായി ക്യൂ നില്‍ക്കുന്നു. അവരും കൂടാകുമ്പോള്‍ അംഗസംഖ്യ രണ്ട് ലക്ഷമാകും. ആളുകളെ വ്യക്തമായി മനസിലാക്കിയ ശേഷമേ അംഗത്വം നല്‍കൂ. വിദ്വേഷമോ, വെറുപ്പോ, സംസ്‌കാര ശൂന്യമായ അഭിപ്രായങ്ങളോ അനുവദിക്കുന്നതല്ല. അലക്ഷ്യമവും നിയമവിരുദ്ധവും സുരക്ഷിതവുമല്ലാത്ത മദ്യപാനവും പ്രവര്‍ത്തികളും പ്രോത്സാഹിപ്പിക്കില്ല. പരസ്പ്പരബഹുമാനം നിലിര്‍ത്തുന്നവരെ മാത്രമേ അംഗങ്ങളാക്കൂ. ഇവ തെറ്റിക്കുന്നവരെ പുറത്താക്കും.

വിദേശ മലയാളികള്‍ ധാരാളമുണ്ട് ജി എന്‍ പി സിയില്‍. മദ്യപാന നിമിഷങ്ങളാണ് കൂടുതലും. ഓരോ നാട്ടിലും കിട്ടുന്ന പലതരം മദ്യങ്ങള്‍ ആസ്വദിച്ച് കഴിക്കുന്നതിന്റെ ഫോട്ടോകളും അതിന്റെ വിശദാംശങ്ങളും ഗ്രൂപ്പില്‍ പോസ്റ്റ് പങ്ക് വയ്ക്കുന്നുണ്ട്. ഗ്രാമങ്ങളിലെ കള്ളുഷാപ്പുകളും യൂറോപ്പിലെ കിടിലം മദ്യശാലകളും പ്രവാസി മലയാളികളുടെ മദ്യപാനമുറികളും ആഘോഷ രാവുകളും എല്ലാം ഈ കൂട്ടായ്മയില്‍ കാണാം. മാലിബു, ജാക്ക് ഡാനിയല്‍ തുടങ്ങി ഒപിആറും ഒസിആറും വാറ്റുചാരായം വരെയും കാണാം.