യു.എ.ഇയില് തൊഴിലാളികൾക്ക് ഉച്ചവിശ്രമം നിർബന്ധം; സ്വദേശിവൽക്കരണ മന്ത്രാലയത്തിന്റെ പുതിയ ഉത്തരവ് ജൂണ് 15 മുതല്
യു.എ.ഇയില് തൊഴിലാളികൾക്ക് ജൂണ് 15 മുതല് സെപ്റ്റംബര് 15 വരെ ഉച്ചവിശ്രമം നിർബന്ധമാക്കി. ഇത് സംബന്ധിച്ച ഉത്തരവ് മാനവ വിഭവശേഷി- സ്വദേശിവൽക്കരണ മന്ത്രാലയം പുറത്തിറക്കി. മൂന്ന് മാസത്തേക്ക് ഉച്ചക്ക് 12.30 മുതല് മൂന്ന് വരെ തൊഴിലാളികളെ കൊണ്ട് നേരിട്ട് വെയിലേല്ക്കുന്ന ജോലികള് ചെയ്യിക്കുന്നത് തടയുന്നതാണ് നിയമം. തുടര്ച്ചയായ 14 മത് വര്ഷമാണ് മന്ത്രാലയം ഉച്ചവിശ്രമ നിയമം നടപ്പാക്കുന്നത്.
ഒരു ദിവസത്തെ പ്രവൃത്തിസമയം രാവിലെ, വൈകുന്നേരം എന്നിങ്ങനെ രണ്ട് ഷിഫ്റ്റായി വിഭജിച്ചതായി മാനവവിഭവശേഷി സ്വദേശിവത്കരണ മന്ത്രി നാസര് ബിന് ഥാനി ആല് ഹംലി അറിയിച്ചു. മൊത്തം എട്ട് മണിക്കൂറായിരിക്കും പ്രവൃത്തി സമയം. അതേസമയം അധിക സമയം ജോലി ചെയ്യുന്നവര്ക്ക് മതിയായ ആനുകൂല്യം ലഭ്യമാക്കണം.
ഉച്ചവിശ്രമ കാലയളവില് ഒാരോ ദിവസത്തെയും പ്രവൃത്തി സമയക്രമം സംബന്ധിച്ച് തൊഴിലുടമകള് തൊഴിലാളികളെ വ്യക്തമായി അറിയിക്കണം. വിശ്രമസമയത്ത് കഴിയാന് ആവശ്യമായ സൗകര്യങ്ങളും ഒരുക്കണം.
നിയമം ലംഘിക്കുന്ന കമ്പനികള് ഒരു ജോലിക്കാരന് 5000 ദിര്ഹം വീതം പരമാവധി 50000 ദിര്ഹം വരെ പിഴ അടക്കേണ്ടി വരും. കൂടാതെ കമ്പനിയെ തരം താഴ്ത്താനും പ്രവര്ത്തന വിലക്ക് ഏര്പ്പെടുത്താനും നിയമത്തില് വകുപ്പുണ്ട്.
https://www.facebook.com/Malayalivartha